ការដោះដូរចំណាប់ខ្មាំងនិងអ្នកទោស រវាងអ៊ីស្រាអែល ជាមួយក្រុមហាម៉ាស ត្រូវពន្យារពេល

នៅថ្ងៃព្រហស្បតិ៍ ទី២៣ខែវិច្ឆិកា មន្ត្រីជាន់ខ្ពស់អ៊ីស្រាអែលនិយាយថា ការដោះដូរពលរដ្ឋប៉ាឡេស្ទីនមួយចំនួនដែលជាប់ឃុំ នៅក្នុងពន្ធនាគារអ៊ីស្រាអែល ជាមួយចំណាប់ខ្មាំងអ៊ីស្រាអែលនៅក្នុងដៃក្រុមហាម៉ាស ត្រូវបានពន្យារពេលរហូតដល់ថ្ងៃសុក្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍មួយ លោក Tzachi Hanegbi ទីប្រឹក្សាសន្តិសុខជាតិរបស់លោក Benjamin Netanyahu បាននិយាយថា ការដោះលែងនឹងចាប់ផ្តើមតាមកិច្ចព្រមព្រៀងដើមរវាងភាគីទាំងសងខាង ប៉ុន្តែមិនមែនមុនថ្ងៃសុក្រឡើយ ។ ទោះយ៉ាងណាក្តី ភ្លាមៗមិនទាន់មានព័ត៌មានលម្អិតណាមួយ ដែលបញ្ជាក់ពីមូលហេតុនៃការពន្យារពេលនេះទេ។

សូមបញ្ជាក់ជាថ្មីថា កាលពីថ្ងៃពុធ ទី២២ខែវិច្ឆិកាថា គណៈរដ្ឋមន្ត្រី​របស់​អ៊ីស្រាអែល ​បាន​អនុម័តក្នុងសំឡេងភាគច្រើនលើ​កិច្ចព្រមព្រៀង​មួយ ​ដែល​នឹងនាំឲ្យ​មាន​ការ​ដោះលែង​ចំណាប់ខ្មាំង​ខ្លះ​ពី​តំបន់​ហ្គាហ្សា។

គណៈរដ្ឋមន្ត្រីអ៊ីស្រាអែល បានបោះឆ្នោតលើផែនការ ដែលនឹងផ្អាកការវាយលុករបស់ខ្លួននៅហ្គាហ្សា រយៈពេលច្រើនថ្ងៃ ជាថ្នូរនឹងការដោះលែងចំណាប់ខ្មាំងប្រហែល៥០នាក់ ក្នុងចំណោមចំណាប់ខ្មាំងទាំង២៤០នាក់ ដែលកំពុងស្ថិតនៅក្នុងដៃក្រុមហាម៉ាស។

ក្រោយមក អ៊ីស្រាអែល ក៏បានបញ្ចេញបញ្ជីឈ្មោះជនជាតិប៉ាឡេស្ទីនចំនួន៣០០នាក់ ដែលអាចនឹងដោះលែងតាមដំណាក់កាលក្រោមកិច្ចព្រមព្រៀងនេះ ខណៈបញ្ជីនោះមានបង្ហាញទាំងឈ្មោះ អាយុ និងបទល្មើសរបស់អ្នកដែលនឹងត្រូវដោះលែងទៀតផង។

ក្នុងចំណោមអ្នកទាំងនោះ គឺរួមមានអ្នកទោសស្រីប្រហែល៦០នាក់ ហើយភាគច្រើនក្នុងចំណោមពួកគេ គឺត្រូវបានចាប់ខ្លួនក្នុងរយៈពេលពីរឆ្នាំចុងក្រោយ។ ពួកគេភាគច្រើនត្រូវចោទប្រកាន់ពីបទបង្កគ្រោះថ្នាក់ដល់សន្តិសុខក្នុងតំបន់ ការជ្រៀតចូលទៅក្នុងទឹកដីអ៊ីស្រាអែលដោយគ្មានលិខិតអនុញ្ញាត គប់ដុំថ្ម កាន់កាប់អាវុធ និងបង្កការខូចខាតនានា៕

ប្រែសម្រួល៖ Vann Vann

ប្រភព៖ The Guardian

ចុចអាន៖ UNICEF៖ តំបន់ហ្គាហ្សា ជាកន្លែងគ្រោះថ្នាក់បំផុតលើពិភពលោក សម្រាប់កុមារ