លោក ត្រាំ ថា បញ្ហា​​អ៊ីរ៉ង់ ឈាន​ដល់​ដំណាក់កាល​ចុងក្រោយ​ និង​ប្រកាស​ផ្ដល់​ជម្រើស​ចំនួន​ពីរ

លោក ដូណាល់ ត្រាំ បានថ្លែង កាល​ពី​ថ្ងៃទី​ពុធ ថា បច្ចុប្បន្ន បញ្ហាជាមួយអ៊ីរ៉ង់ បានឈានចូលដល់ដំណាក់កាលចុងក្រោយហើយ​ ពោល​គឺ​សល់ពេលតែ ​២ ទៅ ៣ថ្ងៃទៀត​ប៉ុណ្ណោះ ដោយលោកបានទុកជម្រើសពីរ គឺការព្រមព្រៀងគ្នាតាមផ្លូវការទូត ឬក៏ត្រូវប្រឈមមុខនឹងវិធានការតឹងរ៉ឹងបំផុត ប៉ុន្តែលោកសង្ឃឹមថា រឿងរ៉ាវអាក្រក់ នឹងមិនកើតឡើងនោះទេ ដោយ​លោក​ចង់ឃើញការបាត់បង់ជីវិតមនុស្សតិចតួចបំផុត ឬមិនមានទាល់តែសោះ ប្រសិនបើអាចធ្វើទៅបាន។ នេះ​បើ​យោង​តាមការ​ចុះផ្សាយ​របស់​សារព័ត៌មាន North West Star នាថ្ងៃព្រហស្បតិ៍ ទី​២១ ខែ​​ឧសភា ឆ្នាំ​២០២៦។

ស្របពេលជាមួយគ្នានេះ លោក ត្រាំ ក៏ទើប​តែ​បានជួបពិភាក្សាតាមទូរស័ព្ទជាមួយប្រធានាធិបតីតួកគី លោក Tayyip Erdogan ដែលជាអ្នកគាំទ្រដល់ការបន្តបទឈប់បាញ់ និងបានបង្ហាញការយល់ឃើញថា ដំណោះស្រាយប្រកបដោយហេតុផលមួយ គឺអាចទៅរួចសម្រាប់វិបត្តិសង្គ្រាម​នេះ។ ប៉ុន្តែផ្ទុយទៅវិញ ខាងភាគីអ៊ីរ៉ង់ ហាក់មិនទាន់មានទំនុកចិត្តឡើយ ដោយលោក Mohammad Baqer Qalibaf ប្រធានសភា និងជាអ្នកចរចាសន្តិភាពកំពូលរបស់អ៊ីរ៉ង់ បានផ្ញើសារជាសំឡេងលើបណ្តាញសង្គមថា សកម្មភាពទាំងចំហ និងលាក់កំបាំងរបស់សត្រូវ បានបង្ហាញថា អាមេរិកកំពុងត្រៀមបើកការវាយប្រហារថ្មីៗបន្ថែមទៀត។

ទោះជាយ៉ាងណា ប្រធានាធិបតីអ៊ីរ៉ង់ លោក Masoud Pezeshkian បានអះអាងថា ក្រុងតេហេរ៉ង់នៅតែបើកចំហទ្វារចរចា ប៉ុន្តែលោកបានសង្កត់ធ្ងន់លើបណ្តាញសង្គម X ថា ការគាបសង្កត់ ដើម្បីបង្ខំឱ្យអ៊ីរ៉ង់ចុះចាញ់ គឺគ្រាន់តែជាការយល់សប្តិរបស់អាមេរិកប៉ុណ្ណោះ។ ស្របគ្នានេះ អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei ក៏បានលើកឡើងដែរថា អ៊ីរ៉ង់ចូលរួមចរចាដោយភាពម៉ឺងម៉ាត់ និងស្មោះត្រង់ ប៉ុន្តែពួកគេនៅតែមានការសង្ស័យយ៉ាងខ្លាំង ចំពោះទង្វើ និងចេតនាពិតប្រាកដរបស់អាមេរិក។

ដើម្បីជួយសម្របសម្រួលដល់វិបត្តិនេះ រដ្ឋមន្ត្រីក្រសួងមហាផ្ទៃប៉ាគីស្ថាន ដែលជាប្រទេសធ្លាប់ធ្វើជាម្ចាស់ផ្ទះរៀបចំការចរចាសន្តិភាពកន្លងមក បានធ្វើដំណើរទៅដល់ក្រុងតេហេរ៉ង់កាលពីថ្ងៃពុធ ដើម្បីធ្វើជាអ្នកនាំសាររវាងភាគីទាំងពីរ។ នៅក្នុងសប្តាហ៍នេះ អ៊ីរ៉ង់បានដាក់សំណើថ្មីមួយទៅកាន់អាមេរិក ប៉ុន្តែខ្លឹមសារនៃសំណើនោះ ត្រូវបានគេដឹងថាភាគច្រើនជាលក្ខខណ្ឌចាស់ៗ ដែលលោក ត្រាំ ធ្លាប់បានបដិសេធរួចទៅហើយ រួមមាន ការទាមទារគ្រប់គ្រងច្រកសមុទ្រហ័រមូស (Hormuz) ការទាមទារសំណងខូចខាតសង្គ្រាម ការដកទណ្ឌកម្ម ការបញ្ចេញ​ទ្រព្យសម្បត្តិ ដែលត្រូវបង្កក និងការដកទ័ពអាមេរិកចេញពីតំបន់។

កាលពីថ្ងៃអង្គារ លោក ត្រាំ ធ្លាប់បានបង្ហើបថា លោកស្ទើរតែបានបញ្ជាឱ្យមានការវាយប្រហារទៅលើអ៊ីរ៉ង់ទៅហើយ តែត្រូវ​ពន្យារពេល​វិញ ព្រោះ​មាន​ការស្នើសុំពីប្រទេសជិតខាងមួយចំនួន នៅតំបន់ឈូងសមុទ្រ។

គួរ​រំលឹក​ថា សង្គ្រាម​នេះ បានផ្ទុះឡើងខ្លាំង ចាប់តាំងពីមានការវាយប្រហាររួមគ្នារវាងអាមេរិក និងអ៊ីស្រាអែល កាលពីថ្ងៃទី២៨ ខែកុម្ភៈ ដែលធ្វើឱ្យអ៊ីរ៉ង់សម្រេចបិទច្រកសមុទ្រហ័រមូស ស្ទើរតែទាំងស្រុង និងបានបង្កឱ្យមានការរំខានដល់ការផ្គត់ផ្គង់ថាមពលពិភពលោកយ៉ាងធ្ងន់ធ្ងរបំផុត ក្នុងប្រវត្តិសាស្ត្រ។ យ៉ាង​ណាមិញ រដ្ឋមន្ត្រីក្រសួងហិរញ្ញវត្ថុអាមេរិក លោក Scott Bessent បានសម្តែងការជឿជាក់ថា អតិផរណា និងតម្លៃថាមពលដែលកំពុងហក់ឡើងខ្ពស់នេះ គឺជារឿងបណ្តោះអាសន្នប៉ុណ្ណោះ ហើយវានឹងវិលមកសភាពដើមវិញ នៅពេលសង្គ្រាមបញ្ចប់។ យោងតាមទិន្នន័យចុងក្រោយ ចំនួននាវាឆ្លងកាត់ច្រកសមុទ្រនេះ ចាប់ផ្តើមមានការកើនឡើងបន្តិចវិញ ដោយមាននាវា ២៦គ្រឿងបានឆ្លងកាត់ក្នុងរយៈពេល ២៤ម៉ោងចុងក្រោយ ប៉ុន្តែចំនួននេះនៅតែតិចតួចខ្លាំង បើធៀបនឹងចំនួន ១៤០គ្រឿងក្នុងមួយថ្ងៃ កាលពីមុនពេលមិនទាន់ផ្ទុះសង្គ្រាម៕

ប្រែសម្រួល៖ ឈាង