ព័ត៌មានអន្ដរជាតិ

ដូចអារ៉ាប់រួម! អារ៉ាប៊ីសាអូឌីត ប្រកាសមិនឲ្យអាមេរិកប្រើដែនដីខ្លួន វាយអ៊ីរ៉ង់ទេ

បានផុស

៥ ខែ មុន

នៅ

ថ្ងៃពុធ ២៨ មករា ២០២៦

ដោយ

Chheang

ព្រះអង្គម្ចាស់ Mohammed bin Salman រជ្ជទាយាទនៃព្រះរាជាណាចក្រអារ៉ាប៊ីសាអូឌីត បានទូរសព្ទជម្រាបជូនលោក Masoud Pezeshkian ប្រធានាធិបតីអ៊ីរ៉ង់ ថា អារ៉ាប៊ីសាអូឌីតនឹងមិនអនុញ្ញាតឲ្យមានការប្រើប្រាស់ដែនអាកាស ឬទឹកដីរបស់ខ្លួន សម្រាប់សកម្មភាពយោធាប្រឆាំងនឹងប្រទេសអ៊ីរ៉ង់ឡើយ។

*ព្រះអង្គម្ចាស់ Mohammed bin Salman និងលោក Masoud Pezeshkian (រូបថត៖ Reuters)*

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចសន្ទនាដែលត្រូវបានចុះផ្សាយដោយទីភ្នាក់ងារព័ត៌មានរដ្ឋ SPA កាលពីថ្ងៃអង្គារទី២៧ខែមករាឆ្នាំ២០២៦ ព្រះអង្គម្ចាស់រជ្ជទាយាទបានសង្កត់ធ្ងន់លើការប្តេជ្ញាចិត្តរបស់ទីក្រុងរីយ៉ាដ ក្នុងការដោះស្រាយជម្លោះក្នុងតំបន់តាមរយៈកិច្ចសន្ទនាបែបការទូត ដើម្បីរក្សាស្ថិរភាពនៅមជ្ឈិមបូព៌ា។ ចំណាត់ការនេះ បានធ្វើឡើងបន្ទាប់ពីមានការប្រកាសស្រដៀងគ្នាពីប្រទេសអារ៉ាប់រួម ដែលឆ្លុះបញ្ចាំងពីកិច្ចខិតខំប្រឹងប្រែងសម្របសម្រួលគ្នារបស់បណ្តាប្រទេសក្នុងតំបន់ឈូងសមុទ្រ ដើម្បីដកខ្លួនចេញពីជម្លោះដែលអាចកើតមានរវាងទីក្រុងវ៉ាស៊ីនតោន និងទីក្រុងតេហេរ៉ង់។

ជាការឆ្លើយតប លោក Pezeshkian បានស្វាគមន៍ចំពោះក្របខ័ណ្ឌច្បាប់ណាមួយដែលអាចបង្ការសង្គ្រាម ទោះបីជាអ៊ីរ៉ង់នៅតែបន្តប្រឈមមុខនឹងការពិនិត្យពិច័យពីអន្តរជាតិ ចំពោះការដោះស្រាយភាពចលាចលក្នុងស្រុក ដែលក្រុមសិទ្ធិមនុស្សចាត់ទុកថាជាការបង្ក្រាបដ៏ធ្ងន់ធ្ងរបំផុតចាប់តាំងពីឆ្នាំ១៩៧៩មក។

ការទាក់ទងតាមផ្លូវការទូតនេះ បានកើតឡើងចំពេលដែលភាពមិនច្បាស់លាស់ក្នុងតំបន់មានការកើនឡើង បន្ទាប់ពីសេចក្តីថ្លែងការណ៍របស់ប្រធានាធិបតីអាមេរិក ដូណាល់ ត្រាំ ដែលកាលពីពេលថ្មីៗបានព្រមានអំពីការបញ្ជូនកងនាវាចម្បាំងទៅកាន់មជ្ឈិមបូព៌ា។ លោកត្រាំបានបញ្ជាក់ថា វត្តមានយោធានេះគឺជាការរារាំងប្រឆាំងនឹងការចាប់ផ្តើមឡើងវិញនៃកម្មវិធីនុយក្លេអ៊ែររបស់អ៊ីរ៉ង់ និងការបង្ក្រាបការតវ៉ាក្នុងស្រុក។ បើតាមការបញ្ជាក់ពីមន្ត្រីអាមេរិកពីររូបតាមរយៈទីភ្នាក់ងារព័ត៌មានរ៉យទ័រកាលពីថ្ងៃចន្ទ កងនាវាផ្ទុកយន្តហោះចម្បាំងរបស់អាមេរិក ដែលក្នុងនោះមានទាំងនាវាផ្ទុកយន្តហោះ USS Abraham Lincoln បានទៅដល់ក្នុងតំបន់រួចរាល់ហើយ៕

ប្រែសម្រួល៖ ឈាង