លោក Lukashenko បញ្ជាក់គោលបំណងអនុញ្ញាតឲ្យទាហានស៊ីឈ្នួល រុស្ស៊ី ចូលមក បេឡារុស

ប្រធានាធិបតីបេឡារុសលោក Alexander Lukashenko បានស្វាគមន៍ក្រុមទាហានស៊ីឈ្នួល Wagner Group និងបានបញ្ជាក់ពីគោលបំណងក្នុងការអនុញ្ញាតឲ្យក្រុមបាក់ទ័ពមួយនេះចូលមកកាន់ប្រទេសរបស់លោកផងដែរ ។

លោក Lukashenko បានលើកឡើងថា ការអនុញ្ញាតឲ្យក្រុមទាហានស៊ីឈ្នួលដែលដឹកនាំដោយលោក Yevgeny Prigozhin ចូលមកកាន់ទឹកដីនៃប្រទេសបេឡារុស ដោយសារតែប្រទេសរបស់លោកចង់រៀនពីបទពិសោធន៍ប្រយុទ្ធរបស់ក្រុមទាហានស៊ីឈ្នួលរុស្ស៊ីមួយនេះ ។

លោកប្រធានាធិបតីរូបនេះបានបញ្ជាក់ទៀតថា វានឹងមានតម្លៃមិនអាចកាត់ថ្លៃបាន ប្រសិនបើមេបញ្ជាការរបស់ទាហានស៊ីឈ្នួល Wagner Group អាចចែករំលែកនូវជំនាញយោធា ក៏ដូចជាយុទ្ធសាស្ត្រប្រយុទ្ធរបស់ពួកគេជាមួយកងទ័ពបេឡារុស ។

មុនពេលសម្រេចចិត្តធ្វើការបះបោរប្រដាប់អាវុធនៅក្នុងប្រទេសរុស្ស៊ីកាលពីសប្ដាហ៍មុន ក្រុមទាហានស៊ីឈ្នួល Wagner Group គឺជាកម្លាំងស្នូលដ៏សំខាន់ក្នុងសមរភូមិប្រយុទ្ធដណ្ដើមយកទីក្រុង Bakhmut ភាគខាងកើតប្រទេសអ៊ុយក្រែនកាលពីប៉ុន្មានខែមុននេះ ។

គួរបញ្ជាក់ថា បច្ចុប្បន្នមេក្រុមទាហានស៊ីឈ្នួល Wagner Group លោក Prigozhin កំពុងស្ថិតនៅក្នុងប្រទេសបេឡារុស បន្ទាប់ពីសម្រេចដកទ័ពចេញពីរុស្ស៊ី ក្រោយមានកិច្ចសម្របសម្រួលពីលោក Lukashenko ដែលបានចរចារកដំណោះស្រាយជាមួយលោក ពូទីន រួចមក ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ដឹងទេ រុស្ស៊ី ដាក់ទ័ពប៉ុន្មាននាក់ប្រឆាំងការបះបោរប្រដាប់អាវុធរបស់ក្រុម​ទាហានស៊ីឈ្នួល