កញ្ចប់ថវិកាឆ្នាំ២០២៤ របស់ប្រធានាធិបតីអាមេរិក ចូ បៃដិន នឹងបង្កើនការចំណាយយោធាដល់កម្រិតកំណត់ត្រា ៨៤២ពាន់លានដុល្លារ។ នេះបើយោងតាមព័ត៌មាន ដែលចេញផ្សាយដោយសេតវិមាននៅថ្ងៃសុក្រទី១០ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីថ្លែងការណ៍របស់សេតវិមាន, កញ្ចប់ថវិកានេះ នឹងរួមបញ្ចូលទាំងការវិនិយោគចំនួន៩.១ពាន់លានដុល្លារ ក្នុងគម្រោង Pacific Deterrence Initiative របស់មន្ទីរបញ្ចកោណ ដែលមានគោលបំណងជំរុញវត្តមានរបស់សហរដ្ឋអាមេរិក នៅតំបន់ប៉ាស៊ីហ្វិក ដើម្បីប្រឆាំងនឹងប្រទេសចិនផងដែរ។

ទន្ទឹមនោះ ទំនើបភាវូបនីយកម្មនៃឃ្លាំងអាវុធនុយក្លេអ៊ែររបស់អាមេរិក នឹងបន្ថែមទឹកប្រាក់ចំនួន ៣៧.៧ពាន់លានដុល្លារទៀត ខណៈការចំណាយលើការសាងសង់នាវា និងការវិនិយោគនៅក្នុងបច្ចេកវិទ្យាសំខាន់ៗ​ មិនទាន់បញ្ជាក់ចំនួនប្រាកដនោះទេ។

យ៉ាងណាក្តី សេចក្តីថ្លែងការណ៍ដាច់ដោយឡែកពីសេតវិមានលើកឡើងថា ថវិការបស់លោក បៃដិន ក៏នឹងរួមបញ្ចូលទាំង ៦ពាន់លានដុល្លារសម្រាប់ប្រទេសអ៊ុយក្រែនផងដែរ ថ្វីបើមិនទាន់ច្បាស់ក៏ដោយ។

ទោះមិនមានព័ត៌មានលម្អិតបន្ថែមត្រូវបានចេញផ្សាយជាសាធារណៈ ប៉ុន្តែរដ្ឋមន្ត្រីការពារជាតិ Lloyd Austin បាននិយាយនៅក្នុងសេចក្តីថ្លែងការណ៍មួយថា ការចំណាយសរុបនឹងបន្ថែមរហូតដល់ ៨៤២ពាន់លានដុល្លារអាមេរិក។ នេះតំណាងឲ្យការកើនឡើងចំនួន២៦ពាន់លានដុល្លារបើធៀបនឹងឆ្នាំមុន និងជិត១០០ពាន់លានដុល្លារបើធៀបនឹងឆ្នាំ២០២១។

យោងតាមតួលេខថ្មីបំផុតពីវិទ្យាស្ថានស្រាវជ្រាវសន្តិភាពអន្តរជាតិ Stockholm បានឲ្យដឹងថា សហរដ្ឋអាមេរិក បានចំណាយលើវិស័យយោធារបស់ខ្លួននៅឆ្នាំ២០២១ ច្រើនជាងប្រទេសចំនួនប្រាំបួនបូកបញ្ចូលគ្នាទៅទៀត។

វិទ្យាស្ថាននេះកត់សម្គាល់ថា ថ្វីបើថវិការបស់យោធា បានកើនឡើងជារៀងរាល់ឆ្នាំចាប់តាំងពីឆ្នាំ២០១៥ និងច្រើនជាងទ្វេដងចាប់តាំងពីឆ្នាំ២០០២ក៏ដោយ ប៉ុន្តែរដ្ឋបាលរបស់សហរដ្ឋអាមេរិក បានកាត់បន្ថយមូលនិធិសម្រាប់ការផ្គត់ផ្គង់អាវុធចំនួន៦,៤% ចន្លោះឆ្នាំ២០១២ដល់ឆ្នាំ២០២១ និង ៥,៤% ចន្លោះឆ្នាំ២០២០ដល់ឆ្នាំ២០២១៕

ប្រែសម្រួល៖ Vann Vann

ប្រភព៖ RT

ចុចអាន៖ ចារកម្មអាមេរិក ព្រួយបារម្ភអំពីហានិភ័យបង្កឡើងដោយ រុស្ស៊ី