កូរ៉េខាងជើង ឲ្យកងប្រយុទ្ធរបស់ខ្លួនប្រកួតប្រជែងបាញ់កាំភ្លើងធំ បង្កើនសមត្ថភាពហ្វឹកហ្វឺន

កាសែតគណបក្សពលករដែលកំពុងកាន់អំណាចរបស់កូរ៉េខាងជើងនិយាយថា យោធារបស់ខ្លួនបានធ្វើការប្រកួតប្រជែងដើម្បីសាកល្បងសមត្ថភាពប្រយុទ្ធរបស់កងអង្គភាពកាំភ្លើងធំ ។

កាសែត Rodong Sinmun បានរាយការណ៍កាលពីថ្ងៃអាទិត្យថា ការប្រកួតនេះធ្វើឡើងកាលពីប៉ុន្មានថ្ងៃមុន  ហើយត្រូវបានត្រួតពិនិត្យដោយមន្ត្រីយោធាជាន់ខ្ពស់បំផុតគឺលោក Pak Jong Chon ។

កាសែតនេះមិនបានបង្ហាញពីប្រភេទអាវុធ ឬទំហំនៃការប្រកួតប្រជែងនោះទេ ប៉ុន្តែបាននិយាយថា ទីតាំងនៃកងកម្លាំងភ្លើង និងការបញ្ជាបាញ់ត្រូវបានកំណត់ដោយកងអង្គភាព ហើយកាំភ្លើងធំបានបាញ់ផ្លោងចំគោលដៅដោយភាពច្បាស់លាស់ ។

កាសែតនេះក៏បាននិយាយផងដែរថា ការប្រកួតប្រជែងនេះត្រូវបានធ្វើឡើង ដើម្បីវាយតម្លៃទម្រង់ហ្វឹកហ្វឺនដែលធ្វើឡើងដោយអង្គភាពកាំភ្លើងធំ និងដើម្បីបង្កើនសមត្ថភាពប្រយុទ្ធកាំភ្លើងធំចល័តរបស់ពួកគេ ក្នុងគោលបំណងបង្កើតឲ្យមានការហ្វឹកហាត់ខ្លាំងជាងមុន ។

ទន្ទឹមនោះ ការតាំងពិព័រណ៍មួយដែលមានអាវុធទំនើបៗ រួមទាំងអ្វីដែលហាក់ដូចជា មីស៊ីលផ្លោងអន្តរទ្វីប ត្រូវបានប្រារព្ធឡើងនៅទីក្រុងព្យុងយ៉ាងក្នុងខែតុលា ។

បន្ថែមពីនេះ ប្រទេសកូរ៉េខាងជើងក៏កំពុងបន្តអភិវឌ្ឍបច្ចេកវិទ្យានុយក្លេអ៊ែរ និងមីស៊ីល ដោយផ្អែកលើផែនការការពាររយៈពេល ៥ ឆ្នាំដែលបង្ហាញដោយមេដឹកនាំ គីម ជុងអ៊ុន ក្នុងខែមករា ។

ស្របពេលជាមួយគ្នានេះ ប្រទេស​នេះ​កំពុង​ព្យាយាម​បង្ហាញ​ថា ​ខ្លួន​ក៏​មាន​បំណង​បង្កើន​សមត្ថភាព​សព្វាវុធ​សាមញ្ញ និង​លើក​កម្ពស់​សីលធម៌​សាធារណៈផងដែរ ។

គួរបញ្ជាក់ថា ថ្មីៗនេះកូរ៉េខាងជើងបានបាញ់សាកល្បងកាំជ្រួចមីស៊ីលផ្លោងជាច្រើនប្រភេទ រួមទាំងមីស៊ីលបាញ់ចេញពីនាវាមុជទឹក ចាប់តាំងពីខែកញ្ញាមក ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូរ៉េខាងជើង ប្រាប់ទៅ អាមេរិក ថា ការអភិវឌ្ឍអាវុធថ្មីៗ ជាជម្រើស ជៀសមិនរួចសម្រាប់ការការពារខ្លួន