ភាគខាងជើងប្រទេសវៀតណាម ជួបអាកាសធាតុត្រជាក់ខ្លាំង នៅសប្តាហ៍នេះ

ខ្យល់មូសុងភាគឦសាន នឹងទៅដល់ខេត្តភាគខាងជើងប្រទេសនៅសប្តាហ៍នេះ ខណៈសីតុណ្ហភាពនឹងធ្លាក់ចុះក្រោម ២៥ អង្សាសេ។

លោក Tran Quang Nang នៃមជ្ឈមណ្ឌលជាតិព្យាករណ៍ឧតុនិយម បាននិយាយថា ខ្យល់មូសុងភាគឦសាន នឹងមកដល់នៅថ្ងៃទី ១០-១១ ខែតុលា។

លោកនិយាយថា អាកាសធាតុនឹងចុះត្រជាក់ពី ២ ទៅ ៣ លើកក្នុងខែនេះ ដោយសីតុណ្ហភាពពេលថ្ងៃជាមធ្យមនៅតំបន់ភាគខាងជើង នឹងធ្លាក់ចុះក្រោម ២៥ អង្សាសេ។

លោកបន្តថា “រដូវរងាឆ្នាំនេះនឹងត្រជាក់ជាងឆ្នាំមុន ហើយតំបន់ភាគខាងជើងនឹងប្រឈមមុខនឹងការចុះត្រជាក់ខ្លាំងមុនថ្ងៃទី ២៥ ខែធ្នូ។ អាកាសធាតុរដូវរងាត្រជាក់បំផុត នឹងមកដល់នៅខែមករាឆ្នាំ ២០២២ អមដោយរលកខ្យល់ត្រជាក់ខ្លាំងរយៈពេល៤ទៅ៦ថ្ងៃ”។

មជ្ឈមណ្ឌលនេះបាននិយាយថា ទំនងជាមានភ្លៀងធ្លាក់នៅភាគខាងជើង ចាប់ពីថ្ងៃចន្ទនិងកាន់តែខ្លាំងចាប់ពីថ្ងៃអង្គារ ដោយសារតែឥទ្ធិពលនៃខ្យល់បក់ខ្លាំងនៅភាគខាងកើត។ នៅតំបន់ឆ្នេរ ទំនងជាមានភ្លៀងធ្លាក់ខ្លាំងរហូតដល់ថ្ងៃទី៧។

ក៏នឹងមានព្យុះផ្គររន្ទះនៅភាគខាងត្បូង និងតំបន់ខ្ពង់រាបកណ្តាលនៅសប្តាហ៍នេះផងដែរ។ សីតុណ្ហភាពពេលថ្ងៃខ្ពស់បំផុតគឺ ២៨ទៅ៣០ អង្សាសេនៅតំបន់ខ្ពង់រាបកណ្តាលនិង ៣១ទៅ៣៣ អង្សាសេនៅតំបន់ភាគខាងត្បូង៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ វៀតណាម ត្រៀមខ្លួនទទួលព្យុះមួយទៀត