ព័ត៌មានអន្ដរជាតិ

អ្នកស្រុកគេងមិនលក់ បក់មិនល្ហើយ ខណៈ រញ្ជួយដីជាង៩០០ដងអង្រួនកោះ Tokara ប្រទេសជប៉ុន

បានផុស

១១ ខែ មុន

នៅ

ថ្ងៃព្រហស្បតិ៍ ៣ កក្កដា ២០២៥

ដោយ

ក្នុងរយៈពេលពីរសប្តាហ៍ចុងក្រោយនេះ ការរញ្ជួយដីតូចៗជាង ៩០០ ដងបានវាយប្រហារប្រជុំកោះ Tokara ដែលជាក្រុមកោះដាច់ស្រយាលនៅភាគខាងត្បូងប្រទេសជប៉ុន ធ្វើឱ្យអ្នកស្រុកគេងមិនលក់ បក់មិនល្ហើយ ព្រោះព្រួយបារម្ភនិងត្រៀមជម្លៀសខ្លួនចេញជានិច្ច។

កោះ Tokara ចំនួន ៧ ក្នុងចំណោម ១២ មានប្រជាជនរស់នៅប្រហែល ៧០០ នាក់។ (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរញ្ជួយនេះបានចាប់ផ្តើមតាំងនៅថ្ងៃទី២១ខែមិថុនាមកម៉្លេះ មានទាំងការរញ្ជួយដីកម្រិត ៥.៥ រ៉ិចទ័រ។ មិនមានការបំផ្លិចបំផ្លាញធំណាមួយត្រូវបានគេរាយការណ៍ទេ ហើយក៏មិនមានការព្រមានអំពីរលកយក្សស៊ូណាមិនោះដែរ ប៉ុន្តែប្រជាជននៅលើកោះនេះត្រូវបានប្រាប់ឱ្យត្រៀមខ្លួនដើម្បីជម្លៀសចេញជានិច្ចពេលមានរញ្ជួយដីធ្ងន់ធ្ងរ។

អ្នកស្រុកនិយាយថា ពួកគេគេងមិនលក់ស្រួល ហើយមានអារម្មណ៍ថាដីមានចលនាជានិច្ច។ អ្នកខ្លះនិយាយថាពួកគេឮសំឡេងសមុទ្រចម្លែកមុនការរញ្ជួយដីថែមទៀត។ កោះ Tokara ជាជម្រករបស់មនុស្សប្រហែល ៧០០ នាក់ ដោយកន្លែងខ្លះមិនមានមន្ទីរពេទ្យទេ មន្ទីពេទ្យដែលនៅជិតបំផុតគឺត្រូវជិះស្រឡាងយ៉ាងហោចណាស់ ៦ម៉ោង។

នៅពេលនេះផ្ទះសំណាក់ខ្លះបានឈប់ទទួលភ្ញៀវទេសចរ ហើយអាចប្រើជាជម្រកសម្រាប់ពេលមានការជម្លៀសចេញ។ អាជ្ញាធរក៏បានស្នើដល់ប្រព័ន្ធផ្សព្វផ្សាយកុំធ្វើការផ្សព្វផ្សាយព័ត៌មានរំខានអ្នកស្រុកខ្លាំងពេក ព្រោះពួកគេកំពុងមានភាពតានតឹងស្រាប់ហើយ។

ទន្ទឹមនឹងនេះ ប្រជាជននៅទូទាំងប្រទេសជប៉ុនមានការព្រួយបារម្ភដោយសារតែមានការព្យាករថា ការរញ្ជួយដីដ៏ធំមួយអាចនឹងកើតឡើងនៅថ្ងៃទី៥ ខែកក្កដាខាងមុខ។ ប្រទេសជប៉ុនជារឿយៗមានរញ្ជួយដីតិចតួច ប៉ុន្តែអ្នកជំនាញបានព្រមានជាច្រើនឆ្នាំទៅមុខអាចមានការរញ្ជួយដីដ៏ធំមួយអាចបណ្តាលឱ្យមានការខូចខាតដ៏ធំ៕