ព័ត៌មានអន្ដរជាតិ

លោក ត្រាំ ប្តូរចិត្ត ដោយអនុញ្ញាតឱ្យរុស្ស៊ីដឹកប្រេងចូលប្រទេសគុយបា

បានផុស

៤ ខែ មុន

នៅ

ថ្ងៃចន្ទ ៣០ មីនា ២០២៦

ដោយ

ប្រធានាធិបតីអាមេរិក លោក ដូណាល់ ត្រាំ បង្ហាញសញ្ញាបញ្ច្រាសទិសលើការរារាំងនាវាដឹកប្រេងនានាទៅកាន់ប្រទេសគុយបាកាលពីថ្ងៃអាទិត្យ ដោយលើកឡើងថា «គ្មានបញ្ហា» ជាមួយប្រទេសណាដែលបញ្ជូនប្រេងចូលប្រទេសកោះនេះនោះទេ ខណៈនាវាដឹកប្រេងរបស់រុស្ស៊ីមួយគ្រឿងបានចូលទៅជិតកំពង់ផែគុយបា។ នេះបើយោងតាមរ៉យទ័រផ្សាយថ្ងៃទី៣០ ខែមីនា ឆ្នាំ២០២៦ ។

ថ្លែងទៅកាន់អ្នកយកព័ត៌មាននៅលើយន្តហោះ Air Force One លោក ត្រាំ សម្តែងភាពអាណិតអាសូរ ចំពោះតម្រូវការថាមពលរបស់ប្រជាជនគុយបានិងលើកឡើងថា លោកមិនខ្វល់ពីជំនួយណាមួយដែលផ្តល់ដល់រដ្ឋាភិបាលកុម្មុយនីស្តទីក្រុងហាវ៉ាណាទេ ព្រោះលោកព្យាករណ៍ថា សេដ្ឋកិច្ចប្រទេសនេះនឹងដួលរលំដោយខ្លួនឯងក្នុងពេលឆាប់ៗ។

ប្រធានាធិបតីអាមេរិក លោក ដូណាល់ ត្រាំ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ និយាយថា៖ «ឥឡូវនេះប្រសិនបើប្រទេសណាមួយចង់បញ្ជូនប្រេងមួយចំនួនទៅកាន់ប្រទេសគុយបា ខ្ញុំមិនមានបញ្ហាជាមួយទេ មិនថាវាជាប្រទេសរុស្ស៊ីឬប្រទេសណានោះទេ»។

ប្រធានាធិបតីអាមេរិករូបនេះបន្តថា៖ « ប្រទេសគុយបាចប់ហើយ។ ពួកគេមានរបបអាក្រក់! មានថ្នាក់ដឹកនាំអាក្រក់ និងពុករលួយខ្លាំងណាស់ ហើយបើថាពួកគេទទួលបានប្រេងឬអត់ វាមិនមានបញ្ហាទេ។ ខ្ញុំចង់ឱ្យប្រេងចូល មិនថាជារុស្ស៊ីឬអ្នកណាផ្សេងទៀតទេ ព្រោះប្រជាជនត្រូវការកម្ដៅ ភាពត្រជាក់និងរបស់ផ្សេងទៀតដែលពួកគេចង់បាន»។

នាវារុស្ស៊ីដែលត្រូវបានហាមឃាត់ជាផ្នែកមួយនៃ «កងនាវាស្រមោល» របស់ទីក្រុងម៉ូស្គូ គឺនៅឆ្ងាយពីឆ្នេរសមុទ្រភាគខាងកើតប្រទេសគុយបាកាលពីថ្ងៃអាទិត្យ។ នេះបើយោងតាមទិន្នន័យតាមដានកប៉ាល់ តែគេរំពឹងថានឹងទៅដល់កំពង់ផែគុយបានៅថ្ងៃចន្ទ វាជាខ្សែជីវិតសម្រាប់សេដ្ឋកិច្ចក្នុងប្រទេសនិងស្ទើរតែឈប់ដំណើរការក្រោមការបិទផ្លូវប្រេងរបស់ទីក្រុងវ៉ាស៊ីនតោន។

គួរបញ្ជាក់ថាសហរដ្ឋអាមេរិកបានកាត់ផ្តាច់ការនាំចេញប្រេងរបស់វ៉េណេស៊ុយអេឡាទៅកាន់ប្រទេសគុយបា បន្ទាប់ពីផ្តួលរំលំប្រធានាធិបតី លោក នីកូឡាស ម៉ាឌូរ៉ូ (Nicolas Maduro) នៅថ្ងៃទី០៣ ខែមករា ហើយ លោក ត្រាំ បានគំរាមដាក់ទណ្ឌកម្មពន្ធលើប្រទេសដទៃទៀតដែលបញ្ជូនប្រេងឆៅទៅកាន់កោះនេះ។

មិនតែប៉ុណ្ណោះប្រទេសគុយបាមិនបានទទួលនាវាដឹកប្រេងអស់បីខែមកហើយ នេះបើយោងតាមប្រធានាធិបតីគុយបា លោក Miguel Diaz-Canel ជាពិសេសធ្វើឱ្យប្រទេសនេះមានវិបត្តិថាមពលកាន់តែធ្ងន់ធ្ងរ៕

ប្រែសម្រួល៖ ណឺ មិនា