WHO ឲ្យប្រើវ៉ាក់សាំងការពារជំងឺកាចសាហាវមួយនេះជាលើកដំបូង

អង្គការសុខភាពពិភពលោក (WHO) បាននិយាយកាលពីថ្ងៃពុធថា ខ្លួនកំពុងផ្តល់អនុសាសន៍ឲ្យប្រើប្រាស់នូវវ៉ាក់សាំងការពារជំងឺគ្រុនចាញ់ដំបូងបង្អស់របស់ពិភពលោក ។

WHO និយាយថា ជំងឺឆ្លងដែលបង្កឡើងដោយមូសខាំបានសម្លាប់មនុស្សជាង ៤០ ម៉ឺននាក់ជារៀងរាល់ឆ្នាំ ហើយភាគច្រើនជាកុមារតូចៗនៅទ្វីបអាហ្វ្រិក ។

កន្លងមកអង្គការនេះបានសម្របសម្រួលកម្មវិធីសាកល្បងមួយ ចាប់តាំងពីឆ្នាំ ២០១៩ ដើម្បីផ្តល់វ៉ាក់សាំងការពារជំងឺគ្រុនចាញ់ដល់កុមារជាង ៨០០,០០០ នាក់នៅប្រទេសហ្គាណា កេនយ៉ា និងម៉ាឡាវី ។

ទន្ទឹមនោះ ក្រុមហ៊ុនឱសថអង់គ្លេស GlaxoSmithKline និងក្រុមហ៊ុនដទៃទៀតនិយាយថា ពួកគេបានបញ្ជាក់ពីប្រសិទ្ធភាព និងសុវត្ថិភាពនៃវ៉ាក់សាំងរបស់ខ្លួនក្នុងការសាកល្បងព្យាបាលជំងឺដ៏កាចសាហាវនេះ ។

WHO និយាយថា វ៉ាក់សាំងការពារជំងឺគ្រុនចាញ់របស់ក្រុមហ៊ុន GlaxoSmithKline បានកាត់បន្ថយឱកាសនៃការវិវត្តទៅជារោគសញ្ញាធ្ងន់ធ្ងរចំនួន ៣០ ភាគរយ ។

ចំណែកអគ្គនាយកអង្គការ WHO លោក Tedros Adhanom Ghebreyesus បានប្រាប់អ្នកយកព័ត៌មានថា វ៉ាក់សាំងដែលមានអាយុកាលជាង ៣០ ឆ្នាំមកហើយនោះ បានផ្លាស់ប្តូរដំណើរប្រែប្រួលនៃសុខភាពសាធារណៈ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ជំងឺកាចសាហាវមួយដែលធន់នឹងថ្នាំព្យាបាលកំពុងរាលដាលខ្លាំងនៅ អាហ្វ្រិកខាងកើត