លោក បៃដិន៖ ការបោះឆ្នោតថ្ងៃអង្គារ គឺជាថ្ងៃល្អសម្រាប់លទ្ធិប្រជាធិបតេយ្យ (មានវីដេអូ)

ប្រធានាធិបតីអាមេរិកលោក ចូ បៃដិន ដែលគណបក្សប្រជាធិបតេយ្យរបស់គាត់ទទួលបានលទ្ធផលល្អប្រសើរជាងការរំពឹងទុក បាននិយាយកាលពីថ្ងៃពុធទី០៩ខែវិច្ឆិកាថា ថ្ងៃបោះឆ្នោតកាលពីថ្ងៃអង្គារគឺល្អសម្រាប់លទ្ធិប្រជាធិបតេយ្យ ប៉ុន្តែលទ្ធផលបង្ហាញថា ប្រជាជនអាមេរិកនៅតែខកចិត្ត។

លោក បៃដិន បានប្រាប់អ្នកយកព័ត៌មាននៅឯសេតវិមានថា “ខ្ញុំគិតថា វាជាថ្ងៃល្អសម្រាប់លទ្ធិប្រជាធិបតេយ្យ”។

ស្របពេលជាមួយគ្នានោះ មន្ត្រីសេតវិមានហាក់មានភាពធូរស្បើយ ដែលគណបក្សប្រជាធិបតេយ្យបានធ្វើបានល្អជាងការរំពឹងទុក បន្ទាប់ពីលោក បៃដិន បានធ្វើយុទ្ធនាការឃោសនាបោះឆ្នោតដោយផ្តោតសំខាន់ ទៅលើការការពារការគំរាមកំហែងដល់លទ្ធិប្រជាធិបតេយ្យរបស់សហរដ្ឋអាមេរិក, ការធានាសិទ្ធិរំលូតកូន និងការលើកតម្កើងគោលនយោបាយសេដ្ឋកិច្ច។

គណបក្សសាធារណរដ្ឋ ទទួលបានសំឡេងកើនឡើងតិចតួចនៅក្នុងការបោះឆ្នោតពាក់កណ្តាលអាណត្តិ ហើយទំនងជាអាចគ្រប់គ្រងសភាតំណាងរាស្រ្ត ប៉ុន្តែការគ្រប់គ្រងព្រឹទ្ធសភា គឺត្រូវពឹងផ្អែកលើការប្រកួតប្រជែងចំនួនបី ដែលនៅតែមិនទាន់អាចសន្មតបាន។

លោក បៃដិន ​និយាយ​ថា “ខ្ញុំ​បាន​ត្រៀម​ខ្លួនរួចហើយ ដើម្បី​ធ្វើ​ការ​ជាមួយគណបក្ស​សាធារណរដ្ឋ។ ​ខ្ញុំ​គិត​ថា ​ប្រជាជន​អាមេរិក​បាន​បញ្ជាក់​យ៉ាង​ច្បាស់​ថា ​ពួកគេ​រំពឹង​ថា​គណបក្ស​សាធារណរដ្ឋក៏​នឹង​ត្រៀម​ខ្លួន​ធ្វើ​ការ​ជាមួយ​ខ្ញុំ​​ដែរ”។

លោកនិយាយថា នៅពេលដែលលោកវិលត្រលប់ពីដំណើរនៅអាស៊ីវិញ លោកនឹងអញ្ជើញមេដឹកនាំគណបក្សប្រជាធិបតេយ្យ និងគណបក្សសាធារណរដ្ឋទៅកាន់សេតវិមាន ដើម្បីពិភាក្សាអំពីអាទិភាពឆ្ពោះទៅមុខ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Reuters

ចុចអាន៖ ខ្លីៗ ទាក់ទងការបោះឆ្នោតពាក់កណ្តាលអាណត្តិនៅ សហរដ្ឋអាមេរិក