ពលរដ្ឋ អ៊ុយក្រែន នៅអឺរ៉ុបជាង ២០ ម៉ឺននាក់មកជួយប្រយុទ្ធការពារប្រទេស

រដ្ឋមន្ត្រីការពារជាតិអ៊ុយក្រែនលោក Oleksii Reznikov បាននិយាយកាលពីថ្ងៃព្រហស្បតិ៍ថា ពលរដ្ឋអ៊ុយក្រែនជាង ២០ ម៉ឺននាក់បានត្រឡប់មកពីអឺរ៉ុបវិញដើម្បីការពារប្រទេសរបស់ពួកគេ ។

លោកបាននិយាយថា “រហូតមកដល់ពេលនេះពលរដ្ឋអ៊ុយក្រែនជាង ១០ ម៉ឺននាក់បានចូលរួមជាមួយកងទ័ព ហើយពលរដ្ឋរបស់យើងជាង ២០ ម៉ឺននាក់ទៀតបានត្រឡប់មកពីអឺរ៉ុបដើម្បីការពារប្រទេសរបស់យើង ហើយក្នុងចំណោមពួកគេនោះក៏មានអ្នកស្ម័គ្រចិត្តបរទេសផងដែរ” ។

Reznikov បាននិយាយថា “យើងនឹងមិនចាញ់រុស្ស៊ីក្នុងបរិមាណណាមួយទេ ។ យើងមិនឈប់ការតបតទៅរុស្ស៊ីទេ ហើយពិភពលោកទាំងមូលមើលឃើញរឿងនេះ” ។

បើយោងតាមតួលេខរបស់អង្គការសហប្រជាជាតិ (UN) បានឲ្យដឹងថា យ៉ាងហោចណាស់ជនស៊ីវិល ៥៤៩ នាក់ត្រូវបានសម្លាប់ និង ៩៥៧ នាក់ផ្សេងទៀតបានរងរបួសនៅក្នុងប្រទេសអ៊ុយក្រែន ចាប់តាំងពីការចាប់ផ្តើមនៃសង្រ្គាម ។

ចំណែកទីភ្នាក់ងារជនភៀសខ្លួន UN បាននិយាយថា មនុស្សជាង ២.៣ លាននាក់ក៏បានភៀសខ្លួនទៅកាន់ប្រទេសជិតខាងផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី ចេញសេចក្ដីថ្លែងការណ៍ ៨ ចំណុចខ្លឹមៗ ក្រោយកិច្ចប្រជុំជាមួយ អ៊ុយក្រែន