ទឹកជំនន់ដ៏សាហាវ សម្លាប់មនុស្ស១១៥ នាក់នៅ នីហ្សេរីយ៉ា

ទឹកជំនន់ដ៏ខ្លាំងបានឆក់យកជីវិតមនុស្សចំនួន១១៥ នាក់នៅក្នុងទីក្រុង Mokwa នៃប្រទេសនីហ្សេរីយ៉ា បន្ទាប់ពីមានភ្លៀងធ្លាក់ខ្លាំង និងបាក់ទំនប់វារីអគ្គិសនីកាលពីដើមសប្តាហ៍នេះ។ នេះបើយោងតាមការចេញផ្សាយរបស់សារព័ត៌មាន​Al Jazeera​​ នៅថ្ងៃទី៣១ខែឧសភា។

ផ្ទះរាប់ពាន់ខ្នងត្រូវបានបំផ្លាញ ហើយអ្នកស្រុកជាច្រើននៅតែបាត់ខ្លួន ខណៈប្រតិបត្តិការជួយសង្គ្រោះនៅតែបន្ត។ក្រុមមន្ត្រីសង្គ្រោះបន្ទាន់បាននិយាយថាចំនួនអ្នកស្លាប់នឹងកើនឡើងដោយសារសាកសពជាច្រើននៅតែស្ថិតនៅក្នុងទន្លេ Niger។

ទឹកជំនន់ដែលបង្កឡើងដោយភ្លៀងធ្លាក់ខ្លាំងជាច្រើនម៉ោងនេះ បានគ្របដណ្ដប់លើហេដ្ឋារចនាសម្ព័ន្ធក្នុងស្រុក និងបានបង្ហាញពីបញ្ហារ៉ាំរ៉ៃរបស់ប្រទេសនេះជាមួយនឹងប្រព័ន្ធបង្ហូរទឹក និងការត្រៀមលក្ខណៈសម្រាប់គ្រោះមហន្តរាយ។

ទីភ្នាក់ងារឧតុនិយមនីហ្សេរីយ៉ាបានព្រមានអំពីទឹកជំនន់ភ្លាមៗនៅក្នុងរដ្ឋចំនួន ១៥​​ ផ្សេងទៀតផងដែរ ដោយបង្ហាញពីភាពញឹកញាប់នៃបញ្ហាអាកាសធាតុដែលទាក់ទងនឹងការប្រែប្រួលអាកាសធាតុ។ មន្ត្រី​បារម្ភ​ថា​ទឹកជំនន់កាន់តែ​អាក្រក់​ទៅៗ​ព្រោះ​រដូវវស្សា​ដែល​មាន​រយៈពេល​៦​ខែ ហើយគ្រោះមហន្តរាយនេះបានកើតឡើងក្នុងពេលរដូវវស្សា​ទើបតែ​ចាប់ផ្តើមប៉ុណ្ណោះ​។

កាលពីឆ្នាំមុន ប្រទេសនីហ្សេរីយ៉ាក៏បានប្រឈមនឹងគ្រោះមហន្តរាយទឹកជំនន់ដ៏អាក្រក់បំផុតរបស់ខ្លួនផងដែរ ដោយមានអ្នកស្លាប់ជាង ១,២០០ នាក់ និងជាងមួយលាននាក់បានផ្លាស់ទីលំនៅ។ ទោះបីជាមានការព្រមានប្រចាំឆ្នាំក៏ដោយ ក៏សហគមន៍ដែលងាយរងគ្រោះជាច្រើននៅតែមានហានិភ័យដោយសារតែហេដ្ឋារចនាសម្ព័ន្ធមិនគ្រប់គ្រាន់ និងផែនការសង្គ្រោះបន្ទាន់យឺតយ៉ាវ៕

អត្ថបទ៖ ប៊ុន សុភាព