ព័ត៌មានអន្ដរជាតិ

ទេសចរផ្អាកទៅជប៉ុន ដោយសាររឿង Manga មួយសរសេរថាមានរញ្ជួយដីដ៏ខ្លាំងនៅថ្ងៃ៥កក្កដា

បានផុស

២ សប្តាហ៍ មុន

នៅ

ថ្ងៃសុក្រ ៤ កក្កដា ២០២៥

ដោយ

ពាក្យចចាមអារ៉ាមដែលបង្កឡើងដោយប្រលោមលោកតុក្កតាមួយ បានធ្វើឱ្យមានការព្រួយបារម្ភជាសាធារណៈ និងរំខានដល់វិស័យទេសចរណ៍ក្នុងប្រទេសជប៉ុន ដោយអ្នកដំណើរមួយចំនួនលុបចោលការធ្វើដំណើរ ជុំវិញការភ័យខ្លាចថាមានការរញ្ជួយដីដ៏ធំដែលព្យាករថាកើតឡើងនៅថ្ងៃទី០៥ ខែកក្កដា ឆ្នាំ២០២៥ខាងមុខ។ នេះបើយោងតាមការចេញផ្សាយរបស់សារព័ត៌មានSouth China Morning Post នៅថ្ងៃទី០៤ខែកក្កដានេះ។

រលកយក្សស៊ូណាមិដ៏ធំមួយបានបោកបក់មកលើតំបន់លំនៅដ្ឋាន ខេត្តមីយ៉ាជីនៅភាគឦសានប្រទេសជប៉ុនកាលពីថ្ងៃទី ១១ ខែមីនា ឆ្នាំ ២០១១។ (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក្យចចាមអារ៉ាមនេះ កើតចេញពីសៀវភៅប្រលោមលោកមួយដែលមានឈ្មោះថា «Watashi ga Mita Mirai (The Future That I Saw)» សរសេរដោយលោកស្រី Ryo Tatsuki។ សៀវភៅនេះបាននិយាយអំពីការរញ្ជួយដីដ៏ធំ និងរលកយក្សស៊ូណាមិដែលកើតឡើងនៅភាគខាងត្បូងប្រទេសជប៉ុនក្នុងខែកក្កដា ឆ្នាំ២០២៥។ មនុស្សជាច្រើនជឿថា វាអាចជាការព្រមានពិតប្រាកដមួយ ពីព្រោះសៀវភៅនេះក៏បានលើកឡើងពីគ្រោះមហន្តរាយនៅក្នុងខែមីនា ឆ្នាំ២០១១ដែលប្រទេសជប៉ុនមានការរញ្ជួយដី និងរលកយក្សស៊ូណាមិ និងសម្លាប់មនុស្សពិតប្រាកដមែន។

ខណៈពេលដែលអ្នកវិទ្យាសាស្ត្រ និងទីភ្នាក់ងារឧតុនិយមជប៉ុនច្រានចោលការព្យាកររញ្ជួយដីណាមួយថាជា «ព័ត៌មានមិនពិត» ការរញ្ជួយដីតូចៗជាង ១០០០ ដងក្នុងរយៈពេលពីរសប្តាហ៍ចុងក្រោយនេះ ជាពិសេសនៅប្រជុំកោះ Tokaraធ្វើឱ្យអ្នកស្រុកគេងមិនលក់ បក់មិនល្ហើយ និងត្រៀមជម្លៀសចេញជានិច្ច បានបន្ថែមការព្រួយបារម្ភជាសាធារណៈថែមទៀត។

លោកស្រី Ryo Tatsuki អ្នកសរសេរសៀវភៅ The Future That I Saw

ទោះបីលោកស្រី Tatsuki ដែលជាអ្នកនិពន្ធបានបដិសេធថា វាមិនមែនជាហោរានោះទេ ដោយជំរុញមនុស្សឱ្យពឹងផ្អែកលើដំបូន្មានអ្នកជំនាញក៏ដោយ ក៏ពាក្យចចាមអារ៉ាមនេះបានជះឥទ្ធិពលជាពិសេសដល់វិស័យទេសចរណ៍ពីហុងកុង ធ្វើឲ្យការទៅលេងប្រទេសជប៉ុនបានធ្លាក់ចុះ ១១% នៅក្នុងខែឧសភា។ ក្រុមហ៊ុនអាកាសចរណ៍ដូចជា Greater Bay និង Hong Kong Airlines បានលុបចោលជើងហោះហើរទៅកាន់ប្រទេសជប៉ុន ដោយសារតម្រូវការទាប។ ទោះយ៉ាងណាក៏ដោយ ភ្នាក់ងារទេសចរណ៍ធំៗនៅហុងកុងមិនបានរាយការណ៍ពីការលុបចោលទ្រង់ទ្រាយធំនោះទេ។

ប្រទេសជប៉ុនដែលស្ថិតនៅលើតំបន់ Ring of Fire ដែលមានសកម្មភាពរញ្ជួយដីញឹកញាប់ អាចប្រឈមមុខនឹងហានិភ័យពិតប្រាកដនៃការរញ្ជួយដីដ៏ធំមួយនៅពេលអនាគត ។ អាជ្ញាធរប៉ាន់ប្រមាណថា ប្រទេសជប៉ុនមានឱកាស ៨០% នៃការរញ្ជួយដីកម្រិត ៩ រ៉ិចទ័រ កើតឡើងមុនឆ្នាំ ២០៥៥ ដែលអាចបណ្តាលឱ្យមនុស្សស្លាប់រហូតដល់៣០ម៉ឺននាក់ និងខូចខាតចំនួន២ទ្រីលានដុល្លារ។

ប្រទេសជប៉ុនបានត្រៀមខ្លួនរួចជាស្រេចសម្រាប់គ្រោះរញ្ជួយដីដ៏ធំសម្រាប់រយៈពេលដ៏យូរមួយ ដោយបង្កើតអគារដ៏រឹងមាំ លើកទឹកចិត្តមនុស្សឱ្យរក្សាឧបករណ៍សង្គ្រោះបន្ទាន់ និងលំហាត់សមយុទ្ធត្រៀមខ្លួន។ កាលពីថ្ងៃទី ០១ ខែកក្កដា រដ្ឋាភិបាលបានចែករំលែកផែនការសុវត្ថិភាពដែលបានធ្វើបច្ចុប្បន្នភាពដោយស្នើសុំការងារបន្ថែមទៀតដើម្បីការពារប្រជាជន និងកែលម្អប្រព័ន្ធជម្លៀសផងដែរ៕