មានប្រទេសមួយហើយ ចូលដៃជាមួយរុស្ស៊ី វាយលុក អ៊ុយក្រែន

នៅពេលនេះ មានប្រទេសមួយហើយ បានចូលដៃជាមួយរុស្ស៊ី ដើម្បីវាយលុក អ៊ុយក្រែន។

ទីប្រឹក្សារដ្ឋមន្ត្រីក្រសួងមហាផ្ទៃអ៊ុយក្រែនបាននិយាយថា មីស៊ីល Iskander ត្រូវបានបាញ់ចេញពីប្រទេសបេឡារុស ចូលទៅក្នុងប្រទេសអ៊ុយក្រែន នៅម៉ោង១៧:០០ (ម៉ោងនៅ អ៊ុយក្រែន)។

រឿងនេះកើតឡើងបន្ទាប់ពីការិយាល័យរបស់លោកប្រធានាធិបតី Zelensky បានប្រកាសថា មន្ត្រីអ៊ុយក្រែន និងរុស្ស៊ីនឹងត្រូវជួបពិភាក្សាគ្នានៅព្រំដែនបេឡារុសជាមួយអ៊ុយក្រែន ទោះបីជាពួកគេមិនបាននិយាយថានៅពេលណាក៏ដោយ។

ចារកម្មអ៊ុយក្រែនបានឲ្យដឹងថា ទាហានពិសេសរបស់ប្រទេសបេឡារុស ត្រូវបានគេប្រទះឃើញកំពុងឡើងយន្តហោះ សម្រាប់ការវាយប្រហារដ៏ធំមួយ។

ប្រភពជាន់ខ្ពស់នៅអ៊ុយក្រែនបានប្រាប់កាសែត Daily Mirror ថា “ប្រសិនបើរឿងនេះកើតឡើងមែននោះ វានឹងមានន័យថា ប្រទេសបេឡារុសបានចូលរួមជាមួយរុស្ស៊ីដោយបើកចំហ ក្នុងការវាយលុកអធិបតេយ្យភាពអ៊ុយក្រែន”។

អស់រយៈពេលជាច្រើនសប្តាហ៍មកហើយ ក្នុងអំឡុងពេលដែលរុស្ស៊ីបង្កើតកងទ័ព, កងកម្លាំងឥស្សរជន Spetsnaz ជាច្រើនរបស់ទីក្រុងមូស្គូ បានធ្វើការហ្វឹកហាត់ ជាមួយសមភាគីបេឡារុស។

ឥឡូវនេះ រឿងបានកើតឡើងជាក់ស្តែងហើយ ប្រទេសបេឡារុស បានអនុញ្ញាតបាញ់មីស៊ីលចេញពីក្នុងទឹកដីរបស់ខ្លួន ដាក់ប្រទេសអ៊ុយក្រែន។

ស្របពេលជាមួយគ្នានោះ ប្រធានាធិបតីបេឡារុស លោក Alexander Lukashenko បានបញ្ជាក់ថា មីស៊ីលពិតជាត្រូវបានបាញ់ចេញពីប្រទេសរបស់លោក ទៅលើអ៊ុយក្រែនមែន។

លោកថែមទាំងបញ្ជាក់ផងដែរថា ទាហានរុស្ស៊ីដែលរងរបួស កំពុងត្រូវបានព្យាបាលនៅក្នុងមន្ទីរពេទ្យបេឡារុស ទៀតផង៕

ប្រែសម្រួល៖ Vann Vann

ប្រភព៖ Mirror, Kyiv Independent

ចុចអាន៖ អ៊ុយក្រែនបញ្ជាក់ថា មានជនស៊ីវិលស្លាប់ ៣៥២នាក់ និងរបួសជាង ១ពាន់នាក់