គិតត្រឹមពេលនេះ អ៊ីស្រាអែល បានវាយប្រហារតាមអាកាសលើទីតាំងតំបន់ហ្គាហ្សាជាង ១,៥០០ កន្លែង ខណៈអ្នកស្លាប់កើនឡើងជិត ២០០ នាក់

វាហាក់ដូចជាគ្មានសញ្ញាបញ្ចប់ ចំពោះការប្រទូសរ៉ាយដាក់គ្នា រវាងយោធាអ៊ីស្រាអែល និងក្រុមឥស្លាមជ្រុលនិយមហាម៉ាស ដែលគ្រប់គ្រងតំបន់ហ្គាហ្សាស្ទ្រីប ខណៈចំនួនអ្នកស្លាប់ ដោយសារការវាយប្រហាររបស់អ៊ីស្រាអែល នៅលើតំបន់ហ្គាហ្សា មានលើសពី ១៩០ នាក់ហើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាអ៊ីស្រាអែល បានធ្វើការវាយឆ្មក់តាមអាកាសដ៏ខ្លាំងក្លាជាបន្តបន្ទាប់ នៅលើតំបន់ហ្គាហ្សាចន្លោះយប់ថ្ងៃសៅរ៍ និងព្រឹកថ្ងៃអាទិត្យ ដោយសម្លាប់មនុស្ស ៤២ នាក់ ។ ការស្លាប់បន្ថែមនេះ នាំឲ្យចំនួនអ្នកស្លាប់សរុប នៅតំបន់ហ្គាហ្សា កើនដល់ ១៩៧ នាក់ក្នុងនោះមានកុមារ ៥៨ នាក់ ។

រហូតមកដល់ពេលនេះ កងកម្លាំងអ៊ីស្រាអែល បានធ្វើការវាយប្រហារតាមអាកាស លើទីតាំងជាង ១,៥០០ កន្លែង ខណៈពួកគេនិយាយថា ពាក់ព័ន្ធនឹងក្រុមហាម៉ាស ។

ទន្ទឹមនោះ នាយករដ្ឋមន្រ្តីអ៊ីស្រាអែលលោក Benjamin Netanyahu បានប្រាប់សន្និសីទសារព័ត៌មាន កាលពីថ្ងៃអាទិត្យថា ប្រទេសរបស់លោក មានការគាំទ្រពីសហរដ្ឋអាមេរិក ។

លោកបាននិយាយថា សកម្មភាពយោធារបស់អ៊ីស្រាអែល នឹងបន្តដរាបណា មានការស្តារសន្តិភាព និងសន្តិសុខ ដល់ប្រជាជនអ៊ីស្រាអែល ។

បន្ថែមពីនេះ ក្រុមហាម៉ាស ក៏បានធ្វើការវាយប្រហារតបតវិញផងដែរ ដោយបាញ់គ្រាប់រ៉ុកកែត ទៅលើតំបន់អ៊ីស្រាអែល និងបណ្ដាលឲ្យមនុស្ស ៩ នាក់បានស្លាប់នៅទីនោះ ។

អំពើហិង្សារវាងកងកម្លាំងអ៊ីស្រាអែល និងក្រុមហាម៉ាស ដែលបានផ្ទុះឡើងដំបូងកាលពីថ្ងៃទី ១០ ឧសភា ពេលនេះបានរីករាលដាល កាន់តែខ្លាំងឡើងៗ ខណៈមិនមានសញ្ញាណាមួយ នៃការធូរស្រាលភាពតានតឹងនោះទេ ទោះបីមានការអំពាវនាវ ម្តងហើយម្តងទៀតឲ្យមានភាពស្ងប់ស្ងាត់ ពីអង្គការសហប្រជាជាតិ និងប្រទេសផ្សេងៗក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ីស្រាអែល ដាក់មីស៊ីល ២ គ្រាប់ទៀត បំផ្លាញមណ្ឌលសុខភាពនៅតំបន់ហ្គាហ្សា ខ្ទេចស្ទើរគ្មានសល់ មិនឲ្យព្យាបាលអ្នករងរបួស

ចុចអាន ៖ លេងមែនទែនហើយ! នាយករដ្ឋមន្ត្រី អ៊ីស្រាអែល ថា ការវាយប្រហារទៅលើតំបន់ហ្គាហ្សា មិនទាន់ចប់ទេ ហើយមេដឹកនាំក្រុមហាម៉ាសគ្មានផ្លូវគេចរួចឡើយ