វៀតណាម ចាប់ផ្តើមមានមនុស្សស្លាប់ ដោយសារព្យុះ ត្រាមី

គិតត្រឹមរសៀលថ្ងៃចន្ទទី២៨ខែតុលាឆ្នាំ២០២៤ ប្រទេសវៀតណាម បានរាយការណ៍អំពីមនុស្សស្លាប់ចំនួន៤នាក់ ដោយសារឥទ្ធិពលព្យុះត្រាមី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Tuoi Tre, មនុស្សទាំង៤ដែលបាត់បង់ជីវិត គឺមាន២នាក់នៅខេត្តធឿធៀនហ្វេ ម្នាក់នៅក្វាងណាម និងម្នាក់នៅក្វាងប៊ិញ។

ក្រៅពីសម្លាប់មនុស្សហើយនោះ ព្យុះត្រាមី ក៏បង្កការបំផ្លាញបំផ្លាញធំធេងដល់សំណង់ហេដ្ឋារចនាសម្ព័ន្ធសាធារណៈផងដែរ បន្ទាប់ពីវាវាយប្រហារភាគកណ្តាលប្រទេសវៀតណាម កាលពីរសៀលថ្ងៃអាទិត្យ។

លើសពីនេះ ព្យុះត្រាមី បានបំផ្លាញផ្ទះចំនួន ២៩៥ខ្នង, ជន់លិចជិត ១៥ ២០០ ខ្នង ខណៈផលដំណាំនិងដើមឈើហូបផ្លែលើផ្ទៃដី ៤៣១ហិកតាក៏ត្រូវទឹកជន់លិចផងដែរ ហើយផ្លូវថ្នល់ជាច្រើនខ្សែត្រូវរងការខូចខាតនៅក្នុងតំបន់នេះ។

សូមបញ្ជាក់ថា ត្រាមី ដែលមានកម្លាំងខ្យល់៨៨គីឡូម៉ែត្រក្នុងមួយម៉ោង គឺជាព្យុះទីប្រាំមួយដែលវាយប្រហារវៀតណាម ក្នុងឆ្នាំនេះ។

មុនមកដល់វៀតណាម ព្យុះ ត្រាមី បានបង្កទុកវេទនានៅប្រទេសហ្វីលីពីន ដោយបង្កជាទឹកជំនន់និងគ្រោះបំណាក់ដី ខណៈគិតត្រឹមព្រឹកថ្ងៃចន្ទទី២៨ខែតុលាឆ្នាំ២០២៤ តួលេខមនុស្សស្លាប់និងបាត់ខ្លួន បានកើនឡើងដល់ ១៣៦នាក់ហើយ។

ទោះបីជាយ៉ាងណាក៏ដោយ ក្រុមអ្នកជួយសង្គ្រោះសន្និដ្ឋានថា តួលេខមនុស្សស្លាប់អាចបន្តកើនឡើងទៀត ព្រោះនៅមានមនុស្សមួយចំនួនត្រូវជាប់ក្រោមដីបាក់សង្កត់៕

អត្ថបទ៖ សុខ សុវណ្ណ

ចុចអាន៖ ព្យុះត្រាមី វាយប្រហារវៀតណាម ជាមួយកម្លាំងខ្យល់ល្បឿន ៨៨គីឡូម៉ែត្រក្នុងមួយម៉ោង