ព័ត៌មានអន្ដរជាតិ

ស្លាប់៣៥នាក់ ក្នុងការវាយប្រហាររបស់អ៊ីស្រាអ៊ែលនៅទីក្រុង Rafah

បានផុស

២ years មុន

នៅ

ថ្ងៃចន្ទ ២៧ ឧសភា ២០២៤

ដោយ

Chheang

យ៉ាងហោចណាស់មនុស្ស៣៥នាក់ ត្រូវបានសម្លាប់ នៅក្នុងប្រតិបត្តិការវាយប្រហាររបស់អ៊ីស្រាអ៊ែលទៅលើទីក្រុង Rafah កាលពីថ្ងៃអាទិត្យទី២៧ ខែឧសភាម្សិលមិញ។ នេះបើយោងតាមការប្រកាសរបស់ក្រសួងសុខាភិបាលនៅក្នុងតំបន់ហ្គាហ្សា។

ជនជាតិប៉ាឡេស្ទីនដែលរងរបួសនៅតំបន់ហ្គាហ្សា ថ្ងៃទី២៦ ខែឧសភា ឆ្នាំ២០២៤ (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមមន្ត្រីនៅតំបន់ហ្គាហ្សា បានឲ្យដឹងថា ការវាយប្រហារបានធ្វើឡើងចំជុំរុំភៀសខ្លួន ដែលមានជនស៊ីវិលស្នាក់នៅ។ ដោយឡែកចំពោះកងកម្លាំងការពារអ៊ីស្រាអ៊ែលវិញ បានប្រាប់ថា នៅក្នុងប្រតិបត្តិការវាយប្រហារ ខ្លួនបានសម្លាប់មេបញ្ជាការជាន់ខ្ពស់ចំនួន២នាក់របស់ក្រុមហាម៉ាស។

លោក Benjamin Netayahu បានប្រកាសថា លោកនឹងបន្តវាយលុកទាល់តែបង្ក្រាបក្រុមសកម្មប្រយុទ្ធប៉ាឡេស្ទីនឲ្យអស់ បន្ទាប់ពីក្រុមនេះបានធ្វើការវាយប្រហារលើអ៊ីស្រាអ៊ែលកាលពីថ្ងៃទី៧ ខែតុលា ឆ្នាំ២០២៣ បណ្ដាលឲ្យមនុស្សបាត់បង់ជីវិតជាង ១ ២០០នាក់។

នាយករដ្ឋមន្ត្រីអ៊ីស្រាអ៊ែលរូបនេះ មិនបានខ្វល់ខ្វាយពីសម្ពាធអន្តរជាតិចំពោះបទឈប់បាញ់ ឬក៏ការឈរក្នុងអរិភាពយោធាឡើយ ដែលទង្វើនេះបានបង្កឲ្យប្រជាជនហ្គាហ្សាជិត ៣៦ ០០០នាក់បានស្លាប់។

គួររំឭកថា កងកម្លាំងអ៊ីស្រាអែលនៅតែបិទភ្នែកខ្ទប់ត្រចៀកបន្តបើកការវាយប្រហារនៅទីក្រុង Rafah ភាគខាងត្បូងតំបន់ហ្គាហ្សាស្រ្ទីប បើទោះបីជាតុលាការយុត្តិធម៌អន្តរជាតិ (ICJ) សម្រេចចេញបញ្ជាឲ្យប្រទេសមួយនេះបញ្ឈប់ជាបន្ទាន់នូវប្រតិបត្តិការយោធារបស់ខ្លួននៅទីនោះក៏ដោយ។

ថ្ងៃដែលតុលាការ ICJ មានមូលដ្ឋាននៅទីក្រុងឡាអេចាត់វិធានការបណ្ដោះអាសន្ននេះ ក៏ជាថ្ងៃដែលអ៊ីស្រាអែលប្រកាសពីប្រតិបត្តិការយោធារបស់ខ្លួននៅភាគខាងត្បូងតំបន់ហ្គាហ្សា ហើយអ៊ីស្រាអែលថែមទាំងបញ្ជាក់ទៀតថា កម្លាំងទ័ពរបស់ខ្លួនបានកម្ចាត់ក្រុមប្រដាប់អាវុធប៉ាឡេស្ទីនហាម៉ាសនៅទីក្រុង Rafah និងក្រុមអ្នកប្រយុទ្ធរាប់សិបនាក់ទៀតនៅទក្រុង Jabalia ភាគខាងជើងហ្គាហ្សា៕

ដោយ៖ ឈាង

អានបន្ថែម៖ អ៊ីស្រាអែល បិទភ្នែកខ្ទប់ត្រចៀកបន្តវាយប្រហារនៅទីក្រុង Rafah ផ្គើនតុលាការ ICJ