កងទ័ពថៃ គ្រោងទិញអាវុធច្រើនប្រភេទថែមទៀត ទុកការពារជាតិ ៣ឆ្នាំខាងមុខ

កងទ័ពថៃ បានដាក់ចេញនូវសំណើសម្រាប់ឆ្នាំ២០២៤ ដោយក្នុងនោះ មានការអំពាវនាវសុំទិញអាវុធជាច្រើនប្រភេទ រួមទាំងយន្តហោះគ្មានមនុស្សបើកប្រដាប់អាវុធផងដែរ ដើម្បីដោះស្រាយបញ្ហាប្រឈមផ្នែកសន្តិសុខរបស់ប្រទេស ក្នុងរយៈពេល៣ឆ្នាំខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bangkok Post​ កាលពីថ្ងៃអាទិត្យទី២៨ខែកក្កដាឆ្នាំ២០២៤ សំណើនេះបានគូសបញ្ជាក់ថា កងទ័ពត្រូវការអាវុធដើម្បីការពារជាតិ ពីការគំរាមកំហែងគ្រប់ប្រភេទ។

ត្បិតតែសំណើខាងលើបានបង្ហាញពីប្រភេទអាវុធនិងឧបករណ៍ពាក់ព័ន្ធក៏ពិតមែន ប៉ុន្តែវាមិនបញ្ចូលព័ត៌មានលម្អិតខ្លាំងណាស់ណាពេកទេ។

យ៉ាងណាក្តី គេមើលឃើញថា ក្រៅពីយន្តហោះគ្មានមនុស្សបើក និងឧទ្ធម្ភាគចក្រវាយប្រហារ, សំណើនេះបានបញ្ជាក់ថា កងទ័ពក៏ត្រូវការរថក្រោះ រថពាសដែក ឧទ្ធម្ភាគចក្រល្បាត យន្តហោះដឹកជញ្ជូន ប្រព័ន្ធរ៉ាដាការពារ ប្រព័ន្ធត្រួតពិនិត្យដែនដី និងឧបករណ៍ស៊ើបការណ៍និងទំនាក់ទំនង ដែលមានសមត្ថភាពល្អជាងមុនផងដែរ។

ពាក់ព័ន្ធបញ្ហានេះ អគ្គមេបញ្ជាការកងទ័ព លោកឧត្តមសេនីយ៍ Charoenchai Hinthao និយាយថា សំណើត្រូវបានផ្សព្វផ្សាយ ដើម្បីឲ្យសាធារណជនទូទៅ ទទួលស្គាល់និងយល់ឲ្យកាន់តែច្បាស់ពីតួនាទីរបស់កងទ័ព និងក្របខ័ណ្ឌអភិវឌ្ឍរបស់ខ្លួន ហើយបញ្ជី​អាវុធនេះទៀតសោត ​គឺ​ផ្អែក​លើ​បញ្ហា​ប្រឈម​ដែល​អាច​កើត​មាន​ចាប់​ពី​ពេល​បច្ចុប្បន្ន​ដល់​ឆ្នាំ២០២៧។

សូមបញ្ជាក់ថា ក្នុងឆ្នាំ២០២៣ កញ្ចប់ថវិកាការពារជាតិរបស់ប្រទេសថៃ មានចំនួន ៥.៨៩ ពាន់លានដុល្លារអាមេរិក, ថយចុះបន្តិចបើធៀបនឹងឆ្នាំ២០២២ ដែលមានប្រហែល ៦.០៦ពាន់លានដុល្លារអាមេរិក ហើយកញ្ចប់ថវិកា ត្រូវគេព្យាករថានឹង កើនឡើងបន្តិចវិញក្នុងឆ្នាំ២០២៤នេះ ពោលអាចឈានដល់ប្រហែល ៦.០១ពាន់លានដុល្លារអាមេរិក៕

អត្ថបទ៖ សុខ សុវណ្ណ

ចុចអាន៖ ថៃ នៅ​តែ​ជា​ប្រភពចម្បង​នាំ​គ្រឿងញៀន​​ចូល​ទឹក​ដី​កូរ៉េ​ខាង​ត្បូង