​អាជ្ញាធរ​​ស៊ើប​រក​មូលហេតុ​នាំឱ្យ​បាក់ស្ពានស្រស់​ៗ​​នៅ​អាល្លឺម៉ង់​

ស្ពាន​មួយ​នៅភាគខាងកើតប្រទេសអាល្លឺម៉ង់​បាន​បាក់​មួយ​ផ្នែក​​​បង្កការ​ភ័យខ្លាច​​និងរំខានចរាចរណ៍ ប៉ុន្តែ​​​ហេតុការណ៍​នេះ​មិន​បង្ក​គ្រោះថ្នាក់​​​​ដល់​​អ្នកដំណើរ​ណាម្នាក់​ទេ​​ ខណៈក្រុមមន្ត្រីកំពុងស៉ើបអង្គេត។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១២ខែកញ្ញានេះ។

ក្រុមមន្ត្រីកំពុងស៊ើបអង្កេតដើម្បី​រក​មូល​ហេតុ​ដែល​​នាំ​ឱ្យ​ស្ពានបេតុងមួយផ្នែកនៃស្ពាន Carola បានបាក់​ធ្លាក់ចូលទៅក្នុងទន្លេ Elbe ភាគខាងកើតប្រទេសអាឡឺម៉ង់កាលពីព្រឹកថ្ងៃពុធ ដែលរំខានដល់​ការ​ធ្វើ​ចរាចរណ៍ដ៏សំខាន់នៅទីក្រុង Dresden។ ទោះបីជាយ៉ាងណាហេតុការណ៍នេះមិនបានបង្កឲ្យមានមនុស្សរងរបួសនោះទេ។

បន្ទាប់បីការបាក់ស្ពាននេះបណ្ដាលឲ្យមានការបិទស្ពានទាំងមូលជាបន្ទាន់ បានធ្វើឱ្យការធ្វើដំណើរសម្រាប់ប្រព័ន្ធរថភ្លើងរបស់ទីក្រុង ក៏ដូចជាអ្នកបើកបរ អ្នកថ្មើរជើង និងអ្នកជិះកង់ប្ដូរផ្លូវធ្វើដំណើររវាងទីក្រុង Dresden និង New Town។ ចរាចរណ៍តាមទូកក៏ត្រូវផ្អាកដែលប៉ះពាល់ដល់កប៉ាល់ដឹកទំនិញ និងនាវាទេសចរណ៍ ខណៈដែលមានរថភ្លើងចុងក្រោយបានឆ្លងកាត់ស្ពាននេះត្រឹមតែ១៨នាទីប៉ុណ្ណោះមុនពេលបាក់រលំ។

ជាមួយគ្នានេះបំពង់ដែលជាផ្នែកមួយនៃប្រព័ន្ធកំដៅក្នុងទីក្រុងក៏ត្រូវបានខូចខាតផងដែរ ហើយដោយសារតែការផ្ទុះបំពង់កំដៅតំបន់ធំពីរ មានបញ្ហាការផ្គត់ផ្គង់ទឹកក្តៅដែលបានឈប់ដំណើរការទាំងស្រុងនៅក្នុងទីក្រុង Dresden។

គួរបញ្ជាក់ថាផ្នែកដែលបានធ្លាក់ចុះ គ្រោងនឹងជួសជុលឡើងវិញនៅឆ្នាំក្រោយ ខណៈដែលផ្នែកផ្សេងទៀតបានបើកឡើងវិញក្នុងខែមីនា បន្ទាប់ពីការសាងសង់ជាច្រើនខែ។ យោងតាមទីភ្នាក់ងារព័ត៌មានអាល្លឺម៉ង់ dpa បានឱ្យដឹងថា ប៉ូលិសកំពុងចាត់ទុកការបាក់រលំនេះថាជាឧបទ្ទវហេតុ ពីព្រោះមិនមានសញ្ញាបញ្ជាក់ពីមូលហេតុផ្សេងទៀតនោះទេ។

បើយោងតាម dpa ស្ពាននេះមានអាយុកាលតាំងពីសម័យកុម្មុយនិស្តអាល្លឺម៉ង់ខាងកើត ខណៈការច្រេះនិងភាពចាស់របស់វាតាំងពីសម័យនោះអាចរួមចំណែកដល់ការបាក់រលំនេះផងដែរ៕

អត្ថបទ៖ ប៊ុន សុភាព