ព័ត៌មានអន្ដរជាតិ

ឥណ្ឌាច្រៀង-រាំទូទាំងប្រទេស អបអរការចាក់វ៉ាក់សាំងកូវីដបាន១ប៊ីលានដូស

បានផុស

៥ years មុន

នៅ

ថ្ងៃសុក្រ ២២ តុលា ២០២១

ដោយ

ប្រទេសឥណ្ឌាបានរៀបចំពិធីអបអរសាទរទូទាំងប្រទេសចំពោះការសម្រេចបាននូវគោលដៅនៃការចាក់វ៉ាក់សាំងការពារកូវីដ-១៩ដល់ប្រជាជនរបស់ខ្លួនបាន១ប៊ីលានដូសកាលពីថ្ងៃព្រហស្បតិ៍ម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីចាប់ផ្តើមចាក់កាលពីពាក់កណ្តាលខែមករាមក យុទ្ធនាការណ៍ចាក់វ៉ាក់សាំងការពារកូវីដរបស់ប្រទេសឥណ្ឌាចាក់បានចំនួន៣ភាគ៤នៃប្រជាជនធំពេញ៩៤៤លាននាក់ហោចណាស់បាន១ដូស ប៉ុន្តែមានតែ៣១%ប៉ុណ្ណោះចាក់បាន២ដូស។ រដ្ឋាភិបាលចង់ឲ្យមនុស្សធំពេញវ័យចាក់ឲ្យបានទាំងអស់គ្នានៅឆ្នាំនេះ។

លោកនាយករដ្ឋមន្ត្រីឥណ្ឌា Narendra Modi បាននិយាយតាម Twitter ថា ៖«ឥណ្ឌាបានចារប្រវត្តិសាស្ត្រហើយ។ យើងកំពុងឃើញជោគជ័យនៃវិទ្យាសាស្ត្រឥណ្ឌា សហគ្រាស និងស្មារតីរួបរួមនៃប្រជាជនឥណ្ឌា (១.៣ប៊ីលាននាក់)»។

លោក Modi បានកត់សំគាល់ឱកាសនេះដោយបានសន្ទនាជាមួយបុគ្គលិកសុខាភិបាល និងសន្តិសុខម្នាក់នៅមន្ទីរពេទ្យរដ្ឋមួយកន្លែងក្នុងទីក្រុងញ៉ូវដេលី។

រដ្ឋមន្ត្រីក្រសួងសុខាភិបាលបានប្រកាសអំពីកម្មវិធីប្រគំតន្ត្រី និងកម្មវិធីផ្សេងៗទូទាំងប្រទេស ហើយមានការបំភ្លឺភ្លើងយ៉ាងស្រស់ឆើតឆាយនៅវិមានជាតិនានាក្នុងនោះមានទាំងនៅពន្ធនាគារសម័យអាណានិគមផងដែរ។

វ៉ាក់សាំងជិត៩០%ដែលបានចាក់នៅប្រទេសឥណ្ឌាទទួលបានមកពីវិទ្យាស្ថាន Serum ឥណ្ឌា (SII) ដែលផលិតវ៉ាក់សាំង AstraZeneca (AZN.L)។ វិទ្យាស្ថាន SII បានបង្កើនសមត្ថភាពលើស៣ដងនៃសមត្ថភាពរបស់ខ្លួនចាប់តាំងពីខែមេសាមក ហើយឥឡូវអាចផលិតបានដល់២២០លានដូសក្នុងមួយខែ៕

ប្រែសម្រួល៖ វីរបុត្រ
ប្រភព៖ Reuters