ព័ត៌មានអន្ដរជាតិ

មួយទសវត្សរ៍មកនេះ មានជនចំណាកស្រុកលើលោកជាង ៦៣,០០០ នាក់ស្លាប់បាត់បង់ជីវិត

បានផុស

១ year មុន

នៅ

ថ្ងៃពុធ ២៧ មីនា ២០២៤

ដោយ

ចាប់តាំងពីការកត់ត្រានាឆ្នាំ ២០១៤ មកមានជនចំណាកស្រុកជាង ៦៣,០០០ នាក់បានស្លាប់បាត់បង់ជីវិត ឬបាត់ខ្លួន ខណៈឆ្នាំ ២០២៣ គឺជាឆ្នាំដែលមានចំនួនជនចំណាកស្រុកស្លាប់ច្រើនបំផុត ។ នេះបើយោងតាមការចេញផ្សាយរបស់សារព័ត៌មាន AP នៅថ្ងៃទី២៧ ខែមីនា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាងមួយទសវត្សរ៍មុន មានការស្លាប់របស់ជនចំណាកស្រុក និងជនភៀសខ្លួន ៦០០ នាក់នៅក្នុងការលិចកប៉ាល់មេឌីទែរ៉ាណេនៅជិតឆ្នេរសមុទ្រអ៊ីតាលីបានធ្វើឲ្យពិភពលោកភ្ញាក់ផ្អើល ហើយចាប់តាំងពីនោះមកបានជំរុញឲ្យទីភ្នាក់ងារអន្តោប្រវេសន៍របស់អង្គការសហប្រជាជាតិចាប់ផ្តើមកត់ត្រាចំនួនមនុស្សស្លាប់ ឬបាត់ខ្លួន នៅពេលពួកគេរត់គេចពីជម្លោះ ការធ្វើទុក្ខបុកម្នេញ ឬភាពក្រីក្រទៅប្រទេសផ្សេងទៀត ។

រដ្ឋាភិបាលជុំវិញពិភពលោកបានសន្យាម្តងហើយម្តងទៀតក្នុងការជួយសង្គ្រោះជីវិតជនចំណាកស្រុក និងប្រយុទ្ធប្រឆាំងអ្នករត់ពន្ធ ក៏ដូចជារឹតបន្តឹងតាមព្រំដែនជាដើម ប៉ុន្តែ ១០ ឆ្នាំមកនេះ របាយការណ៍របស់អង្គការអន្តរជាតិសម្រាប់ការធ្វើចំណាកស្រុក (IOM ) ដែលកត់ត្រាលើអ្នកជនចំណាកស្រុកបាត់ខ្លួន ពេលធ្វើចំណាកស្រុក បានកើនឡើងជាលំដាប់ ។

ខណៈជិត ៦០ ភាគរយនៃការស្លាប់ដែលត្រូវបានកត់ត្រាដោយ IOM ក្នុងទសវត្សរ៍ចុងក្រោយ គឺទាក់ទងទៅនឹងការលង់ទឹក ខណៈសមុទ្រមេឌីទែរ៉ាណេ គឺជាផ្នូរជនចំណាកស្រុកដ៏ធំបំផុតរបស់ពិភពលោក ដែលមានអ្នកស្លាប់ច្រើនជាង ២៨,០០០ នាក់ត្រូវបានកត់ត្រាក្នុងទសវត្សរ៍ចុងក្រោយនេះ ។

គួរបញ្ជាក់ថា គម្រោង Missing Migrants Project របស់អឺរ៉ុបបានចាប់ផ្តើមនៅក្នុងឆ្នាំ ២០១៤ ក្នុងគោលបំណងមានការអាណិតអាសូរចំពោះទុក្ខលំបាកនៃជនចំណាកស្រុក ហើយរដ្ឋាភិបាលអ៊ីតាលីបានចាប់ផ្តើមកម្មវិធី “Mare Nostrum” ដែលជាបេសកកម្មស្វែងរក និងជួយសង្គ្រោះដល់ជីវិតមនុស្សរាប់ពាន់នាក់ ប៉ុន្តែកម្មវិធីនេះមិនស្ថិតស្ថេរទេ ហើយបេសកកម្មស្វែងរក និងជួយសង្គ្រោះនៅអឺរ៉ុបត្រូវបានកាត់បន្ថយជាលំដាប់ បន្ទាប់ពីមានការភ័យខ្លាចថា កម្មវិធីនេះនឹងលើកទឹកចិត្តអ្នករត់ពន្ធឲ្យដាក់មុខព្រួញកាន់តែខ្លាំងនៅលើទូកជនចំណាកស្រុក ៕