ឧក្រិដ្ឋកម្មស្អប់ខ្ពើម នៅសហរដ្ឋអាមេរិក បានបន្តកើនឡើងយ៉ាងគំហុក ហើយឥឡូវនេះបានឈានដល់កម្រិតខ្ពស់បំផុតចាប់តាំងពីកំណត់ត្រាចាប់ផ្តើម។ នេះបើយោងតាមទិន្នន័យពីឆ្នាំ ២០២១ ដែលវិភាគដោយការិយាល័យស៊ើបអង្កេតសហព័ន្ធ (FBI) និងត្រូវបានចេញផ្សាយកាលពីថ្ងៃអង្គារទី១៤ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សរុបមក ឧក្រិដ្ឋកម្មស្អប់ខ្ពើមចំនួន ៩០៦៥ករណី ត្រូវបានកត់ត្រាក្នុងឆ្នាំ២០២១ ធៀបនឹង ៨១២០ ក្នុងឆ្នាំ២០២០ ពោលគឺកើនឡើង ១២%។

លោក Brian Levin នាយកមជ្ឈមណ្ឌលសិក្សាអំពីភាពស្អប់ខ្ពើម និងជ្រុលនិយមនៅសកលវិទ្យាល័យ California State-San Bernardino បានប្រាប់សារព័ត៌មាន Associated Press ថា “យើងស្ថិតក្នុងយុគសម័យពិសេស និងគួរឲ្យព្រួយបារម្ភមួយ ដែលឧក្រិដ្ឋកម្មស្អប់ខ្ពើមជាទូទៅ បានបន្តកើនឡើងកាន់តែយូរ បំបែកកំណត់ត្រា”។

ទិន្នន័យបង្ហាញថា មនុស្សស្បែកខ្មៅ គឺជាក្រុមដែលត្រូវបានគេកំណត់គោលដៅដោយការរើសអើងខ្លាំងបំផុត ពោលគឺមាន ២២៣៣ករណី នៅក្នុងរបាយការណ៍នេះ។

FBI បន្ថែមថា ៦៤,៥% នៃជនរងគ្រោះដោយឧក្រិដ្ឋកម្មស្អប់ខ្ពើម គឺត្រូវបានគេកំណត់គោលដៅដោយសារពូជសាសន៍ សញ្ជាតិ ឬពណ៌សម្បុររបស់ពួកគេ។ ក្នុងនោះ ១៥,៩% នៃករណីដែលកត់ត្រា គឺត្រូវបានផ្សារភ្ជាប់ទៅនឹងភាពលម្អៀងប្រឆាំងនឹងនិន្នាការផ្លូវភេទ និង ១៤,១% ចំពោះការរើសអើងប្រឆាំងជំនឿសាសនា។

លើសពីនេះ ក្នុងចំណោមក្រុមដែលប្រឈមមុខនឹងភាពលម្អៀងខាងសាសនា, ជនជាតិជ្វីហ្វគឺត្រូវបានរាប់បញ្ចូលជាងពាក់កណ្តាលនៃឧប្បត្តិហេតុ។ ការរើសអើងប្រឆាំងនឹងជនស្បែកសមាន ៩៤៨ករណី ពោលគឺតិចជាងសមាជិកនៃសហគមន៍ស្រឡាញ់ភេទដូចគ្នាបន្តិច។

អគ្គមេធាវីអាមេរិក Merrick Garland បានសន្យាចាត់វិធានការបន្ថែមទៀតដើម្បីធានាថា ក្រសួងយុត្តិធម៌ ពិតមានប្រសិទ្ធភាពក្នុងការប្រយុទ្ធប្រឆាំងនឹងឧក្រិដ្ឋកម្មស្អប់ខ្ពើមនៅទូទាំងប្រទេស៕

ប្រែសម្រួល៖ Vann Vann

ប្រភព៖ RT

ចុចអាន៖ អាមេរិក ប្រកាសបង្កើនការចំណាយយោធា ធំបំផុតក្នុងប្រវត្តិសាស្រ្ត