ព័ត៌មានអន្ដរជាតិ

លោក Netanyahu៖ អ៊ីស្រាអែលកំពុងប្រយុទ្ធតតាំងជាមួយសត្រូវចំនួន៧

បានផុស

៦ ខែ មុន

នៅ

ថ្ងៃចន្ទ ៧ តុលា ២០២៤

ដោយ

Chheang

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃអាទិត្យថា ជិត១ឆ្នាំបន្ទាប់ពីការវាយប្រហាររបស់ពួកហាម៉ាស ឥឡូវនេះប្រទេសរបស់លោកកំពុងប្រយុទ្ធនៅលើរណសិរ្សចំនួន៧។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍ជាវីដេអូមួយ លោក Netanyahu បានប្រាប់ថា សត្រូវបច្ចុប្បន្នដែលអ៊ីស្រាអែលកំពុងប្រយុទ្ធជាមួយ មានដូចជា ក្រុមហេសបូឡានៅប្រទេសលីបង់, ក្រុមហាម៉ាសនៅតំបន់ហ្គាហ្សា, ក្រុមហ៊ូធីនៅប្រទេសយេមែន, ក្រុមភេរវករនៅតំបន់ West Bank, ប្រទេសអ៊ីរ៉ង់, និងកងជីវពល Shiite នៅប្រទេសអ៊ីរ៉ាក់ និងប្រទេសស៊ីរី។

នាយករដ្ឋមន្ត្រីអ៊ីស្រាអែល បានសង្កត់ធ្ងន់ថា អ៊ីរ៉ង់បន្តដើរតួនាទីសំខាន់នៅក្នុងជម្លោះ ដោយបានបាញ់មីស៊ីលបាលីស្ទិកជាង ២០០គ្រាប់នៅអ៊ីស្រាអែលកាលពីសប្ដាហ៍មុន។ លោក Netanyahu ក៏បានបន្ថែមថា អ៊ីស្រាអែលបានចូលរួមយ៉ាងសកម្មក្នុងប្រតិបត្តិការយោធានៅលីបង់ ដោយបានបើកការវាយប្រហារជិត ៩ពាន់ដង គិតចាប់តាំងពីថ្ងៃទី៨ខែតុលាឆ្នាំ២០២៣ ដើម្បីឆ្លើយតបទៅនឹងការវាយប្រហារចំនួន ១៥០០ដងដោយក្រុមហេសបូឡា។

ពេលនិយាយអំពីតំបន់ហ្គាហ្សាស្ទ្រីបវិញ លោកបានបញ្ជាក់ថា អ៊ីស្រាអែលនៅតែបន្តប្រយុទ្ធដើម្បីរំដោះចំណាប់ខ្មាំងនៅសេសសល់ ១០១នាក់ដែលក្រុមហាម៉ាសចាប់ខ្លួន។

ទន្ទឹមគ្នានោះដែរ លោកនាយករដ្ឋមន្ត្រីបានរិះគន់ប្រធានាធិបតីបារាំង លោក Emmanuel Macron និងប្រទេសផ្សេងទៀតដែលបានអំពាវនាវឲ្យមានការដាក់ទណ្ឌកម្មអាវុធលើអ៊ីស្រាអែល ដោយនិយាយថា អ៊ីស្រាអែលនឹងប្រយុទ្ធរហូតដល់ទទួលបានជ័យជម្នះ ដើម្បីសន្តិភាព និងសន្តិសុខនៅលើពិភពលោក។

គួររំឭកថា ថ្ងៃចន្ទនេះគឺជាគំរប់ខួបលើកទីមួយនៃការវាយប្រហាររបស់ក្រុមហាម៉ាសលើអ៊ីស្រាអែលកាលពីថ្ងៃទី៧ខែតុលា ដែលបណ្ដាលឲ្យមនុស្សប្រហែល ១២០០នាក់ត្រូវបានសម្លាប់ និង ២៥១នាក់ទៀតត្រូវបានចាប់ធ្វើជាចំណាប់ខ្មាំង។ ក្រសួងសុខាភិបាលដែលគ្រប់គ្រងដោយក្រុមហាម៉ាស បាននិយាយថា មនុស្សជាង ៤ម៉ឺននាក់ត្រូវបានសម្លាប់នៅតំបន់ហ្គាហ្សា ក្រោយការវាយសងសឹកពីអ៊ីស្រាអែល៕

ដោយ៖ ឈាង