ក្តៅៗ កូរ៉េខាងត្បូង រកឃើញវីរុសបំប្លែងខ្លួនប្រភេទថ្មី ក្លាយពូជពី Delta

ទីភ្នាក់ងារគ្រប់គ្រងនិងបង្ការជំងឺកូរ៉េ (KDCA) បាននិយាយនៅថ្ងៃអង្គារទី៣ ខែសីហានេះថា ប្រទេសកូរ៉េខាងត្បូង បានរកឃើញករណីឆ្លងវីរុសបំប្លែងខ្លួនប្រភេទថ្មី Delta Plus ចំនួន២ករណីជាលើកដំបូង ខណៈប្រទេសនេះ កំពុងប្រយុទ្ធប្រឆាំងនឹងកូវីដរលកទី៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Delta Plus គឺជាពូជរបស់វីរុសបំប្លែងខ្លួនឥណ្ឌា Delta ហើយមានកំឡាយសរសៃប្រូតេអ៊ីនឈ្មោះ K417N ដែលកំឡាយនេះ ក៏ត្រូវបានគេរកឃើញនៅក្នុងវីរុសបំប្លែងខ្លួនអាហ្វ្រិកខាងត្បូង Beta ផងដែរ។

ទោះបីជាយ៉ាងណាក៏ដោយ គិតត្រឹមពេលនេះ ករណីវីរុស Delta Plus ត្រូវបានគេរកឃើញតិចតួចណាស់ ហើយប្រទេសដែលរាយការណ៍អំពីករណីវីរុសនេះមានដូចជា អង់គ្លេស ព័រទុយហ្គាល់ និងឥណ្ឌា។

KDCA បានប្រាប់រ៉យទ័រថា “ករណីដំបូងនៅកូរ៉េខាងត្បូង ត្រូវបានរកឃើញលើបុរសអាយុ ៤០ ឆ្នាំម្នាក់ ដែលមិនមានកំណត់ត្រាធ្វើដំណើរទៅបរទេសសោះ នាពេលថ្មីៗនេះ ខណៈករណីទី ២ ត្រូវបានរកឃើញនៅក្នុងខ្លួនអ្នកទេសចរបរទេសម្នាក់”។

អ្នកវិទ្យាសាស្ត្រខ្លះនិយាយថា វីរុសបំប្លែងខ្លួន Delta Plus ប្រហែលជាអាចចម្លងសាហាវជាង Delta ទៅទៀត៕

ប្រែសម្រួល៖ Vann Vann

ប្រភព៖ CNA