​​លោក ហ្សេលេនស្គី តែងតាំង​រដ្ឋមន្ត្រីការពារជាតិស្តីទី ជំនួសលោក Fedorov ដែល​មានបាតុកម្ម​​​គាំទ្រ​​ដ៏ខ្លាំង​

ប្រធានាធិបតី​អ៊ុយក្រែន លោក​ វ៉ូឡូឌីមៀរ ហ្សេលេនស្គី បានតែងតាំងមេដឹកនាំនៃទីភ្នាក់ងារសន្តិសុខជាតិអ៊ុយក្រែន (SBU) ជារដ្ឋមន្ត្រីការពារជាតិស្តីទី ចំពេលមានរលកនៃការតវ៉ាប្រឆាំងនឹងការសម្រេចចិត្តដកតំណែងអតីតរដ្ឋមន្ត្រី លោក Mykhailo Fedorov នៅទូទាំងប្រទេស។ នេះបើយោងតាមសារព័ត៌មាន politico ចុះផ្សាយនៅថ្ងៃទី១៦ ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ្សេលេនស្គី បាននិយាយក្នុងពេលប្រកាសពីការសម្រេចចិត្តផ្ទេរតំណែងលោក Yevhen Khmara ដែលជាប្រធានទីភ្នាក់ងារសន្តិសុខជាតិអ៊ុយក្រែន (SBU) ឲ្យទៅកាន់តំណែងជារដ្ឋមន្ត្រីការពារជាតិស្តីទីថា «វាមានសារៈសំខាន់ខ្លាំងណាស់នៅពេលនេះ ក្នុងការរក្សាចក្ខុវិស័យយុទ្ធសាស្ត្រអំពីរបៀបដែលអ៊ុយក្រែននឹងបន្តការពារឯករាជ្យភាពរបស់ខ្លួនយ៉ាងសកម្ម និងបង្ខំឲ្យរុស្ស៊ីឈានទៅរកដំណោះស្រាយតាមផ្លូវការទូត»។

ប្រធានាធិបតីបានបញ្ជាក់ទៀតថា លោកនឹងដាក់ស្នើទៅកាន់សភាអ៊ុយក្រែន ដើម្បីអនុម័តយល់ព្រមលើលោក Khmara ជារដ្ឋមន្ត្រីការពារជាតិ ត្រឹមត្រូវតាមច្បាប់ បន្ទាប់ពីបំពេញនីតិវិធីច្បាប់ចាំបាច់នានារួចរាល់។ សម័យប្រជុំបន្ទាប់របស់សភាអ៊ុយក្រែន ត្រូវបានគ្រោងទុកធ្វើឡើងនៅថ្ងៃទី១៨ ខែសីហាខាងមុខ។

មេដឹកនាំអ៊ុយក្រែនរូបនេះបានបន្តថា បទពិសោធន៍របស់លោក Khmara ក្នុងការដឹកនាំប្រតិបត្តិការវាយប្រហាររយៈចម្ងាយឆ្ងាយប្រឆាំងនឹងរុស្ស៊ី និងការគ្រប់គ្រងបុគ្គលិកនៅមជ្ឈមណ្ឌលប្រតិបត្តិការពិសេស Alpha របស់ SBU គឺជាគុណសម្បត្តិមួយដ៏សមស្របសម្រាប់រូបលោកក្នុងនាមជារដ្ឋមន្ត្រីការពារជាតិ។ លោកក៏បានប្រគល់ភារកិច្ចឲ្យលោក Khmara បន្តធ្វើកំណែទម្រង់វិស័យការពារជាតិ និងអនុវត្តគោលដៅនានាដែលបានព្រមព្រៀងគ្នា។

ការប្រកាសតែងតាំងនេះ បានធ្វើឡើងរយៈពេលពីរថ្ងៃ បន្ទាប់ពីលោក Mykhailo Fedorov ត្រូវបានដកតំណែងជារដ្ឋមន្ត្រីការពារជាតិ ក្រោយកាន់អំណាចបានត្រឹមតែ ៦ខែ។ បន្ទាប់មក សភាអ៊ុយក្រែនបានអនុម័តរដ្ឋាភិបាលថ្មីមួយដែលដឹកនាំដោយអតីតប្រធានក្រុមហ៊ុនថាមពលជាតិ Naftogaz គឺលោក Serhiy Koretsky ប៉ុន្តែបញ្ជីឈ្មោះគណៈរដ្ឋមន្ត្រីរបស់លោក Koretsky នៅតែខ្វះខាតតំណែងរដ្ឋមន្ត្រីការពារជាតិ និងរដ្ឋមន្ត្រីការបរទេសនៅឡើយ។

ការសម្រេចចិត្តដកតំណែងលោក Fedorov នេះទៀតសោត បានធ្វើឲ្យឆាកនយោបាយអ៊ុយក្រែនមានការភ្ញាក់ផ្អើលយ៉ាងខ្លាំង និងនាំឲ្យមានការតវ៉ាជាច្រើន។ នៅទីក្រុងកៀវ មនុស្សប្រហែល ១ពាន់ ទៅ ២ពាន់នាក់ រួមទាំងទាហាន និងអតីតយុទ្ធជនជាច្រើននាក់ បានប្រមូលផ្តុំគ្នាដើម្បីតវ៉ាប្រឆាំងនឹងការសម្រេចចិត្តនេះ។ អនុមេបញ្ជាការកងទ័ពអាកាសអ៊ុយក្រែន លោក Pavlo Yelizarov ក៏បានដាក់ពាក្យលាលែងពីតំណែងផងដែរ ដោយបានព្រមានថា ការដកតំណែងលោក Fedorov នឹងបង្កឲ្យមាន ការខូចខាត និងការបាត់បង់ជីវិតយ៉ាងធ្ងន់ធ្ងរនៅលើសមរភូមិជួរមុខ៕

អត្ថបទ ៖ សាង ស្រីល័ក្ខ

លោក ហ្សេលេនស្គី ដកតំណែងរដ្ឋមន្ត្រីការពារជាតិ ដែលគេឲ្យរហស្សនាម «ស្តេចត្រាញ់ដ្រូន»