ព័ត៌មានអន្ដរជាតិ

ចិនព្រួយបារម្ភខ្លាំងពីការស្ទាក់ចាប់កប៉ាល់ដឹកទំនិញរបស់អ៊ីរ៉ង់ ដោយយោធាអាមេរិក

បានផុស

៣ ខែ មុន

នៅ

ថ្ងៃចន្ទ ២០ មេសា ២០២៦

ដោយ

ប្រទេសចិនបានសម្តែងការព្រួយបារម្ភចំពោះការស្ទាក់ចាប់កប៉ាល់ដឹកទំនិញដែលមានទង់ជាតិអ៊ីរ៉ង់ដោយបង្ខំរបស់សហរដ្ឋអាមេរិក និងជំរុញឱ្យភាគីពាក់ព័ន្ធគោរពតាមកិច្ចព្រមព្រៀងឈប់បាញ់ដោយការទទួលខុសត្រូវ។ នេះបើតាមអ្នកនាំពាក្យក្រសួងការបរទេសចិនលើកឡើងកាលពីថ្ងៃចន្ទ ទី២០ ខែមេសា ឆ្នាំ២០២៦ ។

យោងតាមភ្នាក់ងារសារព័ត៌មានរ៉យទ័រ អ្នកនាំពាក្យប្រទេសក្រួសងការបរទេសចិន លោក Guo Jiakun បានថ្លែងអំឡុងពេលសន្និសីទសារព័ត៌មានប្រចាំថ្ងៃថា៖ « ស្ថានភាពនៅច្រកសមុទ្រ Hormuz គឺមានភាពរសើប និងស្មុគស្មាញខ្លាំង។ ភាគីពាក់ព័ន្ធគួរតែជៀសវាង ភាពតានតឹងបន្ថែមទៀត និងបង្កើតលក្ខខណ្ឌចាំបាច់សម្រាប់ការដឹកជញ្ជូនឆ្លងកាត់ច្រកសមុទ្រនេះធម្មតាឡើងវិញ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីយ៉ាងណា សហរដ្ឋអាមេរិក បាននិយាយថា ទីក្រុងវ៉ាស៊ីនតោនបានបាញ់ប្រហារនិងរឹបអូសកប៉ាល់ដឹកទំនិញអ៊ីរ៉ង់មួយគ្រឿងព្យាយាមបើកចូលកំពង់ផែអ៊ីរ៉ង់ ដែលត្រូវបិទដោយយោធាអាមេរិក។

ចំណែកយោធាអ៊ីរ៉ង់វិញ បានលើកឡើងថា៖ «កប៉ាល់នេះបានធ្វើដំណើរពីប្រទេសចិន និងសន្យាថា នឹងសងសឹកប្រឆាំងនឹងចោរសមុទ្រប្រដាប់អាវុធដោយយោធាអាមេរិក»។

មិនតែប៉ុណ្ណោះនៅថ្ងៃចន្ទ ទីក្រុងប៉េកាំងក៏បានជំរុញឱ្យភាគីពាក់ព័ន្ធបន្តរក្សាសន្ទុះនៃបទឈប់បាញ់ និងការចរចា។

លោក Guo បន្ថែមថា៖ «ឥឡូវនេះ! បង្អួចសម្រាប់សន្តិភាពបានបើកហើយ ចំណែកលក្ខខណ្ឌអំណោយផលគួរតែត្រូវបានបង្កើតឡើង ដើម្បីបញ្ចប់សង្គ្រាមឱ្យបានឆាប់តាមដែលអាចធ្វើទៅបាន»៕