ព័ត៌មានអន្ដរជាតិ

លោក Netanyahu៖ កិច្ចចរចាបទឈប់បាញ់ អាចដំណើរការបានទាល់តែតាមរយៈការបាញ់បោះ

បានផុស

៥ ខែ មុន

នៅ

ថ្ងៃចន្ទ ២៨ តុលា ២០២៤

ដោយ

Chheang

សំណើបទឈប់បាញ់រយៈពេលខ្លីនៅតំបន់ហ្គាហ្សាដែលលើកឡើងដោយប្រទេសអេហ្ស៊ីប ត្រូវបានលោក Benjamin Netanyahu នាយករដ្ឋមន្ត្រីអ៊ីស្រាអែល បដិសេធ ហើយនិយាយថា កិច្ចចរចាធ្វើទៅបានតាមរយៈតែការបាញ់បោះគ្នាប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីអេហ្ស៊ីប លោក Abdel-Fattah el-Sissi កាលពីថ្ងៃអាទិត្យបានប្រកាសអំពីសំណើបទឈប់បាញ់រយៈពេល២ថ្ងៃនៅហ្គាហ្សា ដើម្បីធ្វើការដោះដូរចំណាប់ខ្មាំងរវាងភាគីជម្លោះទាំងពីរគឺ អ៊ីស្រាអែល និងក្រុមសកម្មប្រយុទ្ធហាម៉ាស។ យ៉ាងណា ទោះមានការគាំទ្រជាច្រើនពីរដ្ឋមន្ត្រីអ៊ីស្រាអែលចំពោះសំណើមួយនេះក៏ដោយ ក៏លោក Netanyahu សម្រេចច្រានចោល ហើយសង្កត់ធ្ងន់ថា «កិច្ចចរចាអាចចាប់ផ្ដើមនៅក្រោមគ្រាប់កាំភ្លើងតែប៉ុណ្ណោះ»។ នេះបើយោងតាមការចុះផ្សាយរបស់ប៉ុស្តិ៍ទូរទស្សន៍លេខ១២របស់អ៊ីស្រាអែល។

ប្រព័ន្ធផ្សព្វផ្សាយក្នុងស្រុកដដែលនេះ បានបញ្ជាក់ទៀតថា កងកម្លាំងសន្តិសុខអ៊ីស្រាអែលក៏បានយល់ស្របចំពោះសំណើបទឈប់បាញ់នេះផងដែរ។

អ៊ីស្រាអែល បានប៉ាន់ស្មានថា ពលរដ្ឋរបស់ខ្លួនប្រហែល ១០១នាក់នៅតែត្រូវបានចាប់ឃុំខ្លួនដោយក្រុមហាម៉ាស-ប៉ាឡេស្ទីននៅក្នុងតំបន់ហ្គាហ្សា ចំពេលមានការព្រួយបារម្ភថា ពួកគេមួយចំនួនអាចត្រូវបានគេសម្លាប់រួចហើយ នៅក្នុងការវាយប្រហារតាមអាកាសដោយមិនរើសមុខរបស់អ៊ីស្រាអែលនៅទូទាំងតំបន់ហ្គាហ្សាដែលមានប្រជាជនរស់នៅច្រើន។

កិច្ចខិតខំប្រឹងប្រែងដែលដឹកនាំដោយសហរដ្ឋអាមេរិក អេហ្ស៊ីប និងកាតា ដើម្បីទទួលបានបទឈប់បាញ់ និងសម្របសម្រួលការផ្លាស់ប្តូរអ្នកទោសរវាងអ៊ីស្រាអែល និងក្រុមហាម៉ាស រហូតមកដល់ពេលនេះបានជាប់គាំង ដោយលោក Netanyahu បានបដិសេធមិនពិចារណាបញ្ចប់ជម្លោះនោះទេ។

សូមបញ្ជាក់ថា កងទ័ពអ៊ីស្រាអែលបានបន្តការវាយលុកដ៏សាហាវនៅលើតំបន់ហ្គាហ្សាស្ទ្រីប ចាប់តាំងពីមានការលុកលុយឆ្លងព្រំដែនដោយក្រុមហាម៉ាសកាលពីខែតុលាឆ្នាំមុន បើទោះបីជាមានសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិទាមទារបទឈប់បាញ់ជាបន្ទាន់ក៏ដោយ។

ចាប់តាំងពីពេលនោះមក មនុស្សជិត ៤៣ ០០០នាក់ត្រូវបានសម្លាប់ ដែលភាគច្រើនជាស្ត្រី និងកុមារ ហើយជាង ១០ម៉ឺននាក់ផ្សេងទៀតបានរងរបួស។ នេះបើយោងតាមអាជ្ញាធរសុខាភិបាលក្នុងតំបន់។

ការវាយសងសឹករបស់អ៊ីស្រាអែល បានធ្វើឲ្យប្រជាជនស្ទើរតែទាំងអស់នៃតំបន់ហ្គាហ្សាផ្លាស់ប្ដូរទីលំនៅ ព្រមទាំងមានការរាំងខ្ទប់ដែលនាំឲ្យមានកង្វះខាតអាហារ ទឹកស្អាត និងថ្នាំពេទ្យយ៉ាងធ្ងន់ធ្ងរ។

អ៊ីស្រាអែលក៏ប្រឈមមុខនឹងសំណុំរឿងប្រល័យពូជសាសន៍នៅតុលាការយុត្តិធម៌អន្តរជាតិចំពោះសកម្មភាពរបស់ខ្លួននៅហ្គាហ្សាផងដែរ៕

ដោយ៖ ឈាង

ចុចអាន៖ អេហ្ស៊ីប ស្នើបទឈប់បាញ់២ថ្ងៃនៅហ្គាហ្សា ដើម្បីដោះដូរចំណាប់ខ្មាំងអ៊ីស្រាអែល និងប៉ាឡេស្ទីន