ព័ត៌មានអន្ដរជាតិ

ត្រាំបដិសេធបញ្ជាក់ថាតើអាមេរិកនឹងធ្វើតេស្តនុយក្លេអ៊ែរក្រោមដីឬក៏យ៉ាងណា

បានផុស

៩ ខែ មុន

នៅ

ថ្ងៃសៅរ៍ ១ វិច្ឆិកា ២០២៥

ដោយ

Chheang

ប្រធានាធិបតី ដូណាល់ ត្រាំ បានប្រកាសជាថ្មីកាលពីថ្ងៃសុក្រទី៣១ខែតុលាថា សហរដ្ឋអាមេរិកនឹងបន្តការសាកល្បងនុយក្លេអ៊ែរឡើងវិញបន្ទាប់ពីការផ្អាករយៈពេល៣៣ឆ្នាំ ប៉ុន្តែលោកមិនបញ្ជាក់ទេថាតើការធ្វើតេស្តនេះនឹងរួមបញ្ចូលការបំផ្ទុះក្រោមដី ដែលដូចទៅនឹងកាលពីសម័យសង្គ្រាមត្រជាក់ដែរឬក៏អត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកត្រាំ បានប្រាប់អ្នកយកព័ត៌មាននៅលើយន្តហោះ Air Force One ដែលកំពុងធ្វើដំណើរទៅកាន់ Palm Beach រដ្ឋ Florida នៅពេលត្រូវបានសួរជាពិសេសអំពីការធ្វើតេស្តនុយក្លេអ៊ែរនៅក្រោមដីថា «អ្នកនឹងដឹងក្នុងពេលឆាប់ៗនេះ ប៉ុន្តែយើងនឹងធ្វើការសាកល្បងមួយចំនួន។ ប្រទេសផ្សេងធ្វើបាន។ បើគេនឹងធ្វើវា យើងក៏នឹងធ្វើវាដែរ»។

ការអត្ថាធិប្បាយរបស់លោកត្រាំ បានកើតឡើងមួយថ្ងៃបន្ទាប់ពីលោកបានប្រកាសថា លោកបានណែនាំយោធាអាមេរិកឲ្យ«ចាប់ផ្តើមឡើងវិញភ្លាមៗ»នូវការសាកល្បងនុយក្លេអ៊ែរ ដែលជាការផ្លាស់ប្តូរដែលត្រូវបានគេមើលឃើញយ៉ាងទូលំទូលាយថាជាសញ្ញាមួយសម្រាប់គូប្រជែងមហាអំណាចចិន និងរុស្ស៊ី។ ការប្រកាសនេះធ្វើឡើងនៅលើប្រព័ន្ធផ្សព្វផ្សាយសង្គម ខណៈដែលលោកត្រាំកំពុងជិះលើយន្តហោះ Marine One ឆ្ពោះទៅទីក្រុងប៊ូសាន ប្រទេសកូរ៉េខាងត្បូង ដើម្បីពិភាក្សាជាមួយប្រធានាធិបតីចិន ស៊ី ជីនពីង ជាការកត់សម្គាល់នៃការផ្លាស់ប្តូរដ៏សំខាន់នៅក្នុងគោលនយោបាយនុយក្លេអ៊ែររបស់សហរដ្ឋអាមេរិក។

សហរដ្ឋអាមេរិកបានផ្អាកការធ្វើតេស្តនុយក្លេអ៊ែរតាំងពីឆ្នាំ១៩៩២មកម៉្លេះ បើទោះបីជាខ្លួននៅតែបន្តធ្វើតេស្តសារជាតិមិនផ្ទុះដើម្បីវាយតម្លៃភាពជឿជាក់នៃក្បាលគ្រាប់ក៏ដោយ។ វានៅតែមិនទាន់ច្បាស់ថាតើការណែនាំរបស់លោកត្រាំសំដៅលើការធ្វើតេស្តបំផ្ទុះទ្រង់ទ្រាយពេញលេញ ដែលនឹងពាក់ព័ន្ធនឹងរដ្ឋបាលសន្តិសុខនុយក្លេអ៊ែរជាតិ ឬការធ្វើតេស្តហោះហើរនៃមីស៊ីលដែលមានសមត្ថភាពនុយក្លេអ៊ែរ។

រដ្ឋមន្ត្រីការពារជាតិអាមេរិក Pete Hegseth ដែលនិយាយនៅក្នុងប្រទេសម៉ាឡេស៊ីបានការពារវិធានការនេះថាជា «វិធីដែលមានទំនួលខុសត្រូវខ្ពស់» ដើម្បីធានានូវភាពជឿជាក់នៃការរារាំងនុយក្លេអ៊ែររបស់អាមេរិក។ លោក Hegseth បានលើកឡើងថា «យើងកំពុងផ្លាស់ប្តូរយ៉ាងឆាប់រហ័ស» ដោយបន្ថែមថា មន្ទីរបញ្ចកោណនឹងសម្របសម្រួលជាមួយនាយកដ្ឋានថាមពលលើការអនុវត្ត។

សូមជម្រាបថា គ្មានជាតិផ្ទុះនុយក្លេអ៊ែរណាផ្សេងក្រៅពីប្រទេសកូរ៉េខាងជើងដែលធ្លាប់បានធ្វើការសាកល្បងក្នុងរយៈពេល២៥ឆ្នាំកន្លងទៅនេះទេ៕