ព័ត៌មានអន្ដរជាតិ

របបសឹកមីយ៉ាន់ម៉ា ចាប់ថៅកែ១០នាក់ដាក់គុក ព្រោះដំឡើងប្រាក់ខែឲ្យបុគ្គលិក

បានផុស

៣ ខែ មុន

នៅ

ថ្ងៃពុធ ៣ កក្កដា ២០២៤

ដោយ

របបសឹកនៅមីយ៉ាន់ម៉ា បានចាប់ខ្លួនមនុស្សយ៉ាងហោចណាស់ចំនួន ១០នាក់ ពាក់ព័ន្ធនឹងការដំឡើងប្រាក់ខែឲ្យបុគ្គលិក កាលពីពេលថ្មីៗកន្លងទៅ។ ករណីចុងក្រោយបំផុត ដែលទើបកើតឡើងនៅដើមខែកក្កដានេះ គឺការឃាត់ខ្លួនបុរសម្នាក់ឈ្មោះ Pyae Phyo Zaw បន្ទាប់ពីថៅកែហាងទូរសព្ទរូបនេះ បានប្រកាសដំឡើងប្រាក់ខែឲ្យបុគ្គលិកខ្លួន នៅលើបណ្ដាញសង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់សារព័ត៌មាន The New York Times កាលពីថ្ងៃទី១ ខែកក្កដា ឆ្នាំ២០២៤ លោក Pyae Phyo Zaw ជាម្ចាស់ហាងទូរសព្ទចំនួន៣កន្លែង នៅទីក្រុង Mandalay ដែលបានបង្ហោះសារលើហ្វេសប៊ុកជូនដំណឹងល្អពីការដំឡើងប្រាក់ខែដល់បុគ្គលិក។ ផ្ទុយពីការសារទរ របបសឹកមីយ៉ាន់ម៉ាបែរជាបញ្ជាឲ្យចាប់ខ្លួនលោក Pyae ហើយថែមទាំងបិទហាងទូរសព្ទទាំងអស់របស់លោកទៀតផង។ របបសឹកមីយ៉ាន់ម៉ា បានចោទប្រកាន់លោក Pyae ពីបទញុះញង់ឲ្យមានចលាចល។

នៅខាងក្រៅហាងទូរសព្ទរបស់លោក Pyae ត្រូវទាហានបិទស្លាកមួយ សរសេរថា មូលហេតុនៃការបិទព្រោះរំខានដល់ “សន្តិភាព និងសណ្ដាប់ធ្នាប់សង្គម”។

លោក Pyae គឺជាបុគ្គលម្នាក់ក្នុងចំណោមមនុស្សយ៉ាងហោចណាស់១០នាក់ ដែលត្រូវបានចាប់ខ្លួននៅក្នុងប្រទេសមីយ៉ាន់ម៉ា ពាក់ព័ន្ធនឹងការដំឡើងប្រាក់ខែឲ្យបុគ្គលិក។ ការដំឡើងប្រាក់ខែ មិនខុសច្បាប់នោះទេ ប៉ុន្តែពួកគេត្រូវបានចោទប្រកាន់ពីបទបំផ្លាញរបបគ្រប់គ្រងយោធា ដែលធ្វើឲ្យប្រជាពលរដ្ឋជឿជាក់ថា អតិផរណាកំពុងកើនឡើងពិតមែន។ ទោសដែលអ្នកជំនួញទាំង១០រូបប្រឈម គឺអាចជាប់ពន្ធនាគាររយៈពេល៣ឆ្នាំ។

សូមបញ្ជាក់ថា មីយ៉ាន់ម៉ា បានធ្លាក់ចូលទៅក្នុងភាពចលាចល ចាប់តាំងពីរដ្ឋប្រហារកាលពីខែកុម្ភៈ ឆ្នាំ២០២១មកម៉្លេះ ដែលបង្កជាការតវ៉ាប្រឆាំងទូទាំងប្រទេស ហើយបណ្ដាលឲ្យកើតមានជាជម្លោះប្រដាប់អាវុធថែមទៀតផង។ ភាពក្រីក្រនៅមីយ៉ាន់ម៉ា បានកើនឡើងខ្ពស់បំផុតជាងឆ្នាំណាណាទាំងអស់ ក្នុងរយៈពេល៦ឆ្នាំចុងក្រោយនេះ៕

ដោយ៖ ឈាង

Related Topics:ប្រទេសមីយ៉ាន់ម៉ា