ព័ត៌មានអន្ដរជាតិ

ក្រោយអង់គ្លេសមិនចូលរួមជាមួយអាមេរិក-អ៊ីស្រាអែល វាយអ៊ីរ៉ង់ ត្រាំបង្ហាញការខកចិត្ត

បានផុស

៤ ខែ មុន

នៅ

ថ្ងៃអង្គារ ៣ មីនា ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ សម្តែងការសោកស្តាយចំពោះទំនាក់ទំនងខ្លួនជាមួយចក្រភពអង់គ្លេសមិនដូចអ្វីធ្លាប់តែល្អជាមួយគ្នាពីមុនមក បន្ទាប់ពីនាយករដ្ឋមន្ត្រីអង់គ្លេស លោក Keir Starmer ពន្យារពេលផ្តល់ការគាំទ្រផ្នែកយោធាដល់ការវាយប្រហារប្រឆាំងនឹងអ៊ីរ៉ង់។ នេះបើយោងតាមរ៉យទ័រ ចុះផ្សាយថ្ងៃទី៣ ខែមីនា ឆ្នាំ២០២៦ ។

លោក ត្រាំ និយាយថា៖ «ប្រទេសបារាំងបានគាំទ្រយើងច្រើនជាងមុន។ យើងមិនដែលរំពឹងថានឹងឃើញទំនាក់ទំនងដ៏រឹងមាំបំផុតដែលធ្លាប់តែល្អកន្លងមក ផ្លាស់ប្តូរតាមរបៀបនេះទេ»។

ប្រធានាធិបតីសហរដ្ឋអាមេរិក លោក ដូណាល់ ត្រាំ ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ ប្រាប់កាសែត The Sun កាលពីថ្ងៃអង្គារថា៖ « វាពិតជាគួរឱ្យសោកស្ដាយណាស់ដែលឃើញថាទំនាក់ទំនងនេះជាក់ស្តែង មិនដូចអ្វីដែលវាមានពីមុនទេ»។ នេះជាបទសម្ភាសន៍លើកទីពីររបស់លោកទៅកាន់កាសែតអង់គ្លេសក្នុងរយៈពេលប៉ុន្មានថ្ងៃ ដែលខ្លួនបានរិះគន់មេដឹកនាំអង់គ្លេស។

យ៉ាងណាមិញ លោក Starmer បានលើកឡើងកាលពីថ្ងៃអាទិត្យថា លោកនឹងអនុញ្ញាតឱ្យសហរដ្ឋអាមេរិកប្រើប្រាស់មូលដ្ឋានយោធាអង់គ្លេសសម្រាប់ការវាយប្រហារការពារខ្លួន បន្ទាប់ពីមូលដ្ឋានទាំងនោះមិនបានប្រើប្រាស់ក្នុងការវាយប្រហារដំបូងលើអ៊ីរ៉ង់។ ប៉ុន្តែនៅថ្ងៃចន្ទអង់គ្លេសប្រកាសថានឹងមិនចូលរួមក្នុងជម្លោះរវាងអាមេរិក និងអ៊ីស្រាអែល លើអ៊ីរ៉ង់ទេ បន្ទាប់ពីយន្តហោះគ្មានមនុស្សបើកអ៊ីរ៉ង់មួយគ្រឿងបានហោះតម្រង់ទៅកាន់មូលដ្ឋានទ័ពអាកាសអង់គ្លេសនៅ Cyprus ។

លោកត្រាំបន្តថា៖ « សហរដ្ឋអាមេរិកមិនត្រូវការឱ្យអង់គ្លេសធ្វើសង្គ្រាមនៅមជ្ឈិមបូព៌ាទេ។ វាមិនមានបញ្ហាអ្វីទេ ប៉ុន្តែ(លោក Starmer) គួរតែបានជួយ […] គាត់គួរតែបានជួយ។ ខ្ញុំចង់មានន័យថា បារាំងពិតជាអស្ចារ្យណាស់។ ពួកគេទាំងអស់គ្នាសុទ្ធតែអស្ចារ្យ។ ចក្រភពអង់គ្លេសមានភាពខុសប្លែកពីប្រទេសដទៃទៀត»។

ចំណែករដ្ឋមន្ត្រីជាន់ខ្ពស់អង់គ្លេស លោក Darren Jones បានប្រាប់ Times Radio ឆ្លើយតបទៅនឹងការអត្ថាធិប្បាយចុងក្រោយរបស់ លោក ត្រាំ ថា ទំនាក់ទំនងរវាងសហរដ្ឋអាមេរិក និងចក្រភពអង់គ្លេសនៅតែមានសារៈសំខាន់៕

ប្រែសម្រួល៖ ណឺ មិនា