រដ្ឋាភិបាល តៃវ៉ាន់ ច្រានចោលកំណែទម្រង់សភាដែលកំពុងផ្ទុះការតវ៉ា

គណៈរដ្ឋមន្ត្រីរបស់តៃវ៉ាន់នឹងច្រានចោលច្បាប់ដែលក្រុមប្រឆាំងបានអនុម័តកាលពីថ្ងៃទី២៨ ខែឧសភា ស្តីពីកំណែទម្រង់សភា ដែលរហូតមកដល់ពេលនេះបានទាញឲ្យមនុស្សរាប់ម៉ឺននាក់ផ្ទុះការតវ៉ាតាមដងផ្លូវ និងការចោទប្រកាន់ពីការជ្រៀតជ្រែករបស់ចិន ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២៩ ខែឧសភា​នេះ ។

នៅក្នុងសេចក្តីថ្លែងការណ៍មួយកាលពីថ្ងៃអង្គារ គណៈរដ្ឋមន្ត្រីបានលើកឡើងថា ច្បាប់នេះអាចបំពានរដ្ឋធម្មនុញ្ញ និងការបំបែកអំណាចរវាងស្ថាប័ននីតិប្រតិបត្តិ និងនីតិបញ្ញត្តិ ហើយនឹងបញ្ជូនត្រឡប់ទៅសភាដើម្បីពិចារណាឡើងវិញ ។

គួរបញ្ជាក់ថា ការតវ៉ាដែលជួនកាលមានការប្រឈមមុខគ្នាដោយហិង្សានៅក្នុងសភាជុំវិញការកែទម្រង់នេះ បាននិងកំពុងកើតឡើងប្រឆាំងនឹងកិច្ចខិតខំប្រឹងប្រែងរបស់ប្រទេសចិន ដែលចាត់ទុកតៃវ៉ាន់ជាទឹកដីរបស់ខ្លួន ដើម្បីជះឥទ្ធិពលលើនយោបាយកោះនេះ និងបំបែកមតិសាធារណៈរបស់តៃវ៉ាន់ ។

បើទោះបីជា គណបក្សវឌ្ឍនភាពប្រជាធិបតេយ្យ (DPP) របស់លោក Lia Ching-te បានឈ្នះការបោះឆ្នោតខែមករា ប៉ុន្តែគណបក្សនេះបានបាត់បង់សំឡេងភាគច្រើននៅក្នុងសភា ខណៈគណបក្សប្រឆាំងដ៏សំខាន់របស់តៃវ៉ាន់ គឺគណបក្ស Kuomintang (KMT) រួមជាមួយគណបក្សប្រជាជនតៃវ៉ាន់ រួមគ្នាមានអាសនៈច្រើនជាងគេ ។

ពាក់ព័ន្ធនឹងកំណែទម្រង់របស់សភាបានផ្តល់អំណាចដល់សមាជិកសភាក្នុងការស្នើសុំឲ្យយោធា ក្រុមហ៊ុនឯកជន ឬបុគ្គលនានាបញ្ចេញព័ត៌មានដែលចាត់ទុកថាពាក់ព័ន្ធនឹងសមាជិកសភា ខណៈកំណែទម្រង់នេះក៏មានការ​ដាក់ទោស​ឧក្រិដ្ឋលើ​មន្ត្រី​រដ្ឋាភិបាលដែលមើលងាយសមាជិកសភា និង​ធ្វើឲ្យបទល្មើស​នេះ​ត្រូវ​ផ្តន្ទាទោស​ដាក់​ពន្ធនាគារផងដែរ ហើយ​តម្រូវឲ្យប្រធានាធិបតី​ផ្តល់​របាយការណ៍​ទៀងទាត់​ដល់​សភា និង​ឆ្លើយ​សំណួរ​សមាជិកសភា ។

គួរបញ្ជាក់ថា គណបក្ស DPP និងអ្នកតវ៉ាជាច្រើននាក់បានចោទប្រកាន់បក្ស KMT ម្តងហើយម្តងទៀតស្ថិតនៅក្នុងសម្ព័ន្ធភាពជាមួយទីក្រុងប៉េកាំងក្នុងការព្យាយាមរំលោភលើច្បាប់នេះ ។ មេដឹកនាំជាន់ខ្ពស់របស់បក្ស KMT ជាច្រើននាក់បានទៅធ្វើទស្សនកិច្ចនៅប្រទេសចិនក្នុងឆ្នាំនេះ ដែលជាកិច្ចខិតខំប្រឹងប្រែងដើម្បីរក្សាទំនាក់ទំនងជាមួយចិន ។ ទោះបីជាយ៉ាងណា បក្ស KMT បានបដិសេធយ៉ាងដាច់អហង្ការថា មិនគាំទ្រទីក្រុងប៉េកាំង ហើយអះអាងថាកំណែទម្រង់សភាគឺសំដៅធ្វើឲ្យប្រសើរឡើងនូវការទទួលខុសត្រូវរបស់រដ្ឋាភិបាលប៉ុណ្ណោះ ៕

អត្ថបទ៖ ប៊ុន សុភាព