អាមេរិកបញ្ជូន «កងនាវា​ចម្បាំង​»បន្ថែម​ទៀត ទៅកាន់តំបន់មជ្ឈិមបូព៌ា គំរាម​អ៊ីរ៉ង់

ប្រធានាធិបតី​អាមេរិក ដូណាល់ ត្រាំ បានប្រកាស​នា​ថ្ងៃពុធ​ទី​២៨​ខែ​មករា​ឆ្នាំ​២០២៦​នេះ​​ថា កងនាវា​ចម្បាំង​​​បន្ថែម​ទៀត​កំពុងធ្វើដំណើរឆ្ពោះទៅកាន់ប្រទេសអ៊ីរ៉ង់ ដោយលោកបានហៅ​​ថាជា «កងទ័ពជើងទឹកដ៏អស្ចារ្យ» ដែលមានបំណងដាក់សម្ពាធលើទីក្រុងតេហេរ៉ង់ ឲ្យចូលមកចរចាលើកិច្ចព្រមព្រៀងការទូតថ្មី។

យោង​តាម Jerusalem Post ថ្លែងនៅក្នុងរដ្ឋ Iowa លោកប្រធានាធិបតីបានរំលឹកដល់ «ប្រតិបត្តិការ Midnight Hammer» កាលពីខែមិថុនា ឆ្នាំ២០២៥ ដែលលោកបានអះអាងថា បានបំផ្លាញសមត្ថភាពនុយក្លេអ៊ែររបស់អ៊ីរ៉ង់ ខណៈដែលប្រទេសនេះត្រូវបានគេរាយការណ៍ថា ជិតនឹងសម្រេចបាននូវការផលិតអាវុធនុយក្លេអ៊ែរ។ លោកត្រាំ បានសម្តែងក្តីសង្ឃឹមថា វត្តមានយោធាដែលកើនឡើងនេះ នឹងនាំទៅរកការសម្រេចបានកិច្ចព្រមព្រៀងមួយ ដោយលោកបញ្ជាក់ថា អ៊ីរ៉ង់គួរតែធ្វើការចរចាតាំងពីឱកាសលើកមុនៗមកម្ល៉េះ។

ការបង្កើនកម្លាំងជើងទឹកនេះ គឺផ្តោតសំខាន់លើក្រុមនាវាផ្ទុកយន្តហោះចម្បាំង USS Abraham Lincoln ដែលបានធ្វើដំណើរមកដល់មហាសមុទ្រឥណ្ឌា ស្ថិតក្នុងតំបន់ទទួលខុសត្រូវរបស់បញ្ជាការដ្ឋានកណ្តាលសហរដ្ឋអាមេរិក (CENTCOM)។ យោងតាមរបាយការណ៍យោធា ក្រុមនាវាចម្បាំងនេះរួមមាននាវាពិឃាត និងយន្តហោះចម្បាំង ដែលត្រៀមលក្ខណៈរួចជាស្រេចសម្រាប់ឆ្លើយតបទៅនឹងស្ថានភាពអាសន្នផ្សេងៗ។

កាលពីថ្ងៃអង្គារ CENTCOM បានបញ្ជាក់ថា ខ្លួនកំពុងចាប់ផ្តើមធ្វើសមយុទ្ធត្រៀមលក្ខណៈរយៈពេលច្រើនថ្ងៃ ដើម្បីពង្រឹងសមត្ថភាពក្នុងការដាក់ពង្រាយបុគ្គលិក និងគ្រឿងយុទ្ធោបករណ៍​ឲ្យបានឆាប់រហ័សនៅទូទាំងតំបន់។ សមយុទ្ធទាំងនេះមានគោលបំណងបង្ហាញពីវត្តមាន «ដែលគួរឲ្យទុកចិត្ត និងត្រៀមខ្លួនជាស្រេចសម្រាប់ការប្រយុទ្ធ» ដើម្បីទប់ស្កាត់ការឈ្លានពានដែលអាចកើតមាន និងផ្តល់ទំនុកចិត្តដល់ដៃគូក្នុងតំបន់ បន្ទាប់ពីមានកិច្ចពិភាក្សាការពារជាតិកម្រិតខ្ពស់រវាងថ្នាក់ដឹកនាំយោធាសហរដ្ឋអាមេរិក និងអ៊ីស្រាអែល៕

ប្រែសម្រួល៖ ឈាង