អេបូឡា នៅកុងហ្គោ រាលដាល ដល់តំបន់សុខាភិបាលថ្មីៗ ខណៈការឆ្លងកើនដល់ ៦៧៦ករណី និងស្លាប់ ១៣៦នាក់ 

ស្ថានការណ៍ជំងឺអេបូឡា នៅសាធារណរដ្ឋប្រជាធិបតេយ្យកុងហ្គោ កាន់តែធ្ងន់ធ្ងរ ដោយឥឡូវ ជំងឺនេះ បានរីករាលដាល ទៅដល់តំបន់សុខាភិបាលថ្មីៗបន្ថែមទៀតហើយ នៅក្នុងប្រទេស។

Reuters បានដកស្រង់របាយការណ៍ របស់ក្រសួងសុខាភិបាលកុងហ្គោ ដែលបញ្ចេញនៅថ្ងៃសុក្រ ទី១២ ខែមិថុនា ឆ្នាំ២០២៦ ថា ពេលនេះ ជំអឺអេបូឡា បានរាលដាលដល់តំបន់សុខាភិបាល ២បន្ថែមទៀត នៅក្នុងខេត្ត North Kivu និង Ituri។

ជាមួយនឹងព័ត៌មាន ដ៏គួរឲ្យបារម្ភនេះ ក្រសួងសុខាភិបាលកុងហ្គោ ក៏បញ្ជាក់ដែរថា តួលេខមនុស្សឆ្លងផ្លូវការ បានកើនដល់ ៦៧៦នាក់ហើយ ខណៈ ១៣៦នាក់ បាត់បង់ជីវិត។

តំបន់សុខាភិបាល នៅក្នុងប្រព័ន្ធថែទាំសុខភាពរបស់កុងហ្គោ មានជាង ៥០០ តំបន់ ដែលមានបណ្តាញគ្លីនិក និងមន្ទីរពេទ្យបង្អែក ដោយផ្តល់សេវា ជូនប្រជាពលរដ្ឋ ចន្លោះពី ១០០ ០០០ ទៅ ១៥០,០០០ នាក់។

ជំងឺអេបូឡា ដែលកំពុងផ្ទុះខ្លាំងនៅកុងហ្គោ នាពេលបច្ចុប្បន្ន គឺបង្កឡើងដោយវីរុសប្រភេទកម្រ ឈ្មោះ ​Bundibugyo ដែលគ្មានវ៉ាក់សាំងណាកម្ចាត់បាន និងមានសមត្ថភាព សម្លាប់ ១ភាគ៣ នៃអ្នកដែលឆ្លង។

វាឆ្លងពីសត្វមកមនុស្ស តាមរយៈការប៉ះពាល់ផ្ទាល់ជាមួយឈាម សារធាតុរាវ ឬសរីរាង្គនៃសត្វព្រៃ ដែលផ្ទុកមេរោគ ដូចជា ប្រចៀវ ស្វា ឬសត្វឈ្លូស។ ចំណែក ការឆ្លងពីមនុស្សទៅមនុស្ស គឺឆ្លងតាមរយៈការប៉ះពាល់ផ្ទាល់ជាមួយ ឈាម ឬសារធាតុរាវរាងកាយ ដូចជាទឹកមាត់របស់អ្នកជំងឺ ឬអ្នកដែលស្លាប់ ដោយសារ អេបូឡា។

រោគសញ្ញារបស់វា មានដូចជា គ្រុនក្តៅខ្លាំង អស់កម្លាំងខ្លាំង ឈឺសាច់ដុំ ឈឺក្បាល និងឈឺបំពង់ក។ ដំណាក់កាលធ្ងន់ធ្ងរ វាបណ្តាលឲ្យក្អួត រាករូស មានកន្ទួលលើស្បែក ខូចតម្រងនោម និងថ្លើមចុះខ្សោយ។ ក្នុងករណីខ្លះ មានទាំងហូរឈាម តាមអញ្ចាញធ្មេញ លាមក ឬស្បែកទៀតផង៕

អត្ថបទ៖ សុខ សុវណ្ណ