អ៊ីស្រាអែល-ហាម៉ាស ប្រយុទ្ធគ្នាទ្រង់ទ្រាយធំ ខណៈមនុស្សស្លាប់នៅហ្គាហ្សា កើនលើស ១៨២០០នាក់

ការប្រយុទ្ធគ្នាដ៏ខ្លាំងក្លា បានកើតឡើងកាលពីថ្ងៃចន្ទទី១១ខែធ្នូ ក្នុងសង្រ្គាមបង្ហូរឈាមបំផុតមិនធ្លាប់មាននៅតំបន់ហ្គាហ្សា ខណៈគិតត្រឹមពេលនេះ មានជនជាតិប៉ាឡេស្ទីនជាង១៨២០០ នាក់ និងទាហានអ៊ីស្រាអែល១០៤នាក់ហើយ ដែលត្រូវបានរាយការណ៍ថា បាត់បង់ជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីក្រសួងសុខាភិបាល ដែលគ្រប់គ្រងដោយក្រុមហាម៉ាស, ចំនួនមនុស្សស្លាប់ចុងក្រោយគឺ ១៨២០៥នាក់ ភាគច្រើនជាស្ត្រី និងកុមារ។

សង្រ្គាមត្រូវបង្កឡើងដោយការវាយប្រហាររបស់ក្រុមហាម៉ាស កាលពីថ្ងៃទី៧ខែតុលា ដែលបានសម្លាប់មនុស្សប្រហែល១២០០នាក់ នៅភាគខាងត្បូងប្រទេសអ៊ីស្រាអែល ហើយចាប់ចំណាប់ខ្មាំងរាប់សិបនាក់ ចូលទៅក្នុងតំបន់ហ្គាហ្សា។

ហើយថ្មីៗ ចលនានេះព្រមានថា ចំណាប់ខ្មាំងនៅសល់ទាំង១៣៧នាក់ នឹងគ្មានជីវិតត្រលប់ទៅវិញឡើយ លុះត្រាតែអ៊ីស្រាអែល បំពេញតាមការទាមទាររបស់ខ្លួន និងដោះលែងអ្នកទោសប៉ាឡេស្ទីនបន្ថែមទៀត។

ការប្រយុទ្ធគ្នាទ្រង់ទ្រាយធំនៅតែបន្តក្នុងតំបន់ហ្គាហ្សា ដោយក្រុមសកម្មប្រយុទ្ធជីហាដឥស្លាមនិយាយថា ពួកគេបានបំផ្ទុះផ្ទះមួយខ្នងក្នុងទីក្រុង Khan Yunis ភាគខាងត្បូងហ្គាហ្សា ជាកន្លែងដែលទាហានអ៊ីស្រាអែល កំពុងស្វែងរកផ្លូវក្រោមដី។

គ្រាប់រ៉ុកកែតដែលបាញ់ចេញពីតំបន់ហ្គាហ្សា ក៏បានវាយប្រហារតំបន់ Holon ជាយក្រុង Tel Aviv នៃប្រទេសអ៊ីស្រាអែល ដែលបណ្តាលឲ្យជនស៊ីវិលម្នាក់រងរបួសផងដែរ។

នាយករដ្ឋមន្ត្រីអ៊ីស្រាអែល លោក Benjamin Netanyahu បានអំពាវនាវឲ្យក្រុមហាម៉ាសចុះចាញ់ឥឡូវនេះ ខណៈរដ្ឋាភិបាលរបស់លោកអះអាងថា សកម្មប្រយុទ្ធរាប់ពាន់នាក់ត្រូវបានសម្លាប់ក្នុងសង្គ្រាម ដែលបច្ចុប្បន្ន បានឈានដល់ខែទី៣ហើយ។

ភាគ​ច្រើន​នៃ​តំបន់​ហ្គាហ្សា ​ត្រូវខ្ទេចខ្ទីក្លាយ​ជា​គំនរ​បាក់បែក​ ហើយ​អង្គការ​សហប្រជាជាតិ​​ប៉ាន់​ប្រមាណ​ថា មនុស្ស១.៩លាន​នាក់​ក្នុង​ចំណោម​ប្រជាជន ២.៤លាន​នាក់ ​ត្រូវ​បាន​ផ្លាស់​ទីលំនៅ ដែលប្រហែលពាក់កណ្តាលគឺជាកុមារ៕

ប្រែសម្រួល៖ Vann Vann

ប្រភព៖ CNA

ចុចអាន៖ ហ្ស៊កដានី៖ អ៊ីស្រាអែល មិនអាចឈ្នះឡើយ