ថៃ ចាត់វិធានការបន្ទាប់ពីមន្ទីរពេទ្យឯកជនផ្សាយពាណិជ្ជកម្មលក់វ៉ាក់សាំងកូវីដក្នុងតម្លៃជាង៣០០ដុល្លារ

មន្ទីរពេទ្យឯកជនមួយក្នុងប្រទេសថៃត្រូវបានបញ្ជាឲ្យបញ្ឈប់ការផ្សាយពាណិជ្ជកម្មកក់ទិញវ៉ាក់សាំងការពារជំងឺកូវីដ១៩ដោយផ្អែកលើមូលដ្ឋានថា មិនទាន់មានវ៉ាក់សាំងណាមួយត្រូវបានអនុម័តនៅក្នុងប្រទេសថៃនៅឡើយទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ទីរពេទ្យ Vibhavadi បានប្រាប់ Reuters ថា ការកក់ទិញតាមអនឡាញ១​,០០០នាក់ដំបូងសម្រាប់វ៉ាក់សាំងរបស់ក្រុមហ៊ុន Moderna ដែលតម្រូវឲ្យចាក់២ដូសគឺជាលទ្ធផលនៃការយល់ច្រឡំ។ ជាមួយនឹងការកក់ក្នុងតម្លៃ៤,០០០បាត ថ្លៃសរុបនៃការចាក់វ៉ាក់សាំងនឹងមានចំនួន១ម៉ឺនបាត (៣៣០ដុល្លារ)។

ស្របពេលរដ្ឋាភិបាលនានាបានចាប់ផ្តើមយុទ្ធនាការចាក់វ៉ាក់សាំងនៅជុំវិញពិភពលោក មានសំណួរជាច្រើនត្រូវបានលើកឡើងអំពីថាតើការផ្គត់ផ្គង់ដែលមានកំណត់ ត្រូវបានផ្តល់អាទិភាពនិងថាតើប្រជាជននឹងអាចបង់ប្រាក់ដើម្បីចាក់វ៉ាក់សាំងដែរឬក៏អត់។

ក្រសួងសុខាភិបាលបាននិយាយនៅក្នុងសេចក្តីថ្លែងការណ៍មួយថា ពុំមានវ៉ាក់សាំងការពារជំងឺកូវីដ១៩ណាមួយត្រូវបានអនុម័តឲ្យប្រើប្រាស់នៅក្នុងប្រទេសថៃនៅឡើយទេហើយការផ្សាយពាណិជ្ជកម្មនេះបានរំលោភលើបទបញ្ជាមន្ទីរពេទ្យ។

ក្រសួងបាននិយាយថា “មានការបញ្ជាឲ្យដកការផ្សាយពាណិជ្ជកម្មនេះចេញ”។

លោក Chaisit Kupwiwat នាយកមន្ទីរពេទ្យ Vibhavadi បានប្រាប់ Reuters ថា “មានការយល់ច្រឡំហើយដូច្នេះយើងបានបញ្ឈប់កម្មវិធីនេះ យើងគ្រោងនឹងកម្ម៉ង់ទិញវ៉ាក់សាំងប៉ុន្តែឥឡូវនេះយើងបានបញ្ឈប់ហើយ”។

ស្របពេលជាមួយគ្នានោះ ក្រុមហ៊ុន Moderna មិនបានឆ្លើយតបភ្លាមៗចំពោះសំណើសុំការអត្ថាធិប្បាយតាមអ៊ីម៉ែលលើការលក់បែបនេះទេ។

គួរបញ្ជាក់ថា ប្រទេសថៃបានចុះហត្ថលេខាលើកិច្ចព្រមព្រៀងជាមុនសម្រាប់វ៉ាក់សាំងកូវីដរបស់ក្រុមហ៊ុន AstraZeneca ប៉ុន្តែមិនទាន់បានដាក់ចេញនូវផែនការសម្រាប់ការចាក់វ៉ាក់សាំងណាមួយនៅឡើយទេ៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ ថៃ ព្រមានបិទប្រទេសទាំងមូលបើប្រជាជនមិនសហការទប់ស្កាត់កូវីដ

ចុចអាន៖ ផ្ទុះកូវីដខ្លាំង ម៉ាស់នៅ ភូកេត ឡើងថ្លៃហើយ រកទិញមិនបានទៀត