អ្នកសាធារណរដ្ឋ ស្តីបន្ទោសដាក់គ្នា ក្រោយដឹងលទ្ធផលបោះឆ្នោត ពាក់កណ្តាលអាណត្តិ (មានវីដេអូ)

ព័ត៌មានដែលថា គណបក្សប្រជាធិបតេយ្យគ្រប់គ្រងព្រឹទ្ធសភាអាមេរិក បន្ទាប់ពីការបោះឆ្នោតពាក់កណ្តាលអាណត្តិក្នុងសប្តាហ៍នេះ បានបង្កឲ្យមានការស្តីបន្ទោសដាក់គ្នានៅក្នុងគណបក្សសាធារណរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតប្រធានាធិបតី Donald Trump ត្រូវបានគេរិះគន់ ចំពោះការធ្វើមិនបានល្អ ខណៈអ្នកសាធារណរដ្ឋផ្សេងទៀត បានបន្ទោសមេដឹកនាំព្រឹទ្ធសភារបស់ពួកគេគឺលោក Mitch McConnell។

ទន្ទឹមនឹងនោះ សេតវិមានបានបង្ហាញច្បាស់ៗថា លោកប្រធានាធិបតី Joe Biden នឹងឈរឈ្មោះសម្រាប់ការបោះឆ្នោតអាណត្តិទី២។

ទោះបីជាយ៉ាងណាក៏ដោយ លទ្ធផលនៃការបោះឆ្នោតសភាតំណាងរាស្រ្ត នៅតែមិនទាន់ប្រកាស។

គណបក្សសាធារណរដ្ឋ នៅតែសង្ឃឹមថានឹងឈ្នះការគ្រប់គ្រងសភាជាន់ទាប ដែលនឹងរារាំងដល់ផែនការរបស់លោកប្រធានាធិបតី ចូ បៃដិន។

កាល​ពី​ចុង​សប្តាហ៍ ​សហរដ្ឋ​អាមេរិក​បាន​ព្យាករ​ថា គណបក្ស​ប្រជាធិបតេយ្យ ​បាន​កាន់​អាសនៈ​ព្រឹទ្ធសភា​ចំនួន​ពីរ​នៅ​រដ្ឋ Arizona និង​រដ្ឋ Nevada ដោយបន្ត​ការ​គ្រប់​គ្រង​សភា​ជាន់​ខ្ពស់​។

លោក Larry Hogan អភិបាលរដ្ឋ Maryland បានប្រាប់ CNN នៅថ្ងៃចន្ទទី១៤ខែវិច្ឆិកានេះថា “នេះគឺជាការបោះឆ្នោតលើកទីបីជាប់ៗគ្នាហើយ ដែលលោក Trump ធ្វើឲ្យយើងចាញ់។ គាត់និយាយថា យើងនឹងធុញទ្រាន់នឹងការឈ្នះ។ ខ្ញុំធុញទ្រាន់នឹងការចាញ់”។

ប្រវត្តិសាស្ត្របង្ហាញថា គណបក្សដែលគ្រប់គ្រងសេតវិមាន ជាធម្មតាតែងតែបាត់បង់អាសនៈនៅក្នុងការបោះឆ្នោតពាក់កណ្តាលអាណត្តិ ហើយលទ្ធផលរបស់គណបក្សប្រជាធិបតេយ្យនៅឆ្នាំនេះ ត្រូវបានចាត់ទុកថា ល្អបំផុតសម្រាប់គណបក្សដែលកាន់អំណាច ក្នុងរយៈពេលយ៉ាងតិច២០ឆ្នាំចុងក្រោយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ លោក បៃដិន៖ ការបោះឆ្នោតថ្ងៃអង្គារ គឺជាថ្ងៃល្អសម្រាប់លទ្ធិប្រជាធិបតេយ្យ