ព័ត៌មានអន្ដរជាតិ
ពូទីន ថា អ៊ុយក្រែនត្រូវតែប្រគល់ទឹកដីដូរយកសន្តិភាព
ប្រធានាធិបតីរុស្ស៊ី វ្ល៉ាឌីមៀរ ពូទីន បានប្រកាសថា កិច្ចព្រមព្រៀងសន្តិភាពណាមួយជាមួយអ៊ុយក្រែនត្រូវតែរាប់បញ្ចូលការប្រគល់ទឹកដីដែលក្រុងមូស្គូទាមទារ ហើយបញ្ជាក់ថា សេចក្តីព្រាងសំណើពីទីក្រុងវ៉ាស៊ីនតោនអាចជា«មូលដ្ឋាន»សម្រាប់ការចរចាបន្ថែមទៀត។
លោក វ្ល៉ាឌីមៀរ ពូទីន (រូបថត៖ Reuters)
យោងតាម Independent អំឡុងបំពេញទស្សនកិច្ចនៅប្រទេសកៀហ្ស៊ីស៊ីស្ថាន កាលពីថ្ងៃព្រហស្បតិ៍ទី២៧ខែវិច្ឆិកាឆ្នាំ២០២៥ លោកពូទីន បាននិយាយម្តងទៀតថា កងកម្លាំងអ៊ុយក្រែនត្រូវតែដកខ្លួនចេញពីតំបន់ដែលរុស្ស៊ីស្វែងរកការកាត់បញ្ចូលជាឧបសម្ព័ន្ធ ដោយព្រមានថា ក្រុងមូស្គូនឹង«សម្រេចវាដោយប្រើកម្លាំង» បើពួកគេបដិសេធ។ ការអត្ថាធិប្បាយរបស់លោក បានកើតឡើងបន្ទាប់ពីកិច្ចចរចាការទូតត្រូវបានបង្កើនក្នុងរយៈពេលមួយសប្តាហ៍កន្លងមកនេះ ដែលមានការចូលរួមពីមន្ត្រីរុស្ស៊ី អ៊ុយក្រែន និងអាមេរិក។
ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានបញ្ជាក់ថា ក្រុមអ្នកចរចាអ៊ុយក្រែន និងអាមេរិកនឹងជួបគ្នាម្តងទៀតនៅសប្តាហ៍នេះ ដើម្បីពិភាក្សាអំពីការធានាសន្តិសុខ ដែលជាចំណុចគន្លឹះក្នុងការចរចា។ បេសកជនអាមេរិក លោក Steve Witkoff ក៏ត្រូវបានគេរំពឹងថានឹងទៅដល់ក្រុងមូស្គូនៅសប្តាហ៍ក្រោយដែរ សម្រាប់ការពិភាក្សាអំពីតំបន់គ្រីមៀរ និងតំបន់ដុនបាស។
អ៊ុយក្រែនបាននិយាយម្តងទៀតថា ខ្លួននឹងមិនបោះបង់ចោលទឹកដីណាមួយឡើយ។ លោក Andriy Yermak ដែលជាអ្នកចរចាកំពូលរបស់ទីក្រុងកៀវ បានប្រាប់កាសែត The Atlantic ថា «គ្មាននរណាម្នាក់គួរដាក់សម្ពាធយើងឲ្យលះបង់ទឹកដីឡើយ» ដោយសង្កត់ធ្ងន់ថា «គ្មានមនុស្សដែលចេះគិតឯណា» ព្រមចុះហត្ថលេខាលើកិច្ចព្រមព្រៀងបែបនេះទេ។
ក្រុងមូស្គូបានផ្តល់សញ្ញានៃការយល់ព្រមចំពោះសេចក្តីព្រាង២៨ចំណុចរបស់សហរដ្ឋអាមេរិក ដែលនឹងទទួលស្គាល់តំបន់ដែលកាន់កាប់ដោយរុស្ស៊ីថាជាការគ្រប់គ្រងជាក់ស្តែងរបស់ក្រុងមូស្គូ ទោះបីជាមិនស្របច្បាប់ក៏ដោយ។ លោកពូទីន បានលើកឡើងថា បញ្ហាមួយចំនួនទាមទារឲ្យមានការកែប្រែ ហើយកិច្ចព្រមព្រៀងណាមួយត្រូវតែទទួលស្គាល់ដោយអន្តរជាតិ។
វិមានក្រឹមឡាំងក៏បានច្រានចោលការព្រមានរបស់លោកខាងលិចដែលថា រុស្ស៊ីអាចនឹងវាយប្រហារអឺរ៉ុប ហើយចាត់ទុករឿងនេះថា «គួរឲ្យអស់សំណើច» និងបានចោទប្រកាន់អ្នករិះគន់ថាកំពុងព្យាយាមបំផ្លាញការចរចា។
ដៃគូអឺរ៉ុបបានបន្តរៀបចំកម្លាំងធានាសម្រាប់អ៊ុយក្រែននៅពេលដែលបទឈប់បាញ់ត្រូវបានសម្រេច។ តួកគីបានប្រកាសកាលពីថ្ងៃព្រហស្បតិ៍ថា ខ្លួនត្រៀមរួចជាស្រេចដើម្បីចូលរួម បន្ទាប់ពីប្រធានាធិបតីបារាំង Emmanuel Macron បាននិយាយថា កម្លាំងធានាសន្តិសុខឲ្យអ៊ុយក្រែនអាចរួមបញ្ចូលកងទ័ពមកពីបារាំង អង់គ្លេស និងតួកគី៕
ប្រែសម្រួល៖ ឈាង
-
ព័ត៌មានអន្ដរជាតិ២ ថ្ងៃ agoអាល្លឺម៉ង់ ក្តៅខ្លាំង ដល់ថ្នាក់រលាយផ្លូវរថភ្លើងអគ្គិសនី និងប្រេះហើប ផ្លូវល្បឿនលឿន
-
សន្តិសុខសង្គម៤ ថ្ងៃ agoចាប់ខ្លួនម្ចាស់ហាង «កាកាសាឡន ក្រោយវាយធ្វើបាប និងគំរាមកាត់ម្រាមដៃជើង លើស្រ្តីមេម៉ាយបម្រើក្នុងផ្ទះ
-
កីឡា២ ថ្ងៃ agoលោក ពេជ្រ សុផាន់ រំលឹកគុណរបស់លោក អេ ភូថង ដែលធ្លាប់ជួយខ្លួនអំឡុងឆ្នាំ២០១៤ ធ្លាក់ដល់ទាល់ច្រកអស់ផ្លូវដើរ
-
ព័ត៌មានអន្ដរជាតិ៣ ថ្ងៃ agoផ្ទុះផង បាញ់ផង ដុតផង! ភាគខាងត្បូងថៃ កំពុងចលាចល និង វឹកវរខ្លាំង
-
ព័ត៌មានអន្ដរជាតិ៤ ថ្ងៃ agoផ្ទុះគ្រាប់បែក នៅថៃ របួសទេសចរម៉ាឡេស៊ី ២នាក់
-
កីឡា៣ ថ្ងៃ agoតំបន់ប្រយុទ្ធបារាំងកំពុងពេញសាច់ល្អ ខណៈ Mbappé តាមស្មើគ្រាប់បាល់ Messi
-
ព័ត៌មានអន្ដរជាតិ៦ ថ្ងៃ agoតុលាការកូរ៉េខាងត្បូង ផ្ដន្ទាទោសអតីតជំទាវទីមួយ Kim Keon Hee ជាប់ពន្ធនាគារ ៧ឆ្នាំ ពីបទទទួលសំណូក
-
ព័ត៌មានអន្ដរជាតិ៦ ថ្ងៃ agoអាមេរិកបើកការវាយប្រហារលើអ៊ីរ៉ង់ ២ថ្ងៃជាប់គ្នា ដោយចោទទីក្រុងតេហេរ៉ង់ថា រំលោភលើកិច្ចព្រមព្រៀង