ព័ត៌មានអន្ដរជាតិ

មិនដល់១សប្ដាហ៍ ជប៉ុនត្រូវបានឈ្លានពានដោយចិនចំនួន២លើក

បានផុស

២ years មុន

នៅ

ថ្ងៃអាទិត្យ ១ កញ្ញា ២០២៤

ដោយ

Chheang

ជប៉ុនសម្ដែងការមិនពេញចិត្តជាខ្លាំង បន្ទាប់ពីនាវាល្បតកងទ័ពចិន១គ្រឿងបានបើកចូលដែនទឹកជប៉ុនកាលពីថ្ងៃទី៣១ខែសីហា ដែលនេះគឺជាការលុកលុយលើកទី២របស់យោធាក្រុងប៉េកាំងក្នុងរយៈពេលមិនដល់១សប្តាហ៍ផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកើនឡើងនៃសកម្មភាពយោធារបស់ចិននៅជិតប្រទេសជប៉ុន និងជុំវិញកោះតៃវ៉ាន់ក្នុងប៉ុន្មានឆ្នាំថ្មីៗនេះ បានធ្វើឲ្យមានការព្រួយបារម្ភសម្រាប់រដ្ឋាភិបាលក្រុងតូក្យូ។

ជប៉ុនបានពង្រឹងការការពារជាតិរបស់ខ្លួន ដែលមានគោលបំណងរារាំងក្រុងប៉េកាំងពីការប្រើកម្លាំងយោធាដើម្បីជំរុញការទាមទារអធិបតេយ្យភាពរបស់ខ្លួនក្នុងដែនទឹកជម្លោះ។

ក្រសួងការពារជាតិជប៉ុន បានប្រកាសថា នាវាចិនត្រូវបានគេសង្កេតឃើញនៅឆ្នេរសមុទ្រនៃខេត្ត Kagoshima ភាគនិរតីនៃប្រទេសជប៉ុននៅម៉ោងប្រហែល ៦ព្រឹកម៉ោងក្នុងស្រុក ហើយបានចាកចេញវិញនៅ២ម៉ោងបន្ទាប់។

ចំណែកក្រសួងការបរទេសជប៉ុន បានលើកឡើងនៅក្នុងសេចក្តីថ្លែងការណ៍មួយថា ទីក្រុងតូក្យូបានសម្ដែង «ការព្រួយបារម្ភ និងការតវ៉ាយ៉ាងខ្លាំងចំពោះឧបទ្ទវហេតុនេះ» ជាមួយមន្ត្រីស្ថានទូតចិន ដែលបានរៀបរាប់ផងដែរអំពីការឈ្លានពានដែនអាកាសជាលើកដំបូងដោយយន្តហោះយោធាចិនកាលពីថ្ងៃទី២៦ខែសីហា។

ទីក្រុងតូក្យូ បានប្រាប់មន្ត្រីការទូតចិននៅដើមសប្តាហ៍នេះថា ការរំលោភលើដែនអាកាសថ្ងៃទី២៦ខែសីហាគឺជារឿងដែល «មិនអាចទទួលយកបានទាំងស្រុង»។

បើយោងតាមទូរទស្សន៍ជាតិ NHK ឧបទ្ទវហេតុថ្ងៃទី៣១ខែសីហា គឺជាលើកទី១០ហើយគិតចាប់តាំងពីឆ្នាំ២០២៣ ដែលនាវាល្បាតរបស់កងទ័ពចិន បានធ្វើដំណើរឆ្លងកាត់ដែនទឹករបស់ប្រទេសជប៉ុន ហើយក៏ជាលើកទី១៣ផងដែរ បើរាប់ទាំងការឈ្លានពានរបស់នាវាមុជទឹក និងនាវាស៊ើបការណ៍សម្ងាត់ផ្សេងទៀតរបស់ចិន៕

ដោយ៖ ឈាង