ព័ត៌មានអន្ដរជាតិ

លោក គីម ជុងអ៊ុន ប្រកាសឲ្យមន្ត្រីរបស់ខ្លួន ប្រយុទ្ធប្រឆាំងនឹងអំពើពុករលួយ

បានផុស

៦ ខែ មុន

នៅ

ថ្ងៃសុក្រ ១១ តុលា ២០២៤

ដោយ

Chheang

លោក គីម ជុងអ៊ុន បានអំពាវនាវដល់មន្ត្រីកូរ៉េខាងជើងឲ្យប្រយុទ្ធប្រឆាំងនឹងអំពើពុករលួយ និងលុបបំបាត់ការរំលោភបំពានអំណាច ដោយមានគោលបំណងរឹតបន្តឹងការក្តាប់វិន័យសង្គម និងពង្រឹងសាមគ្គីភាពផ្ទៃក្នុង។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Yonhap នៅថ្ងៃទី១១ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសរបស់មេដឹកនាំកូរ៉េខាងជើង ធ្វើឡើងនៅក្នុងពិធីអបអរខួបលើកទី៧៩នៃការបង្កើតគណបក្សកម្មករ កាលពីថ្ងៃទី១០ខែតុលា។

លោក គីម បាននិយាយថា មន្ត្រីគណបក្សមួយចំនួនមាន «កង្វះខាតធ្ងន់ធ្ងរ» ដោយអនុវត្តគោលនយោបាយរបស់គណបក្សនៅក្នុងផ្លូវខុស។

លោក គីម បានបន្តថា៖ «យើងគួរតែបន្តពង្រឹងការប្រយុទ្ធរបស់យើង ដើម្បីលុបបំបាត់ការរំលោភអំណាច ការិយាធិបតេយ្យ និងទង្វើនៃការប្រមូលទ្រព្យសម្បត្តិដោយខុសច្បាប់»។ លោកបានព្រមានថា អាកប្បកិរិយាបែបនេះបានបំផ្លាញគណបក្ស និងបន្សល់ទុកស្នាមប្រឡាក់លើជីវិតនយោបាយរបស់មន្ត្រីដែលប្រព្រឹត្តអំពើពុករលួយ។

លោកក៏បានសង្កត់ធ្ងន់ថា មនោគមវិជ្ជាស្ថាបនិករបស់គណបក្សកាន់អំណាចរបស់លោក គឺកិច្ចខិតខំប្រឹងប្រែងដើម្បីថែទាំប្រជាជន ដោយលោកបានយកឧទាហរណ៍អំពីការផ្តល់ជម្រកដល់ជនរងគ្រោះដោយទឹកជំនន់នៅទីក្រុងព្យុងយ៉ាង និងការបង្កើតគោលនយោបាយដើម្បីអភិវឌ្ឍតំបន់ខ្សត់ខ្សោយ។

សូមបញ្ជាក់ថា មុន១ថ្ងៃនៃពិធីអបអរខួបបង្កើតបក្សរបស់ខ្លួន រដ្ឋាភិបាលក្រុងព្យុងយ៉ាង បានប្រកាសកាត់ផ្ដាច់ផ្លូវ និងខ្សែរថភ្លើងទាំងអស់ ដែលតភ្ជាប់ទៅកូរ៉េខាងត្បូង ហើយកងទ័ពកូរ៉េខាងជើង នឹងផ្ដោតការពង្រឹងរបស់ខ្លួនបន្ថែមទៀតនៅលើខ្សែបន្ទាត់ព្រំដែន។ កូរ៉េខាងជើង បានអះអាងថា នេះគឺជាការឆ្លើយតបទៅនឹងសមយុទ្ធសង្រ្គាមរបស់កូរ៉េខាងត្បូង ដែលខ្លួនហៅថាជា «រដ្ឋអរិភាពចម្បង និងជាសត្រូវចម្បងដែលមិនអាចកែប្រែបាន» ហើយវាក៏ជាការឆ្លើយតបទៅនឹងការដាក់ពង្រាយជាញឹកញាប់នូវសព្វាវុធនុយក្លេអ៊ែរជាយុទ្ធសាស្ត្ររបស់អាមេរិកនៅក្នុងតំបន់ផងដែរ៕

ដោយ៖ ឈាង

Related Topics:ប្រទេសកូរ៉េខាងជើង