អូមីក្រុង ចេញពូជថ្មីទៀតហើយ មកលើកនេះ ចេះបំបាំងកាយ (មានវីដេអូ)

ស្របពេលដែលជំងឺរាតត្បាតកូវីដ១៩នៅតែបន្តរីករាលដាល ការព្រួយបារម្ភនៅតែបន្តកើតមានលើវីរុសបំប្លែងខ្លួនប្រភេទថ្មីៗ និងកាន់តែគ្រោះថ្នាក់បន្ថែមទៀត។

មេរោគដែលលេចធ្លោនាពេលបច្ចុប្បន្នគឺវីរុសបំប្លែងខ្លួន អូមីក្រុង ប៉ុន្តែមេរោគបានប្រែប្រួលជាបន្តបន្ទាប់ និងផ្លាស់ប្តូរតាមពេលវេលា ដែលនេះមានន័យថា វាអាចពិបាកក្នុងការគ្រប់គ្រង។

វីរុសបំប្លែងខ្លួនអូមីក្រុងក្លាយពូជប្រភេទថ្មី BA.2 គឺត្រូវបានអ្នកវិទ្យាសាស្រ្តហៅថាជា “មេរោគអូមីក្រុងបំបាំងកាយ” ព្រោះវាមានសមត្ថភាព គេចផុតពីការធ្វើតេស្តទោះម៉ាស៊ីន PCR ក៏រកមើលមិនឃើញដែរ។

នេះ​ជា​ក្តី​ព្រួយ​បារម្ភ ព្រោះ​ការ​ធ្វើ​តេស្ត PCR គឺ​សំខាន់ណាស់​សម្រាប់​ការ​រក​ឃើញ​មេរោគឲ្យ​កាន់​តែ​ច្បាស់។

កាលពីសប្តាហ៍មុន ប្រទេសដាណឺម៉ាកបានរាយការណ៍ថា មេរោគក្លាយពូជប្រភេទថ្មីនេះ រួមចំណែកជិតពាក់កណ្តាលនៃករណីឆ្លងរបស់ប្រទេស ហើយថា នៅពេលដែលករណីឆ្លងមេរោគនេះកើនឡើង ករណីទូទៅបានហក់ឡើងដល់កម្រិតខ្ពស់បំផុតក្នុងកំណត់ត្រា។

អង្គការសុខភាពពិភពលោក (WHO) បាននិយាយថា អូមីក្រុង ទម្រង់ក្លាយពូជមួយទៀតឬគេឲ្យឃើញថា BA.1 ពីមុនគឺជាមេរោគលេចធ្លោបំផុត ប៉ុន្តែទិន្នន័យថ្មីៗពីប្រទេសឥណ្ឌា អាហ្រ្វិកខាងត្បូង ចក្រភពអង់គ្លេស និងដាណឺម៉ាក បានបង្ហាញថា​ ករណី BA.2 កំពុងកើនឡើងយ៉ាងគំហុក។

ទោះបីជាយ៉ាងណាក៏ដោយ ការស្រាវជ្រាវបន្ថែមទៅលើវីរុសក្លាយពូជប្រភេទនេះ កំពុងដំណើរការដើម្បីសាកល្បង និងកំណត់ថាតើវាជាមូលហេតុនៃក្តីព្រួយបារម្ភដែរឬក៏អត់។

ស្របពេលជាមួយគ្នានោះដែរ ទីភ្នាក់ងារសន្តិសុខសុខភាពចក្រភពអង់គ្លេស (UKHSA) បានបញ្ជាក់ថា មេរោគនេះត្រូវបានចាត់ថ្នាក់ថាជា មេរោគបំប្លែងខ្លួនស្ថិតក្រោមការស៊ើបអង្កេត៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Mirror

ចុចអាន៖ WHO ព្រមានចំៗ អូមីក្រុង មិនស្រាលទេ កុំយល់ខុសឲ្យសោះ