ព័ត៌មានអន្ដរជាតិ

អាមេរិក គ្រោងបន្ថយទណ្ឌកម្ម វេណេស៊ុយអេឡា ដើម្បីបូមប្រេងក្នុងប្រទេសនេះឡើងវិញ

បានផុស

៤ years មុន

នៅ

ថ្ងៃព្រហស្បតិ៍ ៦ តុលា ២០២២

ដោយ

កាសែត Wall Street Journal បានរាយការណ៍ថា លោកប្រធានាធិបតី ចូ បៃដិន កំពុងរៀបចំកាត់បន្ថយទណ្ឌកម្មប្រឆាំងនឹងប្រទេសវេណេស៊ុយអេឡា ដើម្បីអនុញ្ញាតឲ្យក្រុមហ៊ុនដ៏ធំ Chevron របស់អាមេរិក ចាប់ផ្តើមបូមប្រេងសាឡើងវិញនៅក្នុងប្រទេសដែលមានជម្លោះអស់រយៈពេលជាច្រើនឆ្នាំជាមួយសហរដ្ឋអាមេរិកមួយនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងការនេះត្រូវបានគេមើលឃើញថាអាចជួយបង្កើនការផ្គត់ផ្គង់ប្រេងជាសកល និងកាត់បន្ថយការដំឡើងថ្លៃថាមពល នៅពេលដែលរដ្ឋបាលលោក បៃដិន កំពុងឆ្ពោះទៅរកការបោះឆ្នោតពាក់កណ្តាលអាណត្តិក្នុងខែវិច្ឆិកា ។

ទន្ទឹមនោះ របាយការណ៍របស់សារព័ត៌មានបានលេចឡើងនៅចំថ្ងៃតែមួយនៃការកាត់បន្ថយទិន្នផលប្រេងដ៏ធំដែលត្រូវបានប្រកាសដោយសម្ព័ន្ធភាពផលិតប្រេងរបស់អង្គការ OPEC+ ដើម្បីបង្កើនតម្លៃប្រេងឆៅ បន្ទាប់ពីធ្លាក់ថ្លៃយ៉ាងខ្លាំង ចាប់តាំងពីខែមិថុនា ។

កាសែត Wall Street Journal បានចុះផ្សាយទៀតថា ផែនការរបស់រដ្ឋបាលលោក បៃដិន ក៏អាចត្រួសត្រាយផ្លូវសម្រាប់ការបើកឡើងវិញនូវទីផ្សារសហរដ្ឋអាមេរិក និងអឺរ៉ុបចំពោះការនាំចេញប្រេងពីប្រទេសវេណេស៊ុយអេឡាផងដែរ ។

គួរបញ្ជាក់ថា តម្លៃប្រេងបានហក់ឡើងក្នុងរយៈពេល ៣ ថ្ងៃជាប់គ្នា បន្ទាប់ពីក្រុមប្រទេសរបស់ OPEC+ បានប្រកាសពីការកាត់បន្ថយផលិតប្រេងចំនួន ២ លានបារ៉ែលក្នុងមួយថ្ងៃ ចាប់ពីខែវិច្ឆិកា ដើម្បីរក្សាតម្លៃឲ្យមានស្ថិរភាព បន្ទាប់ពីរងគ្រោះ ដោយសារតែកំណើនសេដ្ឋកិច្ចពិភពលោកមានសន្ទុះយឺតយ៉ាវ ៕