អាល្លឺម៉ង់ ​អាច​ប្រកាស​អាសន្នក្នុងប្រទេស ដោយសារ ​អ៊ុយក្រែន

អធិការបតីអាល្លឺម៉ង់លោក Olaf Scholz បានព្រមាននៅក្នុងសេចក្តីថ្លែងការណ៍របស់រដ្ឋាភិបាលទៅកាន់សភាកាលពីថ្ងៃពុធទី១៣ខែធ្នូថា ប្រទេសនេះប្រហែលជាត្រូវប្រកាសភាពអាសន្នហើយចំពោះការផ្តល់ជំនួយបន្ថែមដល់ទីក្រុងកៀវនៅឆ្នាំក្រោយ ប្រសិនបើស្ថានការណ៍នៅអ៊ុយក្រែនកាន់តែអាក្រក់ទៅៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ គណបក្សប្រឆាំង ចាត់ទុកផែនការរបស់គាត់ជា “ល្បិចហិរញ្ញវត្ថុ” ហើយប្តេជ្ញាថា នឹងមិនអនុញ្ញាតឲ្យរឿងនេះកើតឡើងដាច់ខាត។

រដ្ឋាភិបាលចម្រុះរបស់លោក Scholz ទើបតែឈានដល់កិច្ចព្រមព្រៀងលើកញ្ចប់ថវិកាឆ្នាំ២០២៤ បន្ទាប់ពីការចរចាដ៏តានតឹងអស់រយៈពេលជាច្រើនសប្តាហ៍។ គណៈរដ្ឋមន្ត្រីបានយល់ព្រមលើការគ្រប់គ្រងបំណុលដែលមានស្រាប់ ដោយកាត់បន្ថយការចំណាយប្រតិបត្តិការរបស់នាយកដ្ឋានផ្សេងៗ និងកាត់បន្ថយការឧបត្ថម្ភធនមួយចំនួនទាក់ទងនឹងអាកាសធាតុទៀតផង។

យ៉ាងណា ជំនួយផ្នែកយោធានិងហិរញ្ញវត្ថុបន្ថែមទៀតដល់ទីក្រុងកៀវ នៅតែត្រូវបានគេដាក់ជាអាទិភាពមួយក្នុងចំណោមអាទិភាពកំពូលរបស់ទីក្រុងបែរឡាំង។

លោក Scholz ប្រាប់សភាជាន់ទាប Bundestag ថា “ខ្ញុំនឹងតស៊ូមតិគាំទ្រ ប្រកបដោយនិរន្តរភាពនិងគួរឲ្យទុកចិត្តសម្រាប់អ៊ុយក្រែន ព្រោះវាក៏ពាក់ព័ន្ធនឹងសន្តិសុខរបស់អឺរ៉ុបដែរ”។

យោងតាមអធិការបតីរូបនេះ, ទីក្រុងបែរឡាំងគ្រោងចំណាយប្រាក់ប្រមាណ៨ពាន់លានអឺរ៉ូ (៨.៦៣ ពាន់លានដុល្លារ) លើសព្វាវុធសម្រាប់ទីក្រុងកៀវនៅឆ្នាំក្រោយ រួមជាមួយនឹងចំនួនទឹកប្រាក់ដែលមិនទាន់បញ្ជាក់សម្រាប់ជំនួយហិរញ្ញវត្ថុដល់អ៊ុយក្រែន និងទឹកប្រាក់៦ពាន់លានអឺរ៉ូ (៦.៤៧ ពាន់លានដុល្លារ) ដើម្បីគាំទ្រជនភៀសខ្លួនអ៊ុយក្រែន ដែលរស់នៅក្នុងប្រទេសអាល្លឺម៉ង់។

លោកក៏បានទទួលស្គាល់ដែរថា ការគាំទ្រអន្តរជាតិចំពោះទីក្រុងកៀវកំពុងតែធ្លាក់ចុះ ហើយអាចនឹងបង្ខំឲ្យទីក្រុងបែរឡាំង ចំណាយថវិកាកាន់តែច្រើនបន្ថែមទៀត ដើម្បីជួយដល់អ៊ុយក្រែន។

លោក Scholz ពន្យល់ថា “វាច្បាស់ណាស់ថា ប្រសិនបើស្ថានការណ៍កាន់តែអាក្រក់ទៅៗ ដោយសារអ្នកគាំទ្រផ្សេងទៀតដកជំនួយរបស់ពួកគេនោះ យើងត្រូវប្រតិកម្មចំពោះរឿងនេះ។ ការ​ធ្វើ​ដូច្នេះ​អាច​នឹង​តម្រូវ​ឲ្យ​រដ្ឋាភិបាល​បង្កើតលក្ខខណ្ឌ​គ្រាអាសន្ន​ពិសេស​មួយ និង​ចៀសវាង​ច្បាប់​ស្តីពី​បំណុល​ជាតិ។ យើងបានយល់ព្រមរួចហើយ ដើម្បីស្នើសុំសេចក្តីសម្រេចលើកលែងបំណុលនៅក្នុងសភាជាន់ទាប ក្នុងករណីមានរឿងបែបនេះមែន”។

ដោយអនុម័តក្នុងឆ្នាំ២០០៩, ច្បាប់សារពើពន្ធមួយ នៅក្នុងប្រទេសអាល្លឺម៉ង់ បានកំណត់ឱនភាពថវិកាជាតិត្រឹម ០.៣៥% នៃផលិតផលក្នុងស្រុកសរុប ហើយដាក់កម្រិតលើការចេញមូលបត្របំណុលរដ្ឋាភិបាលថ្មី ប៉ុន្តែលក្ខខណ្ឌពិសេសនៅតែអនុញ្ញាតឲ្យរដ្ឋាភិបាលរំលងការរឹតបន្តឹងទាំងនេះ ក្នុងករណីភាពអាសន្ន ត្រូវបានគេមើលឃើញនៅចំពោះមុខ៕

ប្រែសម្រួល៖ Vann Vann

ប្រភព៖ RT

ចុចអាន៖ អាល្លឺម៉ង់ ប្រកាសដាក់ពង្រាយកងរថក្រោះ ទៅប្រទេសនៅជាប់ រុស្ស៊ី