ព័ត៌មានអន្ដរជាតិ

ថៃ គ្រោងសង់ផ្លូវរថភ្លើងចំនួន៩ខ្សែ តម្លៃជាង១៩ពាន់លានដុល្លារ

បានផុស

២ years មុន

នៅ

ថ្ងៃសុក្រ ៦ កញ្ញា ២០២៤

ដោយ

Chheang

គម្រោងផ្លូវដែកចំនួន៩ រួមទាំងខ្សែរថភ្លើងល្បឿនលឿនថៃ-ចិនដំណាក់កាលទី២ប្រវែង៣៥៧គីឡូម៉ែត្រ នឹងត្រូវដាក់ស្នើសម្រាប់ការអនុម័តពីគណៈរដ្ឋមន្ត្រីនៅខែតុលាក្រោយ។ នេះបើយោងតាមអនុរដ្ឋមន្ត្រីក្រសួងដឹកជញ្ជូន លោក Surapong Piyachote ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Piyachote បានប្រាប់ថា គម្រោងទាំង៩ត្រូវការការវិនិយោគសរុបចំនួន ៦៦១ពាន់លានបាត ឬស្មើនឹងជាង ១៩ពាន់លានដុល្លារ ហើយក្នុងចំណោមគម្រោងទាំងអស់ មានគម្រោងផ្លូវរថភ្លើងទាំងទៅទាំងមកចំនួន៦ ដែលត្រូវការប្រាក់ ២៩៨ពាន់លានបាត។

គម្រោងផ្លូវដែកទាំង៦ខ្សែ មានដូចជា ផ្លូវដែក Paknam Pho-Den Chai ប្រវែង២៨៥គីឡូម៉ែត្រ ផ្លូវដែក Chumphon-Surat Thani ប្រវែង១៦៨គីឡូម៉ែត្រ ផ្លូវដែក Surat Thani-Hat Yai ប្រវែង១៨៩គីឡូម៉ែត្រ ផ្លូវដែក Thanon Chira Juction-Ubon Ratchathani ប្រវែង៣០៨គីឡូម៉ែត្រ ផ្លូវដែក Hat Yai Junction-Padang Besar ប្រវែង៤៥គីឡូម៉ែត្រ និងផ្លូវដែក Denchai-Chiang Mai ប្រវែង១៨៩គីឡូម៉ត្រ។

គម្រោង២ទៀតកំពុងត្រូវបានរៀបចំសម្រាប់ការពង្រីកជាយក្រុងនៃប្រព័ន្ធខ្សែបន្ទាត់ក្រហម (Red Line) របស់ទីក្រុងបាងកក ដែលត្រូវការថវិកាសរុប ២១,៦ពាន់លានបាត។

អនុរដ្ឋមន្ត្រីក្រសួងដឹកជញ្ជូន បានបន្ថែមថា គម្រោងសាងសង់ផ្លូវដែកដ៏សំខាន់មួយទៀតគឺដំណាក់កាលទី២នៃប្រព័ន្ធរថភ្លើងល្បឿនលឿនថៃ-ចិន ដែលនឹងសាងសង់ពីខេត្តនគររាជសីមា ទៅខេត្តណងខៃ ក្នុងតម្លៃប៉ាន់ស្មាន ៣៤១,៣ពាន់លានបាត។ ការដេញថ្លៃសម្រាប់ដំណាក់កាលទី២នៃគម្រោងរថភ្លើងល្បឿនលឿននេះ ត្រូវបានគេរំពឹងថានឹងប្រព្រឹត្តទៅនៅចុងឆ្នាំ២០២៤ ដោយការសាងសង់ទំនងជានឹងបញ្ចប់នៅចុងឆ្នាំ២០២៨ខាងមុខ។

ការសាងសង់ផ្លូវរថភ្លើងល្បឿនលឿនដំណាក់កាលទី១ប្រវែង២៥០គីឡូម៉ែត្រពីទីក្រុងបាងកក ទៅនគររាជសីមា ដែលបានចាប់ផ្តើមជាផ្លូវការនៅថ្ងៃទី២១ខែធ្នូឆ្នាំ២០១៧ បានធ្វើរួចរាល់ត្រឹមតែ ៣៤,៩% ប៉ុណ្ណោះ។ នេះបើយោងតាមការអាប់ដេតចុងក្រោយនៅលើវិបសាយផ្លូវការរបស់គម្រោងកាលពីថ្ងៃទី២៥ខែកក្កដា៕

ដោយ៖ ឈាង

Related Topics:ប្រទេសថៃ