ព័ត៌មានអន្ដរជាតិ

សត្វព្រៃច្រើនប្រភេទរួចពីសួនសត្វ ស្របពេលទឹកជំនន់បង្កការលិចលង់នៅនីហ្សេរីយ៉ា

បានផុស

២ years មុន

នៅ

ថ្ងៃពុធ ១១ កញ្ញា ២០២៤

ដោយ

មន្ត្រីមកពីសួនសត្វមួយកន្លែងនៅភាគឦសានប្រទេសនីហ្សេរីយ៉ា បានបញ្ជាក់ថា សត្វព្រៃមួយចំនួនបានរត់ចេញពីការបង្ខាំង បន្ទាប់ពីទឹកជំនន់វាយប្រហាររដ្ឋ Borno យ៉ាងធ្ងន់ធ្ងរជាច្រើនសប្តាហ៍។ យោងការចេញផ្សាយរបស់សារព័ត៌មាន BBC នៅថ្ងៃទី១១ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Ali Donbest អ្នកគ្រប់គ្រងសួនសត្វ Sanda Kyarimi បានឲ្យដឹងថា មន្ត្រីសួនសត្វមិនទាន់ដឹងច្បាស់ថាមានសត្វប៉ុន្មានក្បាលដែលបានរួចចេញនោះទេ ប៉ុន្តែការតាមចាប់មកវិញកំពុងដំណើរការនិងកំពុងកំណត់ទីតាំងពួកវា។ វីដេអូនៃសត្វមួយចំនួននៅតាមដងផ្លូវនៃរដ្ឋធានី Maiduguri ត្រូវបានគេចែករំលែកយ៉ាងទូលំទូលាយលើបណ្តាញសង្គម ក្នុងនោះមានសត្វអូទ្រីសមួយក្បាលត្រូវបានគេប្រទះឃើញ ដោយអាជ្ញាធរណែនាំប្រជាពលរដ្ឋឱ្យមានការប្រុងប្រយ័ត្ន។

លើសពីនេះក៏មានការរាយការណ៍ពីការប្រទះឃើញសត្វក្រពើនៅតាមផ្លូវ ប៉ុន្តែខាងសួនសត្វមិនអាចទៅដល់ទីនោះបានទេដោយសារទឹកជំនន់។ យោងតាមអ្នកគ្រប់គ្រងសួនសត្វដដែលក៏បានឲ្យដឹងដែរថា ទ្រុងតោ និងកូនស្វាក៏ត្រូវបានជន់លិចដោយសារទឹកជំនន់ផងដែរ ប៉ុន្តែមិនទាន់ដឹងថាតើវាបានរត់គេចឬអត់នោះទេ។

លោកបានបន្ថែមថា ទឹកជំនន់បានបំផ្លាញជញ្ជាំងខ្លះរបស់សួនសត្វ ដែលអនុញ្ញាតឱ្យសត្វចេញបានដោយសេរី។ ទោះយ៉ាងណាក៏ដោយ មិនមែនសត្វទាំងអស់ដែលប្រទះឃើញនៅតាមដងផ្លូវអាចមកពីសួនសត្វនោះទេ ខណៈខាងសួនសត្វទទួលបានរបាយការណ៍ថា សត្វត្រយ៉ងត្រូវបានគេឃើញនៅកន្លែងមួយ ប៉ុន្តែនៅក្នុងសួនសត្វមិនមានសត្វត្រយ៉ងនោះទេ ដូច្នេះទឹកក៏អាចនាំយកសត្វពីកន្លែងផ្សេងទៀតផងដែរ។

គួរបញ្ជាក់ថា នៅក្នុងរដ្ឋធានី Maiduguri កំពុងជួបប្រទះទឹកជំនន់ក្នុងកម្រិតមួយដែលមិនធ្លាប់មានក្នុងរយៈពេល៣ ទសវត្សរ៍មកហើយ ជាមួយនឹងមនុស្សជាច្រើនបានបង្ខំឱ្យចាកចេញពីផ្ទះរបស់ពួកគេ។ អ្នកស្រុក ក៏កំពុងមានការភ័យខ្លាចជួបសត្វព្រៃ ដោយសារមានសត្វព្រៃរួចចេញពីសួនសត្វបែបនេះ ខណៈប្រជាពលរដ្ឋជាច្រើនបានបោះបង់ចោលផ្ទះដោយសារទឹកជំនន់ ទៅស្នាក់នៅកន្លែងផ្សេង។ ទោះជាយ៉ាងណាមកដល់ពេលនេះ មិនទាន់មានរបាយការណ៍ណាមួយដែលបញ្ជាក់ថាមានសត្វវាយប្រហារមនុស្សនោះទេ។

នេះជាឧប្បត្តិហេតុចុងក្រោយបង្អស់ក្នុងគ្រោះទឹកជំនន់ដែលបានវាយប្រហារប្រទេសនីហ្សេរីយ៉ានាពេលថ្មីៗនេះ ខណៈទីភ្នាក់ងារគ្រប់គ្រងគ្រោះអាសន្នជាតិរបស់ប្រទេសនីហ្សេរីយ៉ា បាននិយាយថា មនុស្សជាង ១៧០នាក់បានស្លាប់ និងរាប់ម៉ឺននាក់ត្រូវបានបង្ខំឱ្យចាកចេញពីផ្ទះរបស់ពួកគេនៅទូទាំងប្រទេស៕