អាមេរិក បិទស្ថានកុងស៊ុលនៅខេត្ត​​ភាគពាយព្យ​​ ប៉ាគីស្ថាន ដោយសារកត្តា​អសន្តិសុខ

ក្រសួងការបរទេស​សហរដ្ឋអាមេរិក បានបញ្ជាក់នៅក្នុងសេចក្តីថ្លែងការណ៍មួយ ដែលបានចេញផ្សាយកាលពីថ្ងៃអង្គារ ទី៥ ខែឧសភា ថា សហរដ្ឋអាមេរិកនឹងបិទស្ថានកុងស៊ុលរបស់ខ្លួននៅក្នុងទីក្រុង Peshawar ស្ថិតនៅភាគ​ពាយព្យ​​នៃ​​ប្រទេសប៉ាគីស្ថាន ដោយលើកឡើងពីហេតុផល​ជុំវិញ​​អសុវត្ថិភាពរបស់អ្នកការទូតរបស់ខ្លួន។ នេះបើយោងតាមទីភ្នាក់ងារសារព័ត៌មាន Reuters ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេស បានបញ្ជាក់ថា ស្ថានទូតសហរដ្ឋអាមេរិកប្រចាំទីក្រុងអ៊ីស្លាម៉ាបាដ (Islamabad) នឹងទទួលបន្ទុកលើរាល់កិច្ចការទំនាក់ទំនងការទូតទាំងអស់ជាមួយខេត្ត Khyber Pakhtunkhwa ដែលមានទីក្រុង Peshawar ​ស្ថិតរួម​ក្នុង​ខេត្ត​នោះ​​។

សេចក្តីថ្លែងការណ៍ ​​​​ក៏បានអះអាង​ថា « ការសម្រេចចិត្តនេះឆ្លុះបញ្ចាំងពីការប្តេជ្ញាចិត្តរបស់យើងចំពោះសុវត្ថិភាពនៃបុគ្គលិកការទូត និងការគ្រប់គ្រងធនធានឲ្យមានប្រសិទ្ធភាព។

សូមជម្រាបជូនថា ខេត្ត Khyber Pakhtunkhwa មានព្រំប្រទល់ជាប់នឹងប្រទេសអាហ្វហ្គានីស្ថាន ហើយបានឆ្លងកាត់ការវាយប្រហារ និងការប្រយុទ្ធគ្នាយ៉ាងខ្លាំងក្លារវាងកងកម្លាំងប៉ាគីស្ថាន និងក្រុមសកម្មប្រយុទ្ធដែលទីក្រុងអ៊ីស្លាម៉ាបាដអះអាងថា មានការគាំទ្រពីក្រោយដោយអាហ្វហ្គានីស្ថាន។

យ៉ាងហោចណាស់ មនុស្ស ១០ នាក់បានស្លាប់កាលពីខែមីនា នៅពេលដែលក្រុមបាតុករបានទម្លាយរបងខាងក្រៅនៃស្ថានកុងស៊ុលសហរដ្ឋអាមេរិក ក្នុងទីក្រុង Karachi ដែលជាទីក្រុងធំបំផុតរបស់ប៉ាគីស្ថាន បន្ទាប់ពីមេដឹកនាំកំពូលរបស់អ៊ីរ៉ង់ លោក Ayatollah Ali Khamenei ត្រូវបានសម្លាប់ នៅក្នុងការវាយប្រហារលើប្រទេសអ៊ីរ៉ង់៕

អត្ថបទ៖ សាង ស្រីល័ក្ខ