សហរដ្ឋអាមេរិក នឹងត្រូវខ្ចីលុយចិន ដើម្បីផ្តល់ជំនួយឲ្យ អ៊ុយក្រែន

ព្រឹទ្ធសមាជិកសហរដ្ឋអាមេរិកលោក Rand Paul កាលពីថ្ងៃព្រហស្បតិ៍ទី១២ខែឧសភា បានពន្យារពេលការអនុម័តកញ្ចប់ជំនួយអ៊ុយក្រែនក្នុងទំហំទឹកប្រាក់៤០ពាន់លានដុល្លារ ដោយលើកឡើងពីក្តីព្រួយបារម្ភអំពីការចំណាយរបស់រដ្ឋាភិបាល បំណុល និងអតិផរណា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Paul បាននិយាយក្នុងសុន្ទរកថានៅព្រឹទ្ធសភាថា “យើងមិនអាចជួយសង្គ្រោះអ៊ុយក្រែនទាំងដែលបំផ្លាញសេដ្ឋកិច្ចរបស់សហរដ្ឋអាមេរិកបាននោះទេ។ សមាជគួរតែវាយតម្លៃ អំពីការខាតបង់នៃការបន្តដើរតាមផ្លូវនេះ។ ការគំរាមកំហែងធំបំផុតចំពោះសហរដ្ឋអាមេរិកនាពេលបច្ចុប្បន្នគឺបំណុល និងអតិផរណា និងការបំផ្លិចបំផ្លាញប្រាក់ដុល្លារ”។

លោក Paul បាននិយាយទៀតថា សហរដ្ឋអាមេរិកមិនអាចមានលទ្ធភាពធ្វើជាប៉ូលិសរបស់ពិភពលោក ហើយបន្តការចំណាយលើឱនភាពបានឡើយ។

យោងតាមលោក Paul, សហរដ្ឋអាមេរិកនឹងផ្តល់ប្រាក់សរុបប្រហែល ៦០ ពាន់លានដុល្លារសម្រាប់អ៊ុយក្រែនក្នុងរយៈពេលប៉ុន្មានឆ្នាំខាងមុខៗ ប្រសិនបើច្បាប់នេះអនុម័ត។ មានតែប្រទេសកំពូលទាំងប្រាំក្នុងពិភពលោកប៉ុណ្ណោះ ដែលចំណាយច្រើនជាង ៦០ពាន់លានដុល្លារលើការចំណាយយោធា ហើយតួលេខនេះស្ទើរតែស្មើនឹងការចំណាយដោយរុស្ស៊ីទៅហើយ។

លោក Paul ក៏បាននិយាយដែរថា សហរដ្ឋអាមេរិកនឹងត្រូវខ្ចីលុយពីចិន ដើម្បីប្រគល់ឲ្យអ៊ុយក្រែន បើនៅតែបែបនេះ។ ទឹកប្រាក់សរុបចំនួន ៦០ ពាន់លានដុល្លារ គឺច្រើនជាងការចំណាយលើការស្រាវជ្រាវជំងឺមហារីក ឬប្រមូលបានក្នុងពន្ធឧស្ម័ន ហើយលើសពីថវិការបស់ក្រសួងសន្តិសុខមាតុភូមិ និងក្រសួងថាមពលទៅទៀត៕

ប្រែសម្រួល៖ Vann Vann

ប្រភព៖ Sputnik

ចុចអាន៖ អាមេរិក៖ អ៊ុយក្រែន ត្រូវធានាថា អាវុធនឹងមិនធ្លាក់ដល់ដៃ មនុស្សខុស