ព័ត៌មានអន្ដរជាតិ

អ៊ីរ៉ង់ធ្វើព្យុហយាត្រាទូទាំងប្រទេសបង្ហាញមីស៊ីលនិងដ្រូនទើបធ្វើទំនើបកម្ម ចំពេលអ៊ីស្រាអែលវាយប្រហារហេសបូឡា

បានផុស

២ years មុន

នៅ

ថ្ងៃសៅរ៍ ២១ កញ្ញា ២០២៤

ដោយ

ស្របពេលតំបន់មជ្ឈិមបូព៌ាបានឈានដល់ចំណុចតាងតឹងកំពូលដោយសារអ៊ីស្រាអែលកំពុងវាយប្រហារលើក្រុមសកម្មប្រយុទ្ធហេសបូឡាដែលគាំទ្រដោយអ៊ីរ៉ង់ ប្រទេសអ៊ីរ៉ង់ដែលជាសត្រូវរបស់អ៊ីស្រាអែលនិងសហរដ្ឋអាមេរិក បង្ហាញយន្តហោះគ្មានមនុស្សបើកថ្មី និងមីស៊ីលផ្លោងដ៏មានឥទ្ធិពលចុងក្រោយដែលទំនងប្រុងសងសឹកលើអ៊ីស្រាអែល។

ប្រព័ន្ធផ្សព្វផ្សាយរដ្ឋអ៊ីរ៉ង់ បាននិយាយថា អ៊ីរ៉ង់បានដាក់បង្ហាញកាំជ្រួចផ្លោងថ្មីមួយ និងយន្តហោះគ្មានមនុស្សបើក(ដ្រូន)វាយប្រហារ ដែលត្រូវបានធ្វើឱ្យប្រសើរឡើងនៅឯព្យុហយាត្រាយោធាមួយនៅថ្ងៃទី២១ខែកញ្ញា ចំពេលមានភាពតានតឹងក្នុងតំបន់កើនឡើង និងការចោទប្រកាន់អំពីការបំពាក់អាវុធដល់ប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលអ៊ីរ៉ង់ត្រូវបានរដ្ឋាភិបាលបស្ចឹមប្រទេសចោទប្រកាន់ជារឿយៗថា បានផ្គត់ផ្គង់ទាំងយន្តហោះគ្មានមនុស្សបើកនិងកាំជ្រួចដល់រុស្ស៊ីសម្រាប់ប្រើប្រាស់ក្នុងសង្គ្រាមជាមួយអ៊ុយក្រែនដែលជាការចោទប្រកាន់ដែលអ៊ីរ៉ង់បានបដិសេធម្តងហើយម្តងទៀត ប៉ុន្តែទំនាក់ទំនងរុស្ស៊ី-អ៊ីរ៉ង់ពិតជាបានធ្វើពង្រឹងយ៉ាងខ្លាំងក្នុងអំឡុងពេលនេះ។

ទីភ្នាក់ងារព័ត៌មានរដ្ឋអ៊ីរ៉ង់ IRNA បាននិយាយថា មីស៊ីល Jihad ដែលដំណើរការដោយឥន្ធនៈរឹង (solid-fuel) ត្រូវបានរចនាឡើង និងផលិតដោយភ្នាក់ងារអាវុធអវកាសនៃកងឆ្មាំបដិវត្តន៍អ៊ីរ៉ង់ និងមានចម្ងាយប្រតិបត្តិការ១០០០គីឡូម៉ែត្រ។

ការផ្សាយនោះបានបន្ថែមថា យន្តហោះគ្មានមនុស្សបើក Shahed-136B គឺជាការធ្វើទំនើបកម្មពីយន្តហោះគ្មានមនុស្សបើក Shahed-136 ជាមួយនឹងមុខងារថ្មីៗ និងចម្ងាយប្រតិបត្តិការជាង ៤០០០គីឡូម៉ែត្រ។

ប្រធានាធិបតីអ៊ីរ៉ង់ លោក Masoud Pezeshkian បានចូលរួមពិធីព្យុហយាត្រាកងទ័ពប្រចាំឆ្នាំនៅទីក្រុង Tehran ដោយរំលឹកដល់សង្រ្គាមឆ្នាំ ១៩៨០-៨៨ ជាមួយប្រទេសអ៊ីរ៉ាក់ ក្រោមការដឹកនាំរបស់ Saddam Hussein។

លោកបាននិយាយថា៖«រហូតដល់ពេលនេះ សមត្ថភាពការពារ និងកម្ចាត់របស់យើងបានកើនឡើងយ៉ាងខ្លាំង ដែលមិនមានបិសាចណាមួយគិតអំពីការឈ្លានពានណាមួយចំពោះអ៊ីរ៉ង់ជាទីគោរពរបស់យើងឡើយ»។

«ដោយមានការរួបរួមគ្នា និងការប្រទាក់ក្រឡាគ្នាក្នុងចំណោមប្រទេសអ៊ិស្លាម… យើងអាចដាក់ជំនួសកន្លែងរបស់ខ្លួននូវការបង្ហូរឈាម និងជាអ្នកឈ្លានពានអ៊ីស្រាអែល ដែលមិនបង្ហាញសេចក្ដីមេត្តាដល់អ្នកណាម្នាក់ មិនថាស្ត្រី ឬកុមារ មិនថាចាស់ ឬក្មេង»។

មជ្ឈិមបូព៌ាបានស្ថិតក្នុងភាពចលាចលបង្ហូរឈាមយ៉ាងខ្លាំងចាប់តាំងពីក្រុមសកម្មប្រយុទ្ធហាម៉ាសប៉ាឡេស្ទីនគាំទ្រដោយអ៊ីរ៉ង់ បានវាយប្រហារអ៊ីស្រាអែលកាលពីថ្ងៃទី៧ខែតុលា ដែលបង្កឱ្យមានសង្រ្គាមនៅតំបន់ហ្គាហ្សា និងអូសទាញសម្ព័ន្ធមិត្តអ៊ីរ៉ង់ជុំវិញតំបន់ ដែលរហូតដល់ពេលនេះប្រទេសលីបង់កំពុងហក់ចូលក្នុងសង្គ្រាម។

ភាពតានតឹងបានកាន់តែខ្លាំងក្នុងរយៈពេលប៉ុន្មានថ្ងៃថ្មីៗនេះ នៅពេលដែលការផ្តោតសំខាន់នៃការបាញ់របស់អ៊ីស្រាអែលបានផ្លាស់ប្តូរទៅកាន់ព្រំដែនលីបង់ ជាកន្លែងដែលកងទ័ពរបស់ខ្លួនកំពុងប្រយុទ្ធជាមួយក្រុមសកម្មប្រយុទ្ធហេសបូឡាដែលគាំទ្រដោយអ៊ីរ៉ង់។

អង់គ្លេស បារាំង អាល្លឺម៉ង់ និងសហរដ្ឋអាមេរិកបានដាក់ទណ្ឌកម្មថ្មីលើអ៊ីរ៉ង់កាលពីដើមខែកញ្ញា ដោយចោទប្រកាន់ថា ខ្លួនបានផ្តល់មីស៊ីលផ្លោងសម្រាប់កិច្ចប្រឹងប្រែងធ្វើសង្គ្រាមរបស់រុស្ស៊ីនៅអ៊ុយក្រែន៕