លាក់តួលេខមនុស្សស្លាប់ហើយ រដ្ឋាភិបាលថៃ ថែមទាំងមិនសូវជួយសម្អាតកាកសំណល់ពីទឹកជំនន់នៅ ហាតយ៉ៃ ទៀត

អ្នកស្រុក ហាតយ៉ៃ កំពុងផ្ទុះកំហឹងជាមួយរដ្ឋាភិបាលថៃ ព្រោះថា ក្រៅពីលាក់តួលេខមនុស្សស្លាប់ក្នុងគ្រោះទឹកជំនន់ហើយនោះ រដ្ឋថែមទាំងមិនសូវគិតគូរខិតខំជួយបោសសម្អាតទៀតផង ដល់ថ្នាក់ឥឡូវសូម្បីព្រឹទ្ធសមាជិកក៏ចេញមុខស្តីបន្ទោសផងដែរ។

តាមការផ្សាយរបស់ Bangkok Post នៅថ្ងៃអង្គារទី៩ខែធ្នូឆ្នាំ២០២៥ សមាជិកសភា Chaiyong Maneerungsakul បានរិះគន់ខ្លាំងៗដល់រដ្ឋាភិបាលទីក្រុងបាងកក ដែលធ្វើការយឺតយ៉ាវក្នុងការបោសសម្អាតកាកសំណល់ពីទឹកជំនន់នៅ ហាតយ៉ៃ ទុកឲ្យសំរាមនៅសល់ចោល គរដូចភ្នំ។

ដំបូង អាជ្ញាធរប៉ាន់ស្មានថា ទឹកជំនន់បានបង្កើតកាកសំណល់ប្រមាណ ២០០ ០០០ តោន ប៉ុន្តែឥឡូវកម្មករក្រុងនិងអ្នកជំនាញជឿថា តួលេខពិតប្រាកដគឺជិតដល់ ១លានតោនឯណោះ។

តាមការអះអាងរបស់លោក, កាកសំណល់បានបង្កហានិភ័យខ្លាំងណាស់ដល់សុខភាពប្រជាជន ជាពិសេសហានិភ័យធំបំផុតអំពីសុវត្ថិភាពមុនពេលព្យុះភ្លៀងវាយប្រហារនៅថ្ងៃ១៤ធ្នូខាងមុខនេះ។

សូមជម្រាបជាថ្មី ផ្អែកលើទិន្នន័យផ្លូវការចុងក្រោយពីអាជ្ញាធរថៃ, តួលេខមនុស្សស្លាប់ដោយសារគ្រោះទឹកជំនន់ដ៏សាហាវនៅភាគខាងត្បូងប្រទេស គឺមានចំនួន២៦៧នាក់។

លើសពីនេះ នាយកដ្ឋានបង្ការនិងកាត់បន្ថយគ្រោះមហន្តរាយថៃ បានចេញរបាយការណ៍ថា មនុស្ស ២៣៦ ៣៧៥នាក់ កំពុងបន្តរងផលប៉ះពាល់។

ទឹកជំនន់នៅតែបង្កទុក្ខលំបាកនៅឡើយដល់ដល់ពលរដ្ឋ ៨៤ ៤៥០គ្រួសារនៅភូមិចំនួន៥៣៤ នៃ១០១ឃុំ ក្នុង២២ស្រុក របស់ខេត្តចំនួន៥ ដូចជា៖ Surat Thani, Nakhon Si Thammarat, Trang, Phatthalung និង Songkhla៕

អត្ថបទ៖ សុខ សុវណ្ណ