ព័ត៌មានអន្ដរជាតិ

WHO ត្រៀមផ្ដល់ភ្លើងខៀវអនុម័តវ៉ាក់សាំងឥណ្ឌា Covaxin សម្រាប់ប្រើប្រាស់ជាបន្ទាន់ នាខែក្រោយ

បានផុស

២ years មុន

នៅ

ថ្ងៃសុក្រ ១ តុលា ២០២១

ដោយ

សេចក្តីរាយការណ៍កាលពីថ្ងៃព្រហស្បតិ៍បាននិយាយថា ការអនុញ្ញាតឲ្យប្រើប្រាស់ជាបន្ទាន់សម្រាប់វ៉ាក់សាំងការពារកូវីដ Covaxin ដែលត្រូវបានអភិវឌ្ឍដោយក្រុមហ៊ុនជីវបច្ចេកវិទ្យា Bharat Biotech ពីអង្គការសុខភាពពិភពលោក (WHO) ទំនងជានឹងកើតឡើងនៅខែតុលានេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍បានឲ្យដឹងថា ក្រុមហ៊ុនផលិតវ៉ាក់សាំងដែលមានមូលដ្ឋាននៅទីក្រុង Hyderabad ប្រទេសឥណ្ឌាបានបញ្ជូនឯកសារទាំងអស់ទៅកាន់ទីភ្នាក់ងារសុខភាពពិភពលោករួចហើយ ហើយបាននិយាយថា ក្រុមហ៊ុនកំពុងព្យាយាមធ្វើការជាមួយ WHO ដើម្បីទទួលបានអនុម័តក្នុងពេលឆាប់ៗនេះ ។

ទន្ទឹមនោះ ក្រុមអ្នកប្រឹក្សាវ៉ាក់សាំង (SAGE) គ្រោងនឹងជួបពិភាក្សាគ្នានៅថ្ងៃទី ៥ ខែតុលាស្ដីពីការអនុម័តចំពោះវ៉ាក់សាំង Covaxin សម្រាប់ការប្រើប្រាស់ជាបន្ទាន់នៅលើពិភពលោក ។

ចំណែកលោកវេជ្ជបណ្ឌិត VK Paul សមាជិកមកពីភ្នាក់ងារសុខភាពរដ្ឋាភិបាល Niti Aayog បានបញ្ជាក់នៅក្នុងសន្និសីទសារព័ត៌មានមួយថា ការសាកល្បងព្យាបាលដំណាក់កាលទី ៣ នៃវ៉ាក់សាំង Covaxin បានបង្ហាញពីប្រសិទ្ធភាពការពារជំងឺកូវីដ ១៩ ចំនួន ៧៧.៨ ភាគរយ ។

គួរបញ្ជាក់ថា គិតត្រឹមពេលនេះ WHO បានអនុម័តឲ្យប្រើប្រាស់ជាបន្ទាន់លើវ៉ាក់សាំងការពារជំងឺកូវីដ ១៩ ដូចជា វ៉ាក់សាំង Pfizer-BioNTech វ៉ាក់សាំង AstraZeneca វ៉ាក់សាំងចាក់តែមួយដូស Johnson & Johnson វ៉ាក់សាំង Moderna ក៏ដូចជាវ៉ាក់សាំងចិន Sinovac និងវ៉ាក់សាំង Sinopharm ជាដើម ៕